ଖଲ୍ଲିକୋଟ: ଖଲ୍ଲିକୋଟ ଥାନା ଅନ୍ତର୍ଗତ କେଶପୁର ପଞ୍ଚାୟତର ବେଲପଡା ଗ୍ରାମରେ ପୂର୍ବ ଶତ୍ରୁତାକୁ କେନ୍ଦ୍ର କରି ସ୍ୱାମୀ ସ୍ତ୍ରୀଙ୍କ ଉପରେ ଆକ୍ରମଣ ହୋଇଥିବା ନେଇ ଥାନାରେ ଅଭିଯୋଗ ହୋଇଛି । ଏହି ଘଟଣାରେ ପୁଲିସ ୪ ଜଣ ମହିଳାଙ୍କୁ ଗିରଫ କରି କୋର୍ଟ ଚାଲାଣ କରିଛି । ପ୍ରାପ୍ତ ବିବରଣୀରୁ ପ୍ରକାଶ ଯେ ବେଲପଡା ଗ୍ରାମର ଦୁଇ ପରିବାର ମଧ୍ୟରେ ଦୀର୍ଘ ଦିନ ଧରି ବିବାଦ ଲାଗି ରହିଥିଲା । ରବିବାର ବେଲପଡା ଗ୍ରାମର ହୃଷିକେଶ ବେହେରା ସମ୍ପର୍କୀୟ ଭାଇ ରବୀନ୍ଦ୍ର ବେହେରାଙ୍କ ସହ ମିଶି ଚିଲିକାରୁ ଫେରୁଥିଲେ । ସେହି ଗ୍ରାମର ତିନି ଭାଇ ବିନାୟକ ବେହେରା, ସୁବାଷ ବେହେରା, କାର୍ତ୍ତିକ ବେହେରା ଏବଂ ତାଙ୍କର ପିଲାମାନେ ଟୁନା ବେହେରା, ବିଦୁ ବେହେରା ଓ ଆକାଶ ବେହେରା ବିଭିନ୍ନ ମାରଣାସ୍ତ୍ର ଧରି ଗ୍ରାମର ଚିଲିକା କୂଳ କାଳିଜାଇ ମଣ୍ଡପଠାରେ ଲୁଚି ରହିଥିଲେ ।
ହୃଷିକେଶ ଓ ରବୀନ୍ଦ୍ର ସେଠାରେ ପହଞ୍ôଚବା ମାତ୍ରେ ତାଙ୍କୁ ଘେରିଯାଇ ଆକ୍ରମଣ କରିଥିଲେ । ଆକ୍ରମଣରେ ହୃଷିକେଶଙ୍କ ହାତ, ଗୋଡ଼ ଓ କାନ୍ଧରେ ଆଘାତ ଲାଗିଥିଲା । ଖବର ପାଇ ହୃଷିକେଶଙ୍କ ସ୍ତ୍ରୀ ତଅପୋଇ ସେଠାରେ ପହଞ୍ôଚବାରୁ ତାଙ୍କ ଉପରେ ମଧ୍ୟ ଆକ୍ରମଣ କରିଥିଲେ ଅଭିଯୁକ୍ତମାନେ । ଆକ୍ରମଣରେ ତଅପୋଇ ମଧ୍ୟ ଆହତ ହୋଇଥିଲେ । ଏହାପରେ ଅଭିଯୁକ୍ତମାନେ ହୃଷିକେଶଙ୍କ ଘର ସମ୍ମୁଖରେ ଥିବା ଅଟୋ (ନଂ -ଓଡ଼ି୦୭ଜେଡ-୫୯୭୧)କୁ ସମ୍ପୂର୍ଣ୍ଣ ଭାବେ ଭାଙ୍ଗି ଦେଇଥିଲେ । ଏ ସମ୍ପର୍କରେ ଖଲ୍ଲିକୋଟ ଥାନାରେ ଅଭିଯୋଗ ହେବା ପରେ ପୁଲିସ୍ ମାମଲା ରୁଜୁ କରି ଥାନା ଅଧିକାରୀ ଜଗନ୍ନାଥ ମଲ୍ଲିକ ଘଟଣାର ତଦନ୍ତ କରିଛନ୍ତି । ଏ ସମ୍ପର୍କରେ ୪ ଜଣ ମହିଳା ଅଭିଯୁକ୍ତ ଜେମା ବେହେରା, ଶାନ୍ତି ବେହେରା, ଫୁଲ ବେହେରା ଓ ସୁର ବେହେରାଙ୍କୁ ପୁଲିସ ଗିରଫ କରି କୋର୍ଟ ଚାଲାଣ କରିଥିବା ବେଳେ ସେମାନଙ୍କ ସ୍ୱାମୀ ମାନେ ଫେରାର ହୋଇଯାଇଥିବା ଥାନା ଅଧିକାରୀ ସୂଚନା ଦେଇଛନ୍ତି ।
