କଳାହାଣ୍ଡି : କଳାହାଣ୍ଡି ଜିଲ୍ଲାରେ ଗତ ଶନିବାର ସଂଧ୍ୟାସୁଦ୍ଧା ୨୬ ଜଣ କରୋନା ପଜିଟିଭ ଚିହ୍ନଟ ହେବା ପରେ ଜିଲ୍ଲା ପ୍ରଶାସନ ପକ୍ଷରୁ କୋଭୋଡ ନିୟମ କୁ କଡାକଡି ପାଳନ କରିବାକୁ ନିର୍ଦ୍ଦେଶ ଜାରି କରିଥିବା ଜଣାପଡିଛି । ସାମଜିକ ଦୂରତ୍ୱ ପାଳନ ଓ ମାସ୍କ ଚେକିଂ କୁ କଡା କଡି କରାଯ୍ଧବଥିବା ବେଳେ କୋଭିଦ ନିୟମ ପାଳନ କରିବାକୁ ଜିଲ୍ଲାପାଳ ପରାଗ ହର୍ଷଦ ଗାଭାଲି ଜନସାଧାରଣଙ୍କୁ ନିବେଦନ କରିଛନ୍ତି । ଇତି ମଧ୍ୟରେ କଳାହାଣ୍ଡିର ୪୪ ଟି ଠିକା କରଣ କେନ୍ଦ୍ରରେ ବରିଷ୍ଠ ନାଗରିକ ସମେତ ୪୫ ବର୍ଷରୁ ଉର୍ଦ୍ଧ୍ୱ ଜନସାଧାରଣଙ୍କୁ ପ୍ରତ୍ୟହ ଦଶ ହଜାର ଟୀକାକରଣ ବ୍ୟବସ୍ଥା କରାଯାଇଥିବା ସ୍ୱାସ୍ଥ୍ୟ ବିଭାଗ ତରଫରୁ ଜଣାପଡିଛି । ଗତ ୧ ତାରିଖ ଦିନ ୨୬ଜଣ ଓ ୨ ତାରିଖ ଦିନ ୨୨ ଜଣ ପଜିଟିଭ ଚିହ୍ନଟ ହୋଇଥିବା ବେଳେ ମାର୍ଚ୍ଚ ସେହ ସପ୍ତାହରେ ଭବାବୀପାଟଣାସ୍ଥିତ ପ୍ରଗତି କଲେଜର ୩୬ ଜଣ ଛାତ୍ର ତଥା ଧର୍ମଗଡ ମଡର୍ଣ୍ଣ କଲେଜର ୬ ଜଣ ଛାତ୍ର ସମେତ ଜଣେ ଅଧ୍ୟାପକ ପଜିଟିଭ ଚିହ୍ନଟ ହେବା ପରେ ପ୍ରଶାସନ ପକ୍ଷରୁ କଡା ପଦକ୍ଷେପ ନିଆଯାଇଛି । ଗୋଲାମୁଣ୍ଡା ବ୍ଲକ ବୃନ୍ଦାବାହାଲ ଗ୍ରାମ ପଂଚାୟତ ଲିମସେର ଗ୍ରାମରେ କରୋନାରେ ଜଣକର ମୃତ୍ୟୁ ହେବା ସହ ଅନୟ ୬ ଜଣଙ୍କ ପଜିଟିଭ ଚିହ୍ନଟ ହେବାପରେ ସେହି ଗ୍ରାମକୁ ଆଗାମୀ ୮ ତାରିଖ ଯାଏ କଂଟେନମେଂଟ ଜୋନ ଘୋଷଣା କରାଯାଇଥିବା ସରପଂଚଙ୍କ ସୂତ୍ରରୁ ପ୍ରକାଶ । କରୋନା ପ୍ରଥମ ଲହରୀରେ ଗୋଲାମୁଣ୍ଡା ବ୍ଲକରେ ହିଁ ପ୍ରଥମେ ପଜିଟିଭ ଚିହ୍ନଟ ହୋଇଥିଲା । ପୂର୍ବରୁ ଭବାନୀପାଟଣା ସହରର ଜଣକର ମୃତ୍ୟୁ ହୋଇଥିବା ଜଣାପଡିଛି । ସେହିପରି