ନୂଆଦିଲ୍ଲୀ: ପାକିସ୍ତାନ ତେହେରିକ୍-ଏ-ଇନସାଫ୍ ପାର୍ଟି ସରକାରଙ୍କ ସହ ଅଟକି ରହିଥିବା ଆଲୋଚନାକୁ ସଂସଦୀୟ କମିଟି ମାଧ୍ୟମରେ ପୁଣି ଆରମ୍ଭ କରିବା ପାଇଁ ପ୍ରଧାନମନ୍ତ୍ରୀ ଶାହବାଜ ସରିଫଙ୍କ ପ୍ରସ୍ତାବକୁ ପ୍ରତ୍ୟାଖ୍ୟାନ କରିଛି। ଜିଓ ନ୍ୟୁଜ୍ ଅନୁଯାୟୀ, ଗୁରୁବାର ଦିନ ଏକ କ୍ୟାବିନେଟ୍ ବୈଠକରେ ଭାଷଣ ଦେବା ସମୟରେ ଶାହବାଜ ସରିଫ କହିଥିଲେ ଯେ, ସରକାର ଇମ୍ରାନ ଖାନଙ୍କ ଦଳ ସହିତ ଆଲୋଚନାକୁ ଆଗକୁ ବଢ଼ାଇବା ପାଇଁ ଏକ ସଂସଦୀୟ କମିଟି ଗଠନ କରିବାକୁ ପ୍ରସ୍ତୁତ। ଇମ୍ରାନ ଖାନଙ୍କ ପାର୍ଟି ୯ ମଇ, ୨୦୨୩ ଏବଂ ୨୬ ନଭେମ୍ବର, ୨୦୨୪ ଘଟଣାର ତଦନ୍ତ ପାଇଁ ନ୍ୟାୟିକ କମିଶନ ଗଠନ ନ ହେବା ନେଇ ଆଲୋଚନା ବନ୍ଦ କରିଛି ।
ଇମ୍ରାନଙ୍କ ଦଳର ଜଣେ ଶୀର୍ଷ ନେତା ଏବଂ ନ୍ୟାସନାଲ୍ ଆସେମ୍ବଲିରେ ବିରୋଧୀ ଦଳ ନେତା ଓମାର ଆୟୁବ ଖାନ କହିଛନ୍ତି, “ଆମେ ପ୍ରଧାନମନ୍ତ୍ରୀ ଶାହବାଜ ସରିଫଙ୍କ ପ୍ରସ୍ତାବକୁ ପ୍ରତ୍ୟାଖ୍ୟାନ କରୁଛୁ।” ଦଳର ଏହି କଥାକୁ ଦୋହରାଇ ଦାବି ଗୁଡ଼ିକ ବିଷୟରେ ଆୟୁବ କହିଛନ୍ତି ଯେ, “ଆମର ଦାବି ସ୍ପଷ୍ଟ।” ସେ ସମସ୍ତ “ରାଜନୈତିକ ବନ୍ଦୀ”ଙ୍କୁ ମୁକ୍ତ କରିବା ପାଇଁ ମଧ୍ୟ ଅପିଲ କରିଛନ୍ତି। ଏକ ବିବୃତ୍ତିରେ, ସରକାରୀ ଆଲୋଚନା କମିଟିର ମୁଖପାତ୍ର ସିନେଟର ଇରଫାନ ସିଦ୍ଦିକି କହିଛନ୍ତି ଯେ, ବିରୋଧୀ ଦଳ ଏକପାଖିଆ ଭାବରେ ଆଲୋଚନାରୁ ଓହରି ଯାଇ ଅଗଣତାନ୍ତ୍ରିକ ଏବଂ ରାଜନୈତିକ ବିରୋଧୀ ମାନସିକତା ପ୍ରଦର୍ଶନ କରିଛି। ଇମ୍ରାନଙ୍କ ଦଳର ଆନ୍ଦୋଳନାତ୍ମକ ରାଜନୀତିକୁ ସମାଲୋଚନା କରି ପିଏମଏଲ-ଏନ ସିନେଟର କହିଛନ୍ତି ଯେ ବିରୋଧୀ ଦଳ ପୂର୍ବରୁ ଧାରଣା ଏବଂ ଲମ୍ବା ପ୍ରଦର୍ଶନ ମାଧ୍ୟମରେ ଏହାର ଉଦ୍ଦେଶ୍ୟ ହାସଲ କରିନାହିଁ ଏବଂ ଏଥର ମଧ୍ୟ କରିବ ନାହିଁ। ଦେଶରେ ରାଜନୈତିକ ଉତ୍ତେଜନା ହ୍ରାସ କରିବା ପାଇଁ ଆଲୋଚନାର ଆବଶ୍ୟକତା ଉପରେ ଗୁରୁତ୍ୱାରୋପ କରି ସିଦ୍ଦିକି କହିଛନ୍ତି ଯେ ପ୍ରତ୍ୟେକ ସମସ୍ୟାର ସମାଧାନ ଗମ୍ଭୀର ଏବଂ ଅର୍ଥପୂର୍ଣ୍ଣ ଆଲୋଚନା।
