ନୂଆଦିଲ୍ଲୀ : ଗତ ଦୁଇବର୍ଷ ମଧ୍ୟରେ ଭାରତୀୟମାନେ ସନ୍ଦିଗ୍ଧ ଘରୋଇ ଲ୍ୟାବ୍ରେ ପାଖାପାଖି ୭୪ କୋଟି କୋଭିଡ୍ ପରୀକ୍ଷଣ କରିଛନ୍ତି। ଏଥିପାଇଁ ଭାରତୀୟମାନେ ଖର୍ଚ୍ଚ କରିଛନ୍ତି ୭୪ ହଜାର କୋଟି ଟଙ୍କା । ମୋଟ ଉପରେ ୪.୨୦ କୋଟି ଲୋକ କୋଭିଡ୍ ସଂକ୍ରମିତ ହୋଇଛନ୍ତି ଓ ପାଖାପାଖି ୫ ଲକ୍ଷରୁ ଊର୍ଦ୍ଧ୍ୱ ଆକ୍ରାନ୍ତଙ୍କ ମୃତ୍ୟୁ ଘଟିଛି । ଦୀର୍ଘ ଦୁଇବର୍ଷ ଧରି ଭାରତୀୟ ତଥା ସାରା ବିଶ୍ୱ କୋଭିଡ୍ ମହାମାରୀ ଯୋଗୁଁ ସନ୍ତୁଳି ହୋଇଛି । ଦେଶରେ ସ୍ୱାସ୍ଥ୍ୟ ଭିତ୍ତିଭୂମିର ଅଭାବ ତଥା ଘରୋଇ ହସ୍ପିଟାଲ୍ ଓ ବିଶେଷ କରି ଘରୋଇ ସନ୍ଦିଗ୍ଧ ଲ୍ୟାବ୍ଗୁଡ଼ିକ ପରୀକ୍ଷା ବାହାନାରେ ମନମୁତାବକ୍ ଅର୍ଥ ଲୁଟିଛନ୍ତି ।
ନାଗପୁର୍ ସ୍ଥିତ ଉପଭୋକ୍ତା ଅଧିକାର ପ୍ରସଙ୍ଗରେ କାମ କରୁଥିବା ଏକ ଅଣ-ସରକାରୀ ସଂସ୍ଥା ଗ୍ରାହକ-ଭାରତୀ ଦ୍ୱାରା ଜାରି କରାଯାଇଥିବା ତଥ୍ୟରୁ ଜଣାପଡ଼ିଛି ଯେ ଆର୍ଟି-ପିସିଆର୍, ର୍ୟାଟ୍, ଟ୍ରୁନ୍ୟାଟ୍, ସିବିନ୍ୟାଟ୍ ତଥା ଅନ୍ୟାନ୍ୟ ଟେଷ୍ଟ୍ ଯାହା ସମ୍ପ୍ରତି ଦେଶର ୩,୨୫୫ ସ୍ୱୀକୃତିପ୍ରାପ୍ତ ଲ୍ୟାବ୍ (ଘରୋଇ-୧,୮୪୪ ଓ ସରକାରୀ ୧,୪୧୧) ଲ୍ୟାବ୍ରେ କରାଯାଉଛି । ଏହି ୩,୨୫୫ ଲ୍ୟାବ୍ ମଧ୍ୟରୁ ୨,୧୪୪ (ଉଭୟ ସରକାରୀ ଓ ଘରୋଇ) ଲ୍ୟାବ୍ରେ ଆର୍ଟି-ପିସିଆର୍ ଟେଷ୍ଟ୍ କରାଯାଉଥିବା ବେଳେ ବଳକା ଲ୍ୟାବ୍ରେ ଅନ୍ୟ ଟେଷ୍ଟ୍ କରାଯାଉଛି । ମହାମାରୀ ଆରମ୍ଭ କାଳରେ ଗୋଟିଏ ପରୀକ୍ଷା ପାଇଁ ପାଖାପାଖି ୩,୫୦୦ ଟଙ୍କା କିମ୍ବା ଅଧିକ ଖର୍ଚ୍ଚ ହେଉଥିଲା । ପରବର୍ତ୍ତୀ ସମୟରେ ଏହା ୬୦୦ ଟଙ୍କା ଓ ହୋମ୍ ଟେଷ୍ଟ୍ କିଟ୍ ୨୫୦ ଟଙ୍କାକୁ ହ୍ରାସ ପାଇଥିଲା ।
ହାରାହାରି ଭାବେ ଆକଳନ କରାଗଲେ ପ୍ରତି ଟେଷ୍ଟ୍କୁ ୧ ହଜାର ଟଙ୍କା ହିସାବରେ ଭାରତୀୟମାନେ ପାଖାପାଖି ୭୪ ହଜାର କୋଟି ଟଙ୍କା ଖର୍ଚ୍ଚ କରିଛନ୍ତି ବୋଲି ଗ୍ରାହକ-ଭାରତୀର ପ୍ରତିଷ୍ଠାତା ବାରିଷ୍ଟର୍ ବିନୋଦ ତିୱାରୀ କହିଛନ୍ତି । ଏଥିମଧ୍ୟରୁ ଅନେକ ପରୀକ୍ଷଣ ବିନା ଲକ୍ଷଣରେ ବାଧ୍ୟବାଧକତାରେ ମଧ୍ୟ କରାଯାଇଛି । ଏ ନେଇ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ମନ୍ସୁଖ ମାଣ୍ଡଭୀୟ, ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକ୍ରେ ଓ ଆସିଏମ୍ଆର୍ର ବରିଷ୍ଠ ଅଧିକାରୀଙ୍କ ପତ୍ର ଲେଖି କେନ୍ଦ୍ରୀୟ ଗୁଇନ୍ଦା ସଂସ୍ଥା ଦ୍ୱାରା ତଦନ୍ତ କରିବା ପାଇଁ ଦାବି କରିଛନ୍ତି । ଏବେ ସୁଦ୍ଧା ଦେଶରେ ଏପରି ଅନଧିକୃତ ଲ୍ୟାବ୍ ଅବୈଧ ଭାବେ କୋଭିଡ୍ ପରୀକ୍ଷଣ କରୁଛନ୍ତି । ସୂଚନାଯୋଗ୍ୟ ଯେ ଗତ ୪ ତାରିଖ ସୁଦ୍ଧା ଦେଶରେ ପାଖାପାଖି ୧୬ ଲକ୍ଷରୁ ଊଦ୍ଧ୍ୱ କୋଭିଡ୍ ଟେଷ୍ଟ୍ କରାଯାଇଛି ଯାହାର ଔଚିତ୍ୟ ନେଇ ଆଇସିଏମ୍ଆର୍ ପ୍ରଶ୍ନ ଉଠାଇଥିଲା ।
