ଓଏଲଏ କ୍ୟାମ୍ପସ ସ୍ଥିତ ସ୍ଵତନ୍ତ୍ର କୋଷାଗାର ନଂ-୨ ପକ୍ଷରୁ ଜାତୀୟ ପେନସନ୍ ସପ୍ତାହ ପାଳନ

ଭୁବନେଶ୍ୱର: ଭୁବନେଶ୍ୱରରେ ଓଡ଼ିଶା ବିଧାନସଭା ପରିସରରେ ଥିବା ସ୍ୱତନ୍ତ୍ର କୋଷାଗାର ନଂ – ୨ ପକ୍ଷରୁ ତା୦୯/୦୨/୨୦୨୬ ରିଖ ଠାରୁ ତା୧୩/୦୨/୨୦୨୬ରିଖ ପର୍ଯ୍ୟନ୍ତ ଏନପିଏସ୍ (ଜାତୀୟ ପେନସନ୍ ଯୋଜନା)ସପ୍ତାହ ପାଳନ ହୋଇଯାଇଛି। କୋଷାଗାର ଅଧିକାରୀ ଏବଂ ତାଙ୍କ କର୍ମଚାରୀମାନଙ୍କ ଦ୍ୱାରା ତା୧୨/୦୨/୨୦୨୬ରିଖରେ ଡିଟିଆଇ ସମ୍ମିଳନୀ ହଲ୍, ଭୁବନେଶ୍ୱରରେ ସମସ୍ତ ଡିଡିଓଙ୍କ ପାଇଁ ଏନପିଏସ୍ ଉପରେ ଏକ ସ୍ୱତନ୍ତ୍ର ସଚେତନତା ଏବଂ ତାଲିମ କାର୍ଯ୍ୟକ୍ରମ ଆୟୋଜନ କରାଯାଇଥିଲା । ରାଜକୋଷ ଓ ପରିଦର୍ଶନ ନିର୍ଦ୍ଦେଶାଳୟ(ଡିଟିଆଇ)ର ନିର୍ଦ୍ଦେଶିକା ଶ୍ରୀମତୀ ଦିବାରାଣୀ ଡୋରା ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ । ସମ୍ମାନିତ ଅତିଥି ଭାବେ ଡିଟିଆଇର ଅତିରିକ୍ତ ନିର୍ଦ୍ଦେଶକ ଶ୍ରୀ କିଶୋର କୁମାର ନାୟକ ଉପସ୍ଥିତ ରହି ଏନପିଏସରୁ ୟୁପିଏସକୁ ସଠିକ୍ ସ୍ଥାନାନ୍ତର ପାଇଁ ତାଲିମ ଅଧିବେଶନ ସମୟରେ ଅଂଶଗ୍ରହଣକାରୀମାନଙ୍କୁ ସେମାନଙ୍କର ସନ୍ଦେହ ସମ୍ପର୍କରେ ସ୍ପଷ୍ଟୀକରଣ ପାଇବାକୁ ଉତ୍ସାହିତ କରିଥିଲେ। ଏହି ଅବସରରେ କୋଷାଗାର ଅଧିକାରୀ ଶ୍ରୀ ଦାମୋଦର ପାତ୍ର କୋଷାଗାର ଅଧୀନରେ ଥିବା ସମସ୍ତ ଡିଡିଓ ଏବଂ ଏନପିଏସର ସବସ୍କ୍ରାଇବରଙ୍କୁ ସମ୍ପୂର୍ଣ୍ଣ ସପ୍ତାହ ପାଇଁ କୋଷାଗାରରେ ଖୋଲା ଥିବା ହେଲ୍ପ୍ ଡେସ୍କର ଲାଭ ଉଠାଇବାକୁ ଉତ୍ସାହିତ କରିଥିଲେ l