ନୂଆଦିଲ୍ଲୀ : ଫିଡେ ଚେସ୍ ଅଲିମ୍ପିଆଡ୍ ୨୦୨୪ରେ ସାତ ରାଉଣ୍ଡ୍ ପରେ ଭାରତ ଓପନ୍ ଏବଂ ମହିଳା ଉଭୟ ବର୍ଗରେ ୧୪ ପଏଣ୍ଟ୍ ହାସଲ କରି ଶୀର୍ଷରେ ରହିଛି । ବୁଧବାର ସପ୍ତମ ରାଉଣ୍ଡ୍ରେ ଓପନ୍ ବର୍ଗରେ ଚାରିଟି ମ୍ୟାଚ୍ ଖେଳାଯାଇଥିଲା । ଭାରତର ଯୁବ ଗ୍ରାଣ୍ଡ୍ମାଷ୍ଟର୍ ଡି ଗୁକେଶ ଚୀନ୍ର ୱେଇ ୟି’ଙ୍କ ବିପକ୍ଷରେ ଚମତ୍କାର ବିଜୟ ହାସଲ କରିଥିଲେ । ତାଙ୍କର ଏହି ବିଜୟ ବଳରେ ଭାରତ ୨.୫-୧.୫ରେ ଚୀନ୍କୁ ହରାଇଥିଲା । ସେହିପରି ଅନ୍ୟ ତିନିଟି ମ୍ୟାଚ୍ ଡ୍ର’ ରହିଥିଲା । ହଙ୍ଗେରୀ ରାଜଧାନୀ ବୁଦାପେଷ୍ଟରେ ଚାଲିଥିବା ଟୁର୍ଣ୍ଣାମେଣ୍ଟ୍ର ଆଉ ଚାରି ରାଉଣ୍ଡ୍ ବାକି ଅଛି । ଏକାଦଶ ଏବଂ ଫାଇନାଲ୍ ରାଉଣ୍ଡ୍ ସେପ୍ଟେମ୍ବର ୨୨ ତାରିଖରେ ଖେଳାଯିବ ।
ସେହିପରି ବୁଧବାର ଭାରତୀୟ ମହିଳା ଟିମ୍ ଜର୍ଜିଆକୁ ୩-୧ରେ ମାତ୍ ଦେଇ ନିଜ ବିଜୟ ଅଭିଯାନ ଜାରି ରଖିଛି । ଚାରିଟି ମ୍ୟାଚ୍ ମଧ୍ୟରୁ ଜିଏମ୍ ଆର୍ ବୈଶାଳୀ ଲେଲା ଜାଭାଖିଶଭିଲିଙ୍କୁ ଏବଂ ଭନ୍ତିକା ଅଗ୍ରୱାଲ୍ ବେଲା ଖୋତେନାଶ୍ୱିଲୀଙ୍କୁ ହରାଇଛନ୍ତି । ହରିକା ଦ୍ରୋଣାଭଲି ଓ ଦିବ୍ୟା ଦେଶମୁଖଙ୍କ ମ୍ୟାଚ୍ ଡ୍ର’ ରହିଥିଲା ।
ଚେସ୍ ଅଲିମ୍ପିଆଡ୍: ଉଭୟ ବର୍ଗ ଶୀର୍ଷରେ ଭାରତ
