ଶାଶୂ’ଙ୍କୁ ଛୁରୀ ଭୁସିଦେଇ ବିଷ ପିଇଲା ଜ୍ୱାଇଁ

ପୁରୀ: ସ୍ଥାନୀୟ ବାସେଳୀସାହି ଥାନା ଅନ୍ତର୍ଗତ କ୍ରିୟାଯୋଗ ଆଶ୍ରମ ନିକଟରେ ଆଜି ଅପରାହ୍ନରେ ଏକ ଅଭାବନୀୟ ଘଟଣା ଘଟିଛି । ଏହି ଆଶ୍ରମ ନିକଟ ବସ୍ତିରେ ଶାଶୂକୁ ଛୁରୀ ଭୁଷି ହତ୍ୟା କରିଛି ଜ୍ୱାଇଁ । ପାରିବାରିକ କଳହରୁ ଏହି ହତ୍ୟାକାଣ୍ଡ ହୋଇଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି । ହତ୍ୟା କରିବା ପରେ ଅଭିଯୁକ୍ତ ନିଜେ ବିଷଖାଇ ଦେଇଥିଲା । ଗୁରୁତର ଅଭିଯୁକ୍ତ ଜ୍ୱାଇଁଙ୍କୁ ସଦର ହସପିଟାଲରେ ଭର୍ତ୍ତି କରାଯାଇଛି । ପରେ ତାକୁ କଟକ ସ୍ଥାନାନ୍ତରିତ କରାଯାଇଛି । ସୂଚନା ଅନୁଯାୟୀ, ଜ୍ୱାଇଁ ହେଉଛି ତାଳଚେରର ଶକ୍ତିଧର ଦାସ । ପୁରୀରେ ରହି ଡ୍ରାଇଭିଂ କରି ଚଳୁଥିଲା । କିଛିଦିନ ତଳେ ସେ ଭଲପାଇ ତିଳୋତ୍ତମା କରଙ୍କ ସାନଝିଅକୁ ବିବାହ କରିଥିଲା । ମାତ୍ର ବଡଝିଅ ଥାଇ ଆଗ ସାନଝିଅ ବିବାହ ହୋଇଥିବାରୁ ଶାଶୂ ଘରକୁ ଛାଡୁନଥିଲେ ଜ୍ୱାଇଁ । ଫଳରେ ଶକ୍ତିଧର ରାଗିଯାଇ ଆଜି ଅପରାହ୍ନରେ କଚେରି ଛକରୁ ଏକ ଛୁରୀ କିଣି ଶାଶୂ ଘରେ ଏକାକୀ ଥିବାବେଳେ ୮ ଥର ଆକ୍ରମଣ କରିଥିଲା । ଶାଶୂଙ୍କ ପେଟର ଅନେକ ଯାଗାରେ ଷ୍ଟେବିଂ କରିଥିଲେ । ପ୍ରଚୁର ରକ୍ତସ୍ରାବ ଯୋଗୁଁ ଶାଶୂଙ୍କ ମୃତ୍ୟୁ ଘଟିଥିଲା । ଖବର ପାଇଁ ବଳିଆପଣ୍ଡା, ବାସେଳୀସାହି ଥାନା ପୋଲିସ ସହ ଅତିରିକ୍ତ ଏସପି ଘଟଣାସ୍ଥଳରେ ପହଞ୍ଚି ଛାନବିନ ଆରମ୍ଭ କରିଛନ୍ତି । ମୃତ ତିଳୋତ୍ତମା କରଙ୍କ ବଡ଼ଝିଅ ବାସେଳୀସାହି ଥାନାରେ ଲିଖିତ ଅଭିଯୋଗ କରିଛନ୍ତି । ପୋଲିସ ହତ୍ୟା ମାମଲା ରୁଜୁ କରି ଘଟଣାର ତଦନ୍ତ କରୁଛି ।