ମଧ୍ୟପ୍ରଦେଶ: ମଧ୍ୟପ୍ରଦେଶର ରିବା ଜିଲ୍ଲାରେ ଘଟିଯାଇଛି ଏକ ଅଭାବନୀୟ ଘଟଣା । ଜଣେ ୧୬ ବର୍ଷୀୟ ନାବାଳକ ବିରୋଧରେ ୫୮ ବର୍ଷୀୟା ଜଣେ ମହିଳାଙ୍କୁ ବଳାତ୍କାର ସାଙ୍ଗକୁ ହତ୍ୟା କରିଥିବା ନେଇ ଅଭିଯୋଗ ହୋଇଛି । ଏ ନେଇ ପୋଲିସ ତରଫରୁ ସୂଚନା ଦିଆଯାଇଛି । ଅଭିଯୋଗ ସ୍ୱୀକାର କରିବା ପରେ ଅଭିଯୁକ୍ତକୁ ଗିରଫ କରି ସୁଧାର ଗୃହକୁ ପଠାଇଛି ପୋଲିସ ।
ମିଳିଥିବା ସୂଚନା ଅନୁଯାୟୀ, ଏକ ନିର୍ମାଣାଧୀନ କୋଠାରେ ୫୮ ବର୍ଷୀୟା ମହିଳାଙ୍କ ଶବ ଉଦ୍ଧାର କରାଯାଇଥିଲା । ମହିଳାଙ୍କୁ ପଡୋଶୀ ନାବାଳକ ହତ୍ୟା କରିଥିବା ପୋଲିସ ଫରେନ୍ସିକ ଟିମର ତଦନ୍ତରୁ ଜଣାଯାଇଛି । ତେବେ ହତ୍ୟା ପୂର୍ବରୁ ପୀଡିତାଙ୍କ ମୁହଁରେ ପଲିଥିନ ବ୍ୟାଗ ଓ କପଡା ଦେବା ସହ ରସି ଏବଂ ତାର ସହ ବାନ୍ଧି ଦେଇଥିଲା । କବାଟରେ ମହିଳାଙ୍କୁ ବାନ୍ଧି ବାରମ୍ବାର ମାଡ ମାରିବାରୁ ସେ ବେହୋସ ହୋଇଯାଇଥିଲେ । ଏହାପରେ ନାବାଳକ ମହିଳାଙ୍କୁ ବଳାତ୍କାର କରିଥିବା କହିଛି ପୋଲିସ ।
ଏହାବ୍ୟତୀତ ଅଭିଯୁକ୍ତ ପୀଡିତାଙ୍କୁ ମାରପିଟ କରି ହତ୍ୟା କରିଥିଲା ଅଭିଯୁକ୍ତ ନାବାଳକ । ତେବେ ପରେ ଘରୁ ୧୦୦୦ ଟଙ୍କା ଏବଂ ଗହଣା ଲୁଟ କରି ନେଇଥିବା ଅଭିଯୋଗ ହୋଇଛି । ଅଭିଯୋଗ ପରେ ନାବାଳକକୁ ପଚରାଉଚରା କରିବାରୁ ଦୋଷ ସ୍ୱୀକାର କରିଥିଲା ଅଭିଯୁକ୍ତ । ଏହାପରେ ପୋଲିସ ନାବାଳକ ବିରୋଧରେ ୩୦୨(ହତ୍ୟା) ଏବଂ ୩୭୬(ବଳାତ୍କାର) ଭଳି ମାମଲା ରୁଜୁ କରି ସୁଧାର ଗୃହକୁ ପଠାଇ ଦେଇଛି ।
