ମୁମ୍ବାଇ : ଫିଲ୍ମ ନିର୍ମାତା କମଲ କିଶୋର ମିଶ୍ରାଙ୍କୁ ମୁମ୍ବାଇ ପୋଲିସ ଗିରଫ କରିଛି। ସେ ତାଙ୍କ ପତ୍ନୀ ଜାସ୍ମିନଙ୍କୁ କାରରେ ଧକ୍କା ଦେଇଥିବା ଅଭିଯୋଗ ହୋଇଛି। କମଲଙ୍କ ନାଁରେ ପତ୍ନୀ ଗୁରୁବାର ଦିନ ଅଭିଯୋଗ କରିବା ପରେ ତାଙ୍କୁ ଉପାନ୍ତ ମୁମ୍ବାଇର ଏକ ପୋଲିସ ଷ୍ଟେସନରେ ପଚରାଉଚରା ପାଇଁ ଅଣାଯାଇଛି। ଜାସ୍ମିନ ଅଭିଯୋଗ କରିଛନ୍ତି ଯେ ନିର୍ମାତା ତାଙ୍କୁ ଏକ କାରରେ ଧକ୍କା ଦେଇଥିଲେ ଏବଂ ତାଙ୍କୁ ଜୀବନରୁ ମାରିଦେବାକୁ ଚେଷ୍ଟା କରିଥିଲେ।
ସୂଚନା ଅନୁଯାୟୀ, କମଲ କିଶୋର ମିଶ୍ରା ଏବଂ ଅଭିନେତ୍ରୀ ଜାସ୍ମିନ୍ ୯ ବର୍ଷ ପୂର୍ବେ ବିବାହ କରିଥିଲେ। ଜାସ୍ମିନ୍ ଅଭିଯୋଗ କରିଛନ୍ତି ଯେ କମଲ ବର୍ତ୍ତମାନ ଅନ୍ୟ ଜଣେ ମଡେଲଙ୍କ ସହ ସମ୍ପର୍କ ରଖିଛନ୍ତି। ଘଟଣା ଦିନ ଜାସ୍ମିନ୍ ତାଙ୍କ ସ୍ୱାମୀଙ୍କୁ ଖୋଜିବା ପାଇଁ ପାର୍କିଂ ସ୍ଥାନକୁ ଆସିଥିଲେ। ସେଠାରେ ସେ ତାଙ୍କ ସ୍ୱାମୀଙ୍କୁ ଅନ୍ୟ ଜଣେ ମହିଳାଙ୍କ ସହ କାରରେ ବସି ରୋମାନ୍ସ କରୁଥିବାର ଦେଖିଥିଲେ। ତାପରେ ସେ କାରର ୱିଣ୍ଡୋ ବାଡେଇଥିଲେ। ସେ କମଲଙ୍କ ସହ କଥା ହେବାକୁ ତାଙ୍କୁ କିଛି ସମୟ ପାଇଁ ବାହରକୁ ଆସିବାକୁ କହିଥିଲେ।
କିନ୍ତୁ ସେ କାରରକୁ ଜୋର୍ରେ ବୁଲାଇ ତାଙ୍କୁ ଧକ୍କା ଦେଇଥିଲେ । ଯାହାଫଳରେ ଜାସ୍ମିନ୍ ତଳେ ପଡିଗଲେ। କମଲ ତାଙ୍କ ଉପରେ ଗାଡି ଚଢାଇବାକୁ ଚେଷ୍ଟା କରିଥିଲେ, କିନ୍ତୁ ସେ ଅଳ୍ପକେ ବଞ୍ଚି ଯାଇଥିଲେ। ତାଙ୍କ ମୁଣ୍ଡରେ ଆଘାତ ଲାଗିଛି। ପୋଲିସ୍ ଅଧିକାରୀ କହିଛନ୍ତି, ଏହି ଘଟଣା ଅକ୍ଟୋବର ୧୯ ରେ ଅନ୍ଧେରି (ପଶ୍ଚିମ) ରେ ଥିବା ଏକ ଆପାର୍ଟମେଣ୍ଟର ପାର୍କିଂ ସ୍ଥାନରେ ଘଟିଥିଲା। ଜାସ୍ମିନଙ୍କ ଅଭିଯୋଗକୁ ଭିତ୍ତି କରି ଭାରତୀୟ ଦଣ୍ଡବିଧି ସଂହିତା (ଆଇପିସି) ର ସମ୍ପୃକ୍ତ ବିଭାଗ ଅଧୀନରେ ଅବୋଲି ପୋଲିସ ଷ୍ଟେସନରେ ନିର୍ମାତାଙ୍କ ବିରୋଧରେ ଏଫଆଇଆର ପଞ୍ଜିକୃତ ହୋଇଛି।