ଧର୍ମଗଡ ବ୍ଲକ ବେହେରା ଗ୍ରାମର ଜଣେ ବାସିନ୍ଦା ବିଷମକଟକ ରେ ମୃତ୍ୟୁ ହୋଇଥିବା ବେଳେ ସେଠାକୁ ଯାଇଥିବା ପରିବାର ଲୋକଙ୍କ ପରୀକ୍ଷା ତଥା ଯୋଗାଯୋଗ ଟ୍ରେସିଂ ଚାଲିଥିବା ଧର୍ମଗଡ ବିଡିଓ ଶରତ କୁମାର ସେଠୀଙ୍କ ସୂତ୍ରରୁ ପ୍ରକାଶ । ଏହାକୁ ମିଶାଇ କଳାହାଣ୍ଡିରେ ମୋଟ ତିନି ଜଣଙ୍କର ମୃତ୍ୟୁ ହୋଇଥିବା ଜଣାପଡିଛି ।
ଗତ ୩ ତାରିଖ ସୁଦ୍ଧା କଳାହାଣ୍ଡିରେ ୨୩୮ ରୁ ଉର୍ଦ୍ଧ୍ୱ ପଜିଟିଭ ଚିହ୍ନଟ ହୋଇଥିବା ବେଳେ ଚିକିତ୍ସା ପରେ ଅନେକେ ସୁସ୍ଥ ହେଉଥିବା ଜଣାପଡିଛି । ହେଲେ ଜନସାଧାରଣଙ୍କ ଅମାନିଆ ଆଚରଣ ଯୋଗୁଁ ବିଗତ ଏକ ସପ୍ତାହ ମଧ୍ୟରେ ଏହାର ସଂଖ୍ୟା ବୃଦ୍ଧି ହୋଇଯାଇଥିବା ଆଲୋଚନା ହେଉଛି ା କରୋନାର କାୟା ବିସ୍ତାର ହେଉଥିବା ଅନୁମାନ କରି ଜିଲ୍ଲା ପ୍ରଶାସନ ମଧ୍ୟ ତତ୍ପର ହୋଇଉଠିଥିବା ଜଣାପଡିଛି । ଅନ୍ୟପକ୍ଷରେ ପଡୋଶୀ ଛତିଶଗଡ ରେ ବିଶେଷ କରି କଳାହାଣ୍ଡି ସୀମାନ୍ତ ଗରିଆବନ୍ଧ ଜିଲ୍ଲାରେ ପଜିଟିଭ ସଂଖ୍ୟା ବୃଦ୍ଧି ପାଉଥିବା ଦେଖି କଳାହାଣ୍ଡି ସୀମାନ୍ତ ସନ୍ଧିକୁଲିହାରୀ ଠାରେ ପ୍ରଶାସନ ପକ୍ଷରୁ ଧର୍ମଗଡ ଏସଡିପିଓ ଧୀରଜ ଚୋପଦାର ତଥା ଧର୍ମଗଡ ଥାନା ଅଧରକାରୀ ଟୁନା ସେଠୀ ଏବଂ ଧର୍ମଗଡ ବିଡିଓ ପ୍ରମୂଖ କଡା ନଜର ରଖିଥିବା ପ୍ରକାଶ । ଜିଲ୍ଲାପ୍ରଶାସନ ପକ୍ଷରୁ ଦ୍ୱିତୀୟ ଲହରକୁ ଆଖି ଆଗରେ ରଖି ସ୍ୱାସ୍ଥ୍ୟ କେନ୍ଦ୍ର ମାନଙ୍କରେ ସ୍ୱାବ ପରୀକ୍ଷା କରୁଥିବା ବେଳେ ଟ୍ରେନରେ ଆସୁଥିବା ଯାତ୍ରୀ ମାନଙ୍କ ପାଇଁ କେସିଙ୍ଗା ରେଳ ଷ୍ଟେସନରେ ୨୪ ଘଂଟିଆ ସ୍ୱାବ ପରୀକ୍ଷା ବ୍ୟବସ୍ଥା ହୋଇଥିବା ବେଳେ ଏବଂ ବାହାରୁ ଆସୁଥିବା ଲୋକଙ୍କ ଉପରେ କଡା ନଜର ରଖିଥିବା ଜଣାପଡିଛି ।
