ଇମ୍ରାନ ଛାଡପତ୍ର ଦେବା ପରେ ବି ଲୋଭ ନଥିଲା, ପତ୍ନୀଙ୍କ ପାଖରୁ ଆଣିନଥିଲେ କୌଣସି ସମ୍ପତ୍ତି

ଲାହୋର: ନିଜ ଘର ଖର୍ଚ୍ଚ ପାଇଁ ଦଳୀୟ ନେତାଙ୍କଠାରୁ ମାସକୁ ୫୦ ଲକ୍ଷ ଟଙ୍କା ନେଉଛନ୍ତି ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ । ନିଜର ରାଜନୈତିକ ସହଯୋଗୀମାନଙ୍କଠାରୁ ପ୍ରତିମାସରେ ଲକ୍ଷ ଲକ୍ଷ ଟଙ୍କା ସେ ନେଉଛନ୍ତି । ଇମ୍ରାନ ଖାନଙ୍କ ପାର୍ଟି ପିଟିଆଇର ପୂର୍ବତନ ସଦସ୍ୟ ଅବସରପ୍ରାପ୍ତ ବିଚାରପତି ୱାଜିହୁଦ୍ଦିନ ଅହମ୍ମଦ ଏହା କହିବା ପରେ ପାକିସ୍ତାନ ରାଜନୀତିରେ ଜୋରଦାର ଚର୍ଚ୍ଚା ଆରମ୍ଭ ହୋଇଯାଇଛି । ଇମ୍ରାନଙ୍କ ଘନିଷ୍ଠ ସହଯୋଗୀ ଜାହାଙ୍ଗୀର ଖାନ ତାରିନଙ୍କୁ ନିୟମିତ ଭାବେ ଇମ୍ରାନଙ୍କୁ ଏହି ଟଙ୍କା ଦେଉଥିବାର ୱାଜିହୁଦ୍ଦିନ କହିଛନ୍ତି । ତେବେ ଏହି ବୟାନ ପରେ ଇମ୍ରାନଙ୍କ ଓକିଲାତି ପାଇଁ ସାମ୍ନାକୁ ଆସିଛନ୍ତି ପାକିସ୍ତାନର ସୂଚନା ମନ୍ତ୍ରୀ ଫୱାଦ ଚୌଧୁରୀ । ଫୱାଦ କହିଛନ୍ତି ଯେ ଯଦି ଇମ୍ରାନଙ୍କର ଟଙ୍କା ପ୍ରତି ଲୋଭ ଥାଆନ୍ତା, ତେବେ ପ୍ରଥମ ପତ୍ନୀ ତଥା ମୂଳ ବ୍ରିଟିଶ ନାଗରିକ ଜମିମା ଗୋଲଡସ୍ମିଥଙ୍କ ଠାରୁ ଛାଡପତ୍ର ନେବା ପରେ ସେ କୋଟିପତି ହୋଇଯାଇଥାନ୍ତେ । କାରଣ ବ୍ରିଟିଶ ଆଇନ ଅନୁସାରେ ପତ୍ନୀଙ୍କ ଠାରୁ ଛାଡପତ୍ର ନେବା ପରେ ତାଙ୍କୁ ଅଧା ସମ୍ପତ୍ତି ମିଳିଯାଇଥାନ୍ତା । ଫୱାଦ କହିଛନ୍ତି ଯେ ଇମ୍ରାନଙ୍କର ପ୍ରଥମ ପତ୍ନୀ ବା ବେଗମ ଜମିମା ଗୋଲଡ ସ୍ମିଥ ଥିଲେ । ଜମିମା ଜଣେ ଧନୀ ଘରର ଝିଅ ହୋଇଥିବାବେଳେ ଯଦି ଇମ୍ରାନଙ୍କର ଲୋଭ ଥାଆନ୍ତା ତେବେ ଛାଡପତ୍ର ପରେ ଜମିମାଙ୍କ ସମ୍ପତ୍ତିର ୫୦ ପ୍ରତିଶତ ତାଙ୍କୁ ମିଳିଥା’ନ୍ତା । ଯଦି ଇମ୍ରାନ ୫୦ ପ୍ରତିଶତ ସମ୍ପତ୍ତି ଆଣିଥା’ନ୍ତେ ତେବେ କୋଟିପତି ହୋଇଯାଇଥା’ନ୍ତେ । ସୂଚନା ଥାଉ କି, ଜମିମାଙ୍କୁ ଇମ୍ରାନ ୧୯୯୫ ମସିହାରେ ବିବାହ କରିଥିଲେ ଓ ୨୦୦୪ରେ ଉଭୟଙ୍କ ମଧ୍ୟରେ ଛାଡପତ୍ର ହୋଇଯାଇଥିଲା । ଏହା ପରେ ୨୦୧୫ ମସିହାରେ ଇମ୍ରାନ ଖାନ ବ୍ରିଟିଶ ପାକିସ୍ତାନୀ ସାମ୍ବାଦିକା ରେହମ ଖାନଙ୍କ ସହ ତାଙ୍କର ଦ୍ୱିତୀୟ ବିବାହ ହୋଇଥିଲା । ନଅ ମାସ ସାଂସାରିକ ଜୀବନ ଅତିବାହିତ ପରେ ୩୦ ଅକ୍ଟୋବର ୨୦୧୫ ରେ ଉଭୟଙ୍କର ଛାଡପତ୍ର ହୋଇଥିଲା । ୨୦୧୮ ରେ, ସେ ବୁଶ୍ରା ମାନେକାଙ୍କୁ ବିବାହ କରିଥିଲେ ।