ଗୋଆ : ଚଳିତ ଆଇଏସ୍ଏଲ୍ର ସପ୍ତମ ସଂସ୍କରଣରେ ଶୁକ୍ରବାର ସ୍ଥାନୀୟ ତିଲକ ମୈଦାନଠାରେ ଜାମସେଦପୁର ଏଫ୍ସି (ଜେଏଫ୍ସି) ଓ ନର୍ଥଇଷ୍ଟ୍ ୟୁନାଇଟେଡ୍ ଏଫସି ମଧ୍ୟରେ ୩୨ତମ ମ୍ୟାଚ୍ ଖେଳାଯାଇଛି । ଏଥିରେ ଜେଏଫ୍ସି ଅନିକେତ ଯାଦବଙ୍କ ଏକମାତ୍ର ଗୋଲ୍ ବଳରେ ବିଜୟୀ ହୋଇଛି । ଏହା ଦଳର ସପ୍ତମ ମ୍ୟାଚ୍ରେ ଦ୍ୱିତୀୟ ବିଜୟ ହୋଇଥିବା ବେଳେ ସମୁଦାୟ ୧୦ ପଏଣ୍ଟ୍ ସହ ଜେଏଫସି ପଏଣ୍ଟ୍ ଟେବଲ୍ର ପଞ୍ଚମ ସ୍ଥାନକୁ ଉନ୍ନୀତ ହୋଇଛି । ଅନ୍ୟପକ୍ଷରେ ସପ୍ତମ ମ୍ୟାଚ୍ରେ ନର୍ଥଇଷ୍ଟ୍ ତା ‘ର ପ୍ରଥମ ପରାଜୟ ବରଣ କରିଛି। ଦଳ ୨ଟି ବିଜୟ ଓ ୪ଟି ଡ୍ର’ ସହ ସର୍ବମୋଟ ୧୦ ପଏଣ୍ଟ୍ ପାଇ ଟେବଲରେ ଚତୁର୍ଥ ସ୍ଥାନରେ ରହିଛି । ହିରୋ ଆଇଏସ୍ଏଲ୍ର ଏହି ୫ଶହତମ ମ୍ୟାଚ୍ରେ ଅନିକେତଙ୍କ ଗୋଲ୍ ହିଁ ଉଭୟ ଦଳ ମଧ୍ୟରେ ଏକମାତ୍ର ଫରକ୍ ଥିଲା ।
ଅନ୍ୟପକ୍ଷରେ ଜେଏଫ୍ସିର ଗୋଲ୍କିପର୍ ଟିପି ରେହନିଶ୍ ଏକ ପେନାଲ୍ଟି କିକ୍କୁ ବଞ୍ଚାଇ ନର୍ଥଇଷ୍ଟ୍ ବିପକ୍ଷରେ ଦଳର ବିଜୟ ଧାରା ଜାରି ରଖିବାରେ ସହାୟକ ହୋଇଛନ୍ତି । ପ୍ରଥମାର୍ଦ୍ଧଟି ଗୋଲ୍ଶୂନ୍ୟ ଭାବେ ଶେଷ ହେବା ପରେ ଦ୍ୱିତୀୟାର୍ଦ୍ଧରେ ୫୩ତମ ମିନିଟ୍ରେ ଅନିକେତ ଗୋଲ୍ ଦେଇଥିଲେ । ପ୍ରତିପକ୍ଷ ନର୍ଥଇଷ୍ଟ୍ର ଆଇଜାକ୍ ଭାନମାଲସାନଓ୍ବା ଓ ଜ୍ୟାକିଚାନ୍ଦ ସିଂଙ୍କ ଦୁର୍ବଳତାର ସୁଯୋଗ ନେଇ ଅନିକେତ ଏହି ଗୋଲ୍ଟି ଦେଇଥିଲେ । ୬୦ତମ ମିନିଟ୍ରେ ଜେଏଫ୍ସିର ଏଜେ ପ୍ରତିପକ୍ଷ ଦଳର ବେଞ୍ଜାମିନ୍ ଲାମ୍ବୋଟ୍କୁ ତଳେ ପକାଇଦେବା ଫଳରେ ନର୍ଥଇଷ୍ଟ୍କୁ ପେନାଲ୍ଟି ମିଳିଥିଲା । କିନ୍ତୁ ସିଲାଙ୍କ ଶଟ୍କୁ ରୋକିଦେଇ ଦଳର ଅଗ୍ରଣୀକୁ ବଜାୟ ରଖିଥିଲେ ରେହନିଶ୍ । ୭୯ତମ ମିନିଟ୍ରେ ଜେଏଫ୍ସି ଅଗ୍ରଣୀକୁ ଦ୍ୱିଗୁଣିତ କରିବାର ସୁଯୋଗ ପାଇଥିଲେ ହେଁ ଭାଗ୍ୟ ସାଥ୍ ଦେଇ ନ ଥିଲା । ଶେଷରେ ଟିମ୍ ଦୁଇଟି ପରାଜୟ ପରେ ବିଜୟ ଧାରାକୁ ଫେରିଛି । ଶନିବାର ପ୍ରତିଯୋଗିତାର ୩୩ତମ ମ୍ୟାଚ୍ ଫତୋର୍ଦାଠାରେ ଏଫ୍ସି ଗୋଆ ଓ ଚେନ୍ନାୟିନ୍ ଏଫ୍ସି ମଧ୍ୟରେ ଖେଳାଯିବ ।
