ବିଜେପିରେ ମିଶିଲେ ପୂର୍ବତନ ଆଇପିଏସ୍ ବସନ୍ତ ରଥ

ଜମ୍ମୁ : ଏକଦା ନିଜର କର୍ତ୍ତବ୍ୟ ସମ୍ପାଦନ ପାଇଁ ସର୍ବସାଧାରଣରେ ପ୍ରଶଂସାର ପାତ୍ର ପାଲଟିଥିବା ଜମ୍ମୁ-କଶ୍ମୀର କ୍ୟାଡରର ପୂର୍ବତନ ଓଡ଼ିଆ ଆଇପିଏସ୍ ଅଫିସର ବସନ୍ତ ରଥ ଗୁରୁବାର ବିଜେପିରେ ଯୋଗଦେଇଛନ୍ତି । ସେ ଅନ୍‌ଲାଇନରେ ବିଜେପି କର୍ମୀଭାବେ ନାମ ପଞ୍ଜୀକୃତ କରିଥିବାବେଳେ ରାଜନୀତିରେ ସଫଳ ହେବାକୁ ଜନସାଧାରଣଙ୍କ ଆଶୀର୍ବାଦ ଭିକ୍ଷା କରିଛନ୍ତି । ସୂଚନାଯୋଗ୍ୟ ବିଶୃଙ୍ଖଳିତ ଆଚରଣ ଯୋଗୁଁ ବିଗତ ତିନିବର୍ଷ ଧରି ନିଲମ୍ବିତ ହୋଇଥିବା ବସନ୍ତଙ୍କୁ ଚଳିତମାସ ୭ରେ ସରକାରଙ୍କ ପକ୍ଷରୁ ବାଧ୍ୟତାମୂଳକ ଅବସର ଦିଆଯାଇଛି । ତେବେ ତାଙ୍କର ଯୋଗଦାନକୁ ଜମ୍ମୁ-କଶ୍ମୀର ବିଜେପି ରାଜ୍ୟ ଶାଖା ପକ୍ଷରୁ ସମାଲୋଚନା କରାଯାଇଛି । ଦଳୀୟ ମୁଖପାତ୍ର ସିନିଲ ସେଠୀ କହିଛନ୍ତି ଯେ କୌଣସି ବ୍ୟକ୍ତି ଅନଲାଇନ୍‌ରେ ବିଜେପି ସଦସ୍ୟ ହୋଇପାରିବେ । ତେବେ ଦଳୀୟ ହାଇକମାଣ୍ଡ ଏହାକୁ ସ୍ୱୀକୃତି ଦେବାପରେ ହିଁ ସଦସ୍ୟତା ଚୂଡାନ୍ତ ହେବ ବୋଲି ସେ କହିଛନ୍ତି । ବସନ୍ତ ଗତବର୍ଷ ଚାକିରୀରୁ ଇସ୍ତଫା ଦେଇ ବିଜେପି ପ୍ରାର୍ଥୀଭାବେ ନିର୍ବାଚନ ଲଢିବାକୁ ମନସ୍ଥ କରିଥିଲେ ସୁଦ୍ଧା ପରବର୍ତ୍ତୀ ସମୟରେ ନିଷ୍ପତ୍ତି ବଦଳାଇଥିଲେ ।