– ୬୦ ବସ୍ତାରେ ପୂରାଇ ନେଇଗଲେ ଚୋର
ହାସନ: ସାରା ଦେଶରେ ଏବେ ଟମାଟୋ ମୂଲ୍ୟ ଆକାଶଛୁଆଁ ହୋଇଥିବା ବେଳେ ବିଲରେ ଚାଷ ହୋଇଥିବା ପ୍ରାୟ ୨.୫ ଲକ୍ଷ ଟଙ୍କାର ଟମାଟୋ ଚୋରମାନେ ନେଇଯାଇଥିବା ଭଳି ମାମଲା ସାମ୍ନାକୁ ଆସିଛି । ଏହି ଚୋରି କର୍ଣ୍ଣାଟକ ହାସଲ ଜିଲ୍ଲା ଅନ୍ତର୍ଗତ ଗୋନି ସୋମନହଲ୍ଲୀ ଗାଁରେ ଘଟିଛି । ଚୋରମାନେ ଜୁଲାଇ ୪ ତାରିଖ ରାତିରେ ବିଲରେ ପଶି ୬୦ଟି ବସ୍ତାରେ ଟମାଟୋ ନେଇ ଫେରାର୍ ହୋଇଯାଇଥିବା ମହିଳା ଚାଷୀ ଧାରିଣୀ ଅଭିଯୋଗ କରିଛନ୍ତି ।
ଅଭିଯୋଗକୁ ଭିତ୍ତିକରି ହଲେବିଡ଼ୁ ଥାନାରେ ମାମଲା ରୁଜୁ ହୋଇଛି । ଏବେ କର୍ଣ୍ଣାଟକରେ ଟମାଟୋ କିଲୋ ୧୨୦ ଟଙ୍କା ଥିବାରୁ ଏହାକୁ ବଜାରରେ ବିକ୍ରି ପାଇଁ ଧାରିଣୀ ପ୍ରସ୍ତୁତ ହେଉଥିଲେ । ଟମାଟୋ ଚାଷ ପାଇଁ ଧାରିଣୀ କରଜ କରିଥିଲେ ଏବଂ ସଂଯୋଗବଶତଃ ଭଲ ଫସଲ ହୋଇଥିବା ବେଳେ ଦାମ୍ ମଧ୍ୟ ଅଧିକ ଥିଲା । କ୍ଷତିପୂରଣ ପାଇଁ ଧାରିଣୀଙ୍କ ପୁଅ ରାଜ୍ୟ ସରକାରଙ୍କୁ ଅନୁରୋଧ କରିଛନ୍ତି । ହଲେବିଡ଼ୁ ଥାନାରେ ଟମାଟୋ ଚୋରି ଅଭିଯୋଗ ହେବା ପ୍ରଥମ ଘଟଣା ବୋଲି ଥାନାର ପୁଲିସ ଅଧିକାରୀ କହିଛନ୍ତି ।
