ସ୍ତ୍ରୀକୁ ହତ୍ୟା ଉଦ୍ୟମ ଅଭିଯୋଗରେ ସ୍ୱାମୀ ଗିରଫ

ବ୍ରହ୍ମପୁର: ସ୍ତ୍ରୀ’ଙ୍କୁ ନିର୍ଯାତନା ଦେବା ସହ ହତ୍ୟା ଉଦ୍ୟମ କରିଥିବା ଅଭିଯୋଗରେ ମହିଳା ଥାନା ପୁଲିସ ସ୍ୱାମୀଙ୍କୁ ଗିରଫ କରିଛି । ଗିରଫ ଅଭିଯୁକ୍ତ ଜଣଙ୍କ ଚିକିଟି କରବାଲୁଆ ଗ୍ରାମର ଦିଗନ୍ତ ବେହେରା ବୋଲି ପୁଲିସ କହିଛି । ସୂଚନାଯୋଗ୍ୟ ଯେ, ଗତ ୨୦୨୦ ମଇ ୫ ତାରିଖରେ କେ.ନୁଆଗାଁ ଥାନା ଅନ୍ତର୍ଗତ ଚିକିଟି କରବାଲୁଆ ଗ୍ରାମର ଅଭିଯୁକ୍ତ ଦିଗନ୍ତ ବେହେରାଙ୍କୁ ସେହି ଗ୍ରମର ସୁନିତା ଜାନୀ ବିବାହ କରିଥିଲେ । ବର୍ତ୍ତମାନ ସେମାନେ ଗୋଳନ୍ଥରା ଅଧିନ ଶାସନ ପଦର ଗ୍ରାମରେ ଏକ ଭଡ଼ା ଘରେ ରହୁଥିବା ବେଳେ ତାଙ୍କର ଏକ ଝିଅ ରହିଛି । ବିଭିନ୍ନ ସମୟରେ ସୁନିତାଙ୍କୁ ତାଙ୍କ ସ୍ୱାମୀ ମାନସିକ ଓ ଶାରୀରିକ ନିର୍ଯାତନା ଦେଉଥିଲେ । କିନ୍ତୁ ଗତ ସୋମବାର ରାତିରେ ସ୍ୱାମୀ ଦିଗନ୍ତ ମଦ୍ୟପାନ କରି ମରଣାନ୍ତକ ଆକ୍ରମଣ କରିଥିଲେ । ଏ ନେଇ ସୁନିତା ଓ ତାଙ୍କ ବାପା ମହିଳା ଥାନାରେ ଅଭିଯୋଗ କରିଥିଲେ । ଅଭିଯୋଗ ପରେ ପୁଲିସ ଏହି ଘଟଣାର ତଦନ୍ତ କରି ଅଭିଯୁକ୍ତ ସ୍ୱାମୀଙ୍କୁ ଗିରଫ କରିଥିଲା ବୋଲି କହିଛି ।