ମୁମ୍ବାଇ: ଶ୍ରୀଲଙ୍କାର ପୂର୍ବତନ ଦ୍ରୁତ ବୋଲର ଲସିଥ୍ ମାଲିଙ୍ଗାଙ୍କୁ ମୁମ୍ବାଇ ଇଣ୍ଡିଆନ୍ସ ଆନୁଷ୍ଠାନିକ ଭାବେ ବୋଲିଂ କୋଚ୍ ଭାବେ ନିଯୁକ୍ତ କରିଛି । ୪୦ ବର୍ଷୀୟ ମାଲିଙ୍ଗା ନିଜ ଆଇପିଏଲ୍ କ୍ୟାରିୟରରେ କେବଳ ମୁମ୍ବାଇ ଇଣ୍ଡିଆନ୍ସ ପକ୍ଷରୁ ଖେଳିଛନ୍ତି ।ଏପରିକି ସେ ଦଳର ମର୍କ୍ୟୁ ଖେଳାଳି ମଧ୍ୟ ରହିଥିଲେ । ୫ ଥର ଆଇପିଏଲ୍ ଚାମ୍ପିଅନ୍ ମୁମ୍ବାଇ ଇଣ୍ଡିଆନ୍ସର ଆଗାମୀ ସିଜନ ପାଇଁ ମାଲିଙ୍ଗା ଏବେ ମାର୍କ ବାଉଚର ଓ ତାଙ୍କ ପୂର୍ବତନ ସାଥୀ କିରନ୍ ପୋଲାର୍ଡଙ୍କ ସହ କୋଚିଂ ଦଳରେ ସାମିଲ ହେବେ । ଏହି ତିନି ଜଣ ପୂର୍ବତନ କ୍ରିକେଟର ଡଗ୍ଆଉଟରେ ଏକ ଶକ୍ତିଶାଳୀ ଭାଗିଦାରୀ କରିବା ସହ ଫ୍ରାଞ୍ଚାଇଜକୁ ପୁଣିଥରେ ଚାମ୍ପିଅନ୍ କରିବେ ବୋଲି କୁହାଯାଉଛି ।
କୋଚ୍ ଭାବେ ପୁଣିଥରେ ଦଳରେ ସାମିଲ ହେବାକୁ ନେଇ ମାଲିଙ୍ଗା କହଛନ୍ତି କି, ମାର୍କଙ୍କ ସହ ମିଶି କାମ କରିବାକୁ ମୁଁ ଆଗ୍ରହୀ, ପଲି, ରୋହିତ ଓ ଟିମର ଅନ୍ୟ ଖେଳାଳିମାନେ, ବିଶେଷ କରି ବୋଲିଂ ୟୁନିଟ୍ ଉପରେ ଅଧିକ ଗୁରୁତ୍ୱ ଦେବି । ମୁମ୍ବାଇ ଇଣ୍ଡିଆନ୍ସର ଯୁବ ପ୍ରତିଭା ଶ୍ରେଷ୍ଠ ପ୍ରଦର୍ଶନ କରିବାର କ୍ଷମତା ରଖିଛନ୍ତି । ମାଲିଙ୍ଗା ଅନ୍ତର୍ଜାତୀୟ କ୍ରିକେଟରେ ଶ୍ରୀଲଙ୍କା ଓ ଆଇପିଏଲରେ ମୁମ୍ବାଇ ପାଇଁ ବୋଲିଂ କରି ଅନେକ ମ୍ୟାଚ୍ ଜିତିଛନ୍ତି । ପୂର୍ବତନ ତାରକା ପେସ୍ ବୋଲର ୨୦୦୮ ମସିହାରୁ ମୁମ୍ବାଇ ଇଣ୍ଡିଆନ୍ସ ସହ ପ୍ରାୟ ୧୩ ବର୍ଷ ଅତିବାହିତ କରିଛନ୍ତି ।
ସେ ଚଳିତ ବର୍ଷ ମୁମ୍ବାଇ ଇଣ୍ଡିଆନ୍ସ ନ୍ୟୁୟର୍କ ଦଳ ସହ ରହିଥିଲେ । ମୁମ୍ବାଇ ନ୍ୟୁୟର୍କ ଓ କେପ୍ ଟାଉନକୁ ମିଶାଇ ସମ୍ପ୍ରସାରିତ ଏମ୍ଆଇ ଗ୍ରୁପ୍ ସହିତ ମାଲିଙ୍ଗା ଚାରିଟି ଆଇପିଏଲ୍, ଦୁଇଟି ଚାମ୍ପିଅନ୍ସ ଲିଗ୍ ଟି-୨୦ ଓ ଏମ୍ଏଲସି ସମେତ ସାତଟି ଟ୍ରଫି ଜିତିଛନ୍ତି । ୨୦୨୧ରେ ଅବସର ନେଇଥିବା ମାଲିଙ୍ଗା ଚଳିତ ବର୍ଷ ରାଜସ୍ଥାନ ରୟାଲ୍ସ ସହ ମଧ୍ୟ କାମ କରିଥିଲେ । ମୁମ୍ବାଇର ବୋଲିଂ କୋଚ୍ ରହିଥିବା ନ୍ୟୁଜିଲାଣ୍ଡର ସେନ୍ ବଣ୍ଡଙ୍କ କଥା କହିବାକୁ ଗଲେ ସେ ୨୦୧୫ ମସିହାରୁ ଏମ୍ଆଇ ସହ ଜଡ଼ିତ ଅଛନ୍ତି ଏବଂ ଦଳର ବୋଲିଂ କୋଚ୍ ଭାବେ ୪ଟି ଆଇପିଏଲ୍ ଟ୍ରଫି ଜିତିଛନ୍ତି ବୋଲି ମାଲିଙ୍ଗା କହିଛନ୍ତି ।
