ମୁମ୍ବାଇ: ମହାରାଷ୍ଟ୍ରର ପାଲଘର ଜିଲ୍ଲାରେ ବାଇସର ଅଞ୍ଚଳରେ ଅଭାବନୀୟ ଘଟଣା ଘଟିଛି । ଏମଆଇଡିସି ସ୍ଥିତ ଭଗୋରିୟା କେମିକାଲ କାରଖାନାରେ ବୟଲର ଫାଟିବା କାରଣରୁ ଭୀଷଣ ଅଗ୍ନିକାଣ୍ଡ ଘଟିଛି । ଫଳରେ ଭିତରେ କାମ କରୁଥିବା ୩ ଜଣ କର୍ମଚାରୀ ଜୀବନ୍ତ ଜଳିଯାଇଛନ୍ତି । ଅଗ୍ନିକାଣ୍ଡରେ ୧୨ ଜଣ ଗୁରୁତର ଆହତ ହୋଇଥିବା ବେଳେ ସେମାନଙ୍କୁ ଉଦ୍ଧାର କରାଯାଇ ହସ୍ପିଟାଲରେ ଭର୍ତ୍ତି କରାଯାଇଛି ।
ମୃତକଙ୍କ ସଂଖ୍ୟା ବଢିପାରେ ବୋଲି ଆଶଙ୍କା କରାଯାଉଛି । କାରଣ କାରଖାନା ମଧ୍ୟରେ ଆଉ କିଛି କର୍ମଚାରୀ ମଧ୍ୟ କାମ କରୁଥିଲେ ଯେଉଁମାନଙ୍କର କି କିଛି ଖୋଜ୍ ଖବର ନାହିଁ । କେମିକାଲ ଫ୍ୟାକ୍ଟ୍ରିରେ ନିଆଁ ଲାଗିବା ପରେ ଚାହୁଁଚାହୁଁ ଚାରିଆଡେ ବ୍ୟାପିଯାଇଥିଲା । ତୁରନ୍ତ ଏ ନେଇ ଅଗ୍ନିଶମ ବାହିନୀକୁ ଖବର ଦିଆଯାଇଥିଲା । ଅଗ୍ନିକାଣ୍ଡର ମାତ୍ରା ଏତେ ଭୟଙ୍କର ଥିଲା ନିଆଁକୁ ଆୟତ କରିବା ସମ୍ଭବପର ହୋଇପାରିନଥିଲା । ସ୍ଥାନୀୟ ପୋଲିସ, ଅଗ୍ନିଶମ ବାହିନୀ ଏବଂ ନିକଟରେ ଥିବା କିଛି ବ୍ୟକ୍ତି ଉଦ୍ଧାର କାର୍ଯ୍ୟରେ ଲାଗିଥିବା ଜଣାପଡିଛି ।
