ଛତିଶଗଡ: ବିଜାପୁରରେ ଆଇଇଡି ବିସ୍ଫୋରଣ । ଏହି ବିସ୍ଫୋରଣରେ ୧୧ ଜଣ ସୁରକ୍ଷାକର୍ମୀ ଆହତ ହୋଇଛନ୍ତି । ସୂଚନା ଅନୁସାରେ, ରବିବାର ଦିନ ନକ୍ସଲ ବିରୋଧୀ ଅଭିଯାନ ସମୟରେ ଛତିଶଗଡ ବିଜାପୁର ଜିଲ୍ଲାର କାରେଗୁଟ୍ଟା ପାହାଡର ଜଙ୍ଗଲରେ ସିରିଜ୍ ଆଇଇଡି ବିସ୍ଫୋରଣ ହୋଇଥିଲା । ଏହି ବିସ୍ଫୋରଣରେ ୧୧ ଜଣ ସୁରକ୍ଷାକର୍ମୀ ଆହତ ହୋଇଥିବା ବିଜାପୁର ପୋଲିସ ସୋମବାର ଦିନ ନିଶ୍ଚିତ କରିଛି । ପୋଲିସର ସୂଚନା ଅନୁଯାୟୀ, ଆହତ ସୁରକ୍ଷା କର୍ମୀଙ୍କ ମଧ୍ୟରୁ ୧୦ ଜଣ ରାଜ୍ୟ ପୋଲିସର ଏକ ସ୍ୱତନ୍ତ୍ର ୟୁନିଟ୍ ଜିଲ୍ଲା ରିଜର୍ଭ ଗାର୍ଡ (ଡିଆରଜି)ର ଥିଲେ ଏବଂ ଜଣେ କେନ୍ଦ୍ରୀୟ ରିଜର୍ଭ (ସିଆରପିଏଫ)ର କୋବ୍ରା ବାଟାଲିୟନର ଥିଲେ । ଆହତ କୋବ୍ରା ସୈନିକଙ୍କ ନାମ ସବ-ଇନ୍ସପେକ୍ଟର ରୁଦ୍ରେଶ ସିଂହ, ଯିଏ କୋବ୍ରାର ୨୧୦ତମ ବାଟାଲିୟନରେ ନିଯୁକ୍ତ ଥିଲେ ।
ଅଧିକାରୀମାନେ କହିଛନ୍ତି ଯେ ରୁଦ୍ରେଶ ସିଂହ ଏବଂ ଦୁଇ ଜଣ ଡିଆରଜି ସୈନିକଙ୍କ ଗୋଡରେ ଗୁରୁତର ଆଘାତ ଲାଗିଛି ଏବଂ ଅନ୍ୟ ତିନି ଜଣ ସୁରକ୍ଷା କର୍ମୀଙ୍କ ଆଖିରେ ପେଲେଟ୍ ବାଜିଛି । ସମସ୍ତ ଆହତ ସୈନିକଙ୍କୁ ଅଧିକ ଚିକିତ୍ସା ପାଇଁ ରାୟପୁରର ଏକ ହସ୍ପିଟାଲରେ ଭର୍ତ୍ତି କରାଯାଇଛି, ସେଠାରେ ସେମାନଙ୍କର ଚିକିତ୍ସା ଚାଲିଛି । ପୋଲିସ କହିଛି ଯେ କରରେଗୁଟ୍ଟା ପାହାଡ଼ ଅଞ୍ଚଳକୁ ଦୀର୍ଘ ଦିନ ଧରି ନକ୍ସଲବାଦୀଙ୍କ ଗଡ଼ ଭାବରେ ବିବେଚନା କରାଯାଇ ଆସୁଛି । ଗତ ବର୍ଷ ନଭେମ୍ବରରେ, ସୁରକ୍ଷା ବାହିନୀ ଉସୁର ଥାନା ଅଞ୍ଚଳ ଅନ୍ତର୍ଗତ ତାଡପାଲା ଗାଁରେ ଏକ ଶିବିର ସ୍ଥାପନ କରିଥିଲେ, ଯାହାକୁ ମାଓବାଦୀଙ୍କ ପାଇଁ ଏକ ନିରାପଦ ଆଶ୍ରୟସ୍ଥଳ ଭାବରେ ବିବେଚନା କରାଯାଉଥିଲା ।
