ବଡବିଲ : ଲୁହା ତାରରେ ଲୁଗା ଶୁଖାଇବା ହେଲା କାଳ । ବିଦ୍ୟୁତ ଆଘାତ ଲାଗି ଯୁବକଙ୍କ ମୃତ୍ୟୁ । ଏଭଳି ଦୁଃଖଦ ଘଟଣା ଘଟିଛି ବଡ଼ବିଲ ୧୫ ନଂ ୱାର୍ଡ ସାଧୁ ସିଂ ହଟିଂ ଅଞ୍ଚଳରେ । ମୃତକ ହେଉଛନ୍ତି ୩୦ ବର୍ଷୀୟ ସୁବ୍ରତ ସେଠୀ ।
ସୂଚନାଯୋଗ୍ୟ ଯେ, ପ୍ରତିଦିନ ଭଳି ସୋମବାର ସେ ଗାଧୋଇ ସରିବା ପରେ ଘର ଅଗଣାରେ ବନ୍ଧାଯାଇଥିବା ଏକ ଲୁହା ତାରରେ ନିଜର ଓଦା ଲୁଗାକୁ ଶୁଖାଉଥିଲେ । ତେବେ ସେହି ତାରରେ ଲୁଗା ପକାଇବା କ୍ଷଣି ତାଙ୍କୁ ହଠାତ ବିଦ୍ୟୁତ ଆଘାତ ଲାଗିଥିଲା । ଯାହା ଫଳରେ ତାଙ୍କୁ ଶକ୍ତ ବିଦ୍ୟୁତ ଆଘାତ ଲାଗିଥିଲା ଓ ସେ ସଂଜ୍ଞାହୀନ ହୋଇ ତଳେ ପଡିଯାଇଥିଲେ । ପରିବାର ଲୋକେ ସଙ୍ଗେ ସଙ୍ଗେ ତାଙ୍କୁ ବଡ଼ବିଲ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନେଇଥିଲେ । ତେବେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ମୃତ ସୁବ୍ରତଙ୍କ ସ୍ତ୍ରୀ ଓ ୫ ବର୍ଷର ଏକ ପୁତ୍ର ସନ୍ତାନ ରହିଛି । ତେବେ ସର୍ଟ ସର୍କିଟ ଯୋଗୁଁ ଲୁଗା ଶୁଖା ତାରରେ କରେଣ୍ଟ ଚାର୍ଜ ହୋଇଯାଇଥିବା ଅନୁମାନ କରାଯାଉଛି । ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଶୋକାକୂଳ ପରିବେଶ ସୃଷ୍ଟି ହୋଇଛି ।
