ଧଉଳି : ଏକ ଘରୋଇ ଶିକ୍ଷାନୁଷ୍ଠାନରେ ଚାକିରି କରାଇଦେବାକୁ କହି ଲକ୍ଷାଧିକ ଟଙ୍କା ଠକି ନେଇଥିବା ଜଣେ ଠକ ଶିକ୍ଷକକୁ ଧଉଳି ଥାନା ପୁଲିସ ଗିରଫ କରି ଅଦାଲତ ଚାଲାଣ କରିଛି । ସମ୍ପୃକ୍ତ ଶିକ୍ଷକ ହେଲେ ଭଦ୍ରକ ଚାନ୍ଦବାଲି ଥାନା ନୟାହାଟ ଗ୍ରାମର ଅତିସ କୁମାର ଓଝା । ଖବର ନେବାରେ ଜଣାପଡିଛି ଯେ ଅତିସ ଭୁବନେଶ୍ୱରସ୍ଥିତ ୟଙ୍ଗ୍ଫୋନିକ୍ସ ନାମକ ଏକ ଘରୋଇ ବିଦ୍ୟାଳୟରେ ଶିକ୍ଷକତା କରୁଛନ୍ତି । ଉକ୍ତ ବିଦ୍ୟାଳୟରେ ଶିକ୍ଷକତା ଚାକିରି କରାଇଦେବା ପାଇଁ ଅଭିଯୋଗକାରୀ ନିରଜ କୁମାର ସିଂହଙ୍କଠାରୁ ଅତିସ ଗତ ୨୦୨୧ ଅକ୍ଟୋବର ମାସ ମଧ୍ୟରେ ମୋଟ ୨ଲକ୍ଷ ୩୩ହଜାର ୩ଶହ ଟଙ୍କା ନେଇଥିଲେ ।
ମାତ୍ର ପରମୁହୂର୍ତ୍ତରେ ଚାକିରି ଦେଇନଥିଲେ । ଚାକିରି ନ ହେବାରୁ ଆଶାୟୀ ଶିକ୍ଷକ ଶ୍ରୀ ସିଂହ ଅଭିଯୁକ୍ତ ଅତିସଙ୍କୁ ଟଙ୍କା ଫେରସ୍ତ ମାଗିଥିଲେ । ମାତ୍ର ଏହି ଟଙ୍କା ଫେରାଇବା ବଦଳରେ ଅତିସ ଓଲଟି ଆତ୍ମହତ୍ୟା କରିଦେବାର ଧମକ ଦେଇଥିଲେ । ଏନେଇ ଅଭିଯୋଗକାରୀ ଶ୍ରୀ ସିଂହ ଥାନାରେ ଅଭିଯୋଗ କରିଥିଲେ । ପୁଲିସ ଅତିସଙ୍କୁ ଉକ୍ତ ଶିକ୍ଷାନୁଷ୍ଠାନରୁ ଗିରଫ କରିଥିଲା ଓ ପଚରା ଉଚରା ପରେ ସେ ନିଜର ଦୋଷ ସ୍ୱୀକାର କରିବା ସହ ପୂର୍ବରୁ ମଧ୍ୟ ବିଭିନ୍ନ ସଂସ୍ଥାରେ ଚାକିରି କରାଇଦେବାକୁ କହି ଭିନ୍ନ ଭିନ୍ନ ଅଞ୍ଚଳର ଯୁବକ/ଯୁବତୀଙ୍କ ଠାରୁ ପ୍ରାୟ ୧୨ଲକ୍ଷ ୮୩ହଜାର ଟଙ୍କା ଠକି ନେଇଥିବା ଜଣାପଡ଼ିଛି ।
