ଆଇପିଏଲ-୧୫: ବାକି ମ୍ୟାଚ୍‌ରୁ ଜାଡେଜା ବାଦ୍

ମୁମ୍ବାଇ: ଚଳିତ ଆଇପିଏଲ୍ ପଞ୍ଚଦଶ ସିଜନ୍‌ର ପ୍ଲେଅଫ୍‌ରେ ପହଞ୍ଚିବା ପାଇଁ ସଂଘର୍ଷ ଚଳାଇଥିବା ଚେନ୍ନାଇ ସୁପର୍ କିଙ୍ଗ୍‌ସ (ସିଏସ୍‌କେ)କୁ ଆଉ ଏକ ଧକ୍କା ଲାଗିଛି । ଟିମ୍‌ର ଅଲ୍‌ରାଉଣ୍ଡର୍ ରବୀନ୍ଦ୍ର ଜାଡ଼େଜା ଆହତ କାରଣରୁ ଲିଗ୍‌ର ବାକି ମ୍ୟାଚ୍‌ରୁ ବାଦ୍ ପଡ଼ିଛି । ରିପୋର୍ଟ ଅନୁସାରେ ରୟାଲ୍ ଚାଲେଞ୍ଜର୍ସ ବାଙ୍ଗାଲୋର ବିପକ୍ଷ ମ୍ୟାଚ୍‌ରେ ଫିଲ୍ଡିଂ କରୁଥିବା ସମୟରେ ତାଙ୍କୁ ଆଘାତ ଲାଗିଥିଲା । ଏହି କାରଣରୁ ସେ ଦିଲ୍ଲୀ କ୍ୟାପିଟାଲ୍ସ ବିପକ୍ଷ ପ୍ଲେଇଙ୍ଗ୍ ଇଲେଭେନ୍‌ରୁ ମଧ୍ୟ ବାଦ୍ ପଡ଼ିଥିଲେ । ଚଳିତ ସିଜନ୍‌ରେ ଚେନ୍ନାଇର ବର୍ତ୍ତମାନ ୮ ପଏଣ୍ଟରେ ଥିବାବେଳେ ଏହାର ଆଉ ତିନିଟି ମ୍ୟାଚ୍ ବାକି ରହିଛି । ଏପରି ସ୍ଥିତିରେ ଟିମ୍‌କୁ ବାକି ସମସ୍ତ ମ୍ୟାଚ୍ ଜିତି ୧୪ ପଏଣ୍ଟ୍ ହାସଲ କରିବାକୁ ହେବ । ଏହା ସହିତ ବାକି ଟିମ୍‌ଙ୍କ ଫଳାଫଳ ଉପରେ ନିର୍ଭଶୀଳ ହେବାକୁ ପଡ଼ିବ । ଚଳିତ ଆଇପିଏଲ୍ ସିଜନ୍ ଆରମ୍ଭର ଦୁଇଦିନ ପୂର୍ବରୁ ମହେନ୍ଦ୍ର ସିଂହ ଧୋନି ଚେନ୍ନାଇର ନେତୃତ୍ୱ ଦାୟିତ୍ୱ ଜାଡ଼େଜାଙ୍କୁ ପ୍ରଦାନ କରିଥିଲେ । ମାତ୍ର ଆଠଟି ମ୍ୟାଚ୍ ପରେ ଜାଡ଼େଜା ପୁଣିଥରେ ଧୋନିଙ୍କୁ ନେତୃତ୍ୱ ହସ୍ତାନ୍ତର କରିଥିଲେ । ଜାଡ଼େଜାଙ୍କ ନେତୃତ୍ୱରେ ଚେନ୍ନାଇକୁ ମାତ୍ର ଦୁଇଟି ମ୍ୟାଚ୍‌ରେ ବିଜୟ ମିଳିଥିଲା । ଅନ୍ୟପକ୍ଷରେ ଚଳିତ ସିଜିନ୍‌ରେ ଜାଡ଼େଜା ସିଏସ୍‌କେ ପାଇଁ ବହୁ ମହଙ୍ଗା ସାବ୍ୟସ୍ତ ହୋଇଛନ୍ତି । ଫ୍ରାଞ୍ଚାଇଜ୍ ତାଙ୍କୁ ୧୬ କୋଟି ଟଙ୍କାରେ ରିଟେନ୍ କରିଥିଲା । କେବଳ ଏତିକି ନୁହେଁ ତାଙ୍କୁ ନେତୃତ୍ୱ ମଧ୍ୟ ପ୍ରଦାନ କରିଥିଲା । ମାତ୍ର ତାଙ୍କ ପ୍ରଦର୍ଶନ ଆଶାନୁରୂପ ନଥିଲା । ତାଙ୍କ ନେତୃତ୍ୱରେ ଟିମ୍ ଆଠ ମ୍ୟାଚ୍‌ରୁ ଛଅଟିରେ ପରାଜିତ ହୋଇଥିବା ବେଳେ ସେ ୧୦ଟି ମ୍ୟାଚ୍‌ରୁ କେବଳ ୧୧୬ ରନ୍ କରିଥିଲେ, ଯାହା ମଧ୍ୟରେ ଅପରାଜିତ ୨୬ ରନ୍ ସର୍ବଶ୍ରେଷ୍ଠ ଥିଲା । ସେହିପରି ବୋଲିଂରେ ସେ ମାତ୍ର ୫ଟି ୱିକେଟ୍ ହାସଲ କରିଥିଲେ ।