ପଞ୍ଜାବ ସହରବାସୀଙ୍କୁ କେଜ୍ରିୱାଲ୍‌ଙ୍କ ୧୦ ଗ୍ୟାରେଣ୍ଟି

ଜଳନ୍ଧର:  ବିଧାନସଭା ନିର୍ବାଚନ ହେବାକୁ ଯାଉଥିବା ପଞ୍ଜାବରେ ପୂର୍ବରୁ ବିଭିନ୍ନ କ୍ଷେତ୍ରରେ ବହୁ ଗ୍ୟାରେଣ୍ଟି ଦେଇ ସାରିଥିବା ଆମ୍ ଆଦ୍‌ମୀ ପାର୍ଟି (ଆପ୍‌) ଜାତୀୟ ସଂଯୋଜକ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ୍ ଶନିବାର ରାଜ୍ୟର ସହରବାସୀଙ୍କ ପାଇଁ ୧୦ଟି ଗ୍ୟାରେଣ୍ଟି ଦେଇଛନ୍ତି । ଏହା ମଧ୍ୟରେ ନୂଆ ଟ୍ୟାକ୍ସ ଲାଗୁ ନକରିବା ଏବଂ ବର୍ତ୍ତମାନର ଟ୍ୟାକ୍ସରେ କୌଣସି ବୃଦ୍ଧି ନକରିବା ପ୍ରମୁଖ । ଆପ୍‌ର ରାଜ୍ୟ ସଭାପତି ତଥା ମୁଖ୍ୟମନ୍ତ୍ରୀ ଚେହେରା ଭଗୱନ୍ତ ମାନ୍‌ଙ୍କ ସହଜଳନ୍ଧରରେ କେଜ୍ରିୱାଲ୍ ଏକ ପ୍ରେସ୍ କନ୍‌ଫରେନ୍ସ ବେଳେ ଏହି ୧୦ଟି ଗ୍ୟାରେଣ୍ଟି ପ୍ରଦାନ କରିଛନ୍ତି । ଏହି ଅବସରରେ କେଜ୍ରିୱାଲ୍ କହିଥିଲେ ଲୁଧିଆନା, ଭଟିଣ୍ଡା, ଅମୃତସର ଏବଂ ଜଳନ୍ଧର ପରି ରାଜ୍ୟର ବିଭିନ୍ନ ସହରରେ ସ୍ୱଚ୍ଛତା ପ୍ରମୁଖ ସମସ୍ୟା । ପାର୍ଟି ସରକାରକୁ ଆସିଲେ ଉପଯୁକ୍ତ ସ୍ୱେରେଜ୍‌, ଡ୍ରେନେଜ୍ ସମେତ ଶ୍ରେଷ୍ଠ ସ୍ୱଚ୍ଛତା ସୁବିଧା ଯୋଗାଇ ଦିଆଯିବ ବୋଲି ସେ ଘୋଷଣା କରିଥିଲେ । ସେହିପରି ୨୪ ଘଣ୍ଟା ବିଜୁଳି ଏବଂ ପାନୀୟ ଜଳ ଯୋଗାଣ, ଘରେ ପାଖରେ ସରକାରୀ ସେବା ପ୍ରଦାନ, ଭଙ୍ଗା ସଡ଼କରୁ ସହରକୁ ମୁକ୍ତି ପରି ଗ୍ୟାରେଣ୍ଟି ଏହା ମଧ୍ୟରେ ଅନ୍ୟତମ ।