ମୁମ୍ବାଇ: ବିମାନରେ ଯାତ୍ରା ସମୟରେ ଜଣେ ପୁରୁଷ ଯାତ୍ରୀଙ୍କ ଦ୍ୱାରା ର୍ଦୁବ୍ୟବହାରର ଶିକାର ହୋଇଛନ୍ତି ମାଲାୟାଲମ ଅଭିନେତ୍ରୀ । ଏନେଇ ଅଭିନେତ୍ରୀ ପୁରୁଷ ଯାତ୍ରୀଙ୍କ ବିରୋଧରେ ସ୍ଥାନୀୟ ଥାନାରେ ଅଭିଯୋଗ କରିଛନ୍ତି । ମଙ୍ଗଳବାର ମୁମ୍ବାଇରୁ ବିମାନ ଉଡ଼ାଣ ବେଳେ ଅଭିନେତ୍ରୀଙ୍କ ସହ ଏହି ଘଟଣା ଘଟିଥିବା ଜଣାପଡିଛି । ସୂଚନା ଅନୁସାରେ, ଅଭିନେତ୍ରୀ ଜଣକ ମୁମ୍ବାଇରୁ କୋଚି ଅଭିମୁଖେ ମଙ୍ଗଳବାର ଦିନ ଏୟାର ଇଣ୍ଡିଆ ବିମାନରେ ଯାତ୍ରା କରୁଥିଲେ । ଏହି ସମୟରେ ତାଙ୍କ ସହ ବିମାନରେ ଥିବା ଏକ ଯାତ୍ରୀ ତାଙ୍କ ସହ ଯୁକ୍ତିତର୍କ କରିବା ସହ ର୍ଦୁବ୍ୟବହାର କରିଥିଲେ । ଯାହାକୁ ନେଇ ବର୍ତ୍ତମାନ ଅଭିନେତ୍ରୀ ଥାନାର ଦ୍ୱାରସ୍ଥ ହୋଇଛନ୍ତି । ସେ ନିଜ ଇନଷ୍ଟାଗ୍ରାମରେ ଏକ ପୋଷ୍ଟ ସେୟାର କରି ଏହି ଘଟଣା ନେଇ ସୂଚନା ଦେଇଛନ୍ତି । ଇନଷ୍ଟାଗ୍ରାମରେ ଇମେଲ ମାଧ୍ୟମରେ ଦିଆଯାଇଥିବା ଅଭିଯୋଗର ଏକ କପି ସେୟାର କରିଛନ୍ତି ।
ଅଭିନେତ୍ରୀ ପୋଷ୍ଟରେ ବିମାନର ଗ୍ରାଉଣ୍ଡ ଅଫିସ୍ ଏବଂ ଫ୍ଲାଇଟ୍ କ୍ରୁଙ୍କ ପ୍ରତିକ୍ରିୟାରେ ଅସନ୍ତୋଷ ବ୍ୟକ୍ତ କରି ଏହାକୁ ନିରାଶଜନକ ବୋଲି କହିଛନ୍ତି । କାରଣ ଅବତରଣ କରିବା ପରେ ସେ ବିମାନ ବନ୍ଦର ଏବଂ ବିମାନ କର୍ତ୍ତୃପକ୍ଷଙ୍କୁ ଜଣାଇଥିଲେ । ହେଲେ ସେମାନେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନ କରି ତାଙ୍କୁ ପୋଲିସ ପାଖକୁ ପଠାଇ ଦେଇଥିଲେ । ସେ ଲେଖିଛନ୍ତି, ଯାତ୍ରୀ ଜଣଙ୍କ ମୋତେ ଅସଦାଚରଣ କରିଥିଲେ । ଯେତେବେଳେ ମୁଁ ଏହାକୁ ବିରୋଧ କରିଥିଲି । ସେ ମୋ ସହ ଯୁକ୍ତିତର୍କ କରିଥିଲେ । ତେବେ ମୁଁ ମୋର ଟିକେଟ୍ ସହିତ ଥାନାରେ ଲିଖିତ ଅଭିଯୋଗ କରିଛି । ଅଭିନେତ୍ରୀ ସ୍ଥାନୀୟ ପୋଲିସ ତାଙ୍କଠାରୁ ଏହି ଇମେଲ ଗ୍ରହଣ କରି ଏହାକୁ ଆନୁଷ୍ଠାନିକ ଅଭିଯୋଗ ଭାବରେ ଗ୍ରହଣ କରିବାକୁ ଅନୁରୋଧ କରିଛନ୍ତି । ଏଥିସହ ଯାତ୍ରୀ ସୁରକ୍ଷା ବିଷୟରେ ସଚେତନତା ସୃଷ୍ଟି କରିବାରେ ତାଙ୍କୁ ସମର୍ଥନ କରିବାକୁ ଅଭିନେତ୍ରୀ କହିଛନ୍ତି । ରିପୋର୍ଟ ଅନୁଯାୟୀ, ପୋଲିସ ଘଟଣାର ତଦନ୍ତ ଆରମ୍ଭ କରିଛି । ସେମାନେ ଏହି ଘଟଣାର ଅଧିକ ତଦନ୍ତ ପାଇଁ ତାଙ୍କ ସହ ଯୋଗାଯୋଗ କରିବାକୁ ଚେଷ୍ଟା କରୁଛନ୍ତି । ଅଭିନେତ୍ରୀଙ୍କ ସହ କଥା ହେବା ପରେ ପରବର୍ତ୍ତୀ କାର୍ଯ୍ୟ ସ୍ଥିର କରାଯିବ ।
