ଶ୍ରୀନଗର : ଗତକାଲି ଶ୍ରୀନଗର ଉପକଣ୍ଠରେ ଥିବା ଜେଓ୍ବାନ ଅଞ୍ଚଳରେ ଥିବା ପାନ୍ଥା ଛକ ନିକଟରେ ଏକ ପୁଲିସ ବସ ଉପରକୁ ଆତଙ୍କବାଦୀମାନେ ଗୁଳି ଚଳାଇବାରୁ ୨ ଜଣ ପୁଲିସ କର୍ମୀ ସହିଦ ହୋଇଥିବାବେଳେ ୧୨ ଜଣ ଆହତ ହୋଇଥିଲେ। ସମସ୍ତ ଆହତମାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଆହତଙ୍କ ମଧ୍ୟରୁ କେତେକଙ୍କ ଅବସ୍ଥା ସଂକଟାପନ୍ନ ଥିବା ବେଳେ ଆଜି ଆଉ ଜଣେ ପୁଲିସ କର୍ମୀଙ୍କ ମୃତ୍ୟୁ ଘଟିଛି। ଏହାଫଳରେ ମୃତ୍ୟୁସଂଖ୍ୟା ୩ରେ ପହଞ୍ଚିଛି।
ସହିଦ ହୋଇଥିବା ଜମ୍ମୁ-କଶ୍ମୀରର ପୁଲିସ କର୍ମଚାରୀଜଣକ ରମିଜ ଅହମ୍ମଦ ବୋଲି ଜଣାପଡିଛି। ଦୁର୍ଭାଗ୍ୟର କଥା ହେଉଛି ପୁଲିସ ବସଟି ବୁଲେଟ ପ୍ରୁଫ ନଥିଲା ଓ ପୁଲିସମାନଙ୍କ ପାଖରେ ରାଇଫଲ ବଦଳରେ ଥିଲା ଲାଠି ଓ ସିଲଡ୍ । ସେମାନେ ଡ୍ୟୁଟି ସାରି ବାରାକକୁ ଫେରୁଥିଲେ । ସାଧାରଣତଃ ଏପରି ବସ ସହିତ ଏକ ସଶସ୍ତ୍ର ପୁଲିସ ଗାଡ଼ି ଯାଇଥାଏ ।
କିନ୍ତୁ ଗତକାଲି ଏହି ସୁରକ୍ଷା ବ୍ୟବସ୍ଥା କରାଯାଇନଥିଲା । ଏହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଗତ ଶୁକ୍ରବାର ଜମ୍ମୁ ଓ କଶ୍ମୀରର ବାନ୍ଦିପୁରାଠାରେ ଥିବା ଗୁଲସନ ଛକ ନିକଟରେ ଆତଙ୍କବାଦୀମାନେ ପୁଲିସ ଗାଡ଼ି ଉପରକୁ ଗୁଳି ଚଳାଇବାରୁ ୨ ଜଣ ପୁଲିସ କର୍ମଚାରୀ ସହିଦ ହୋଇଥିଲେ । ସହିଦ ହୋଇଥିବା ପୁଲିସ କର୍ମଚାରୀ ହେଲେ ମହମ୍ମଦ ସୁଲତାନ ଓ ଫୟାଜ ଅହମ୍ମଦ ।
