ନୂଆଦିଲ୍ଲୀ: କାନାଡା ଫେବୃଆରୀ ୨୦୨୫ଠାରୁ ତାର ଭିସା ନିୟମରେ ବଡ଼ ପରିବର୍ତ୍ତନ କରିଛି। ଯାହା ହଜାର ହଜାର ଛାତ୍ର, ଶ୍ରମିକ ଏବଂ ପ୍ରବାସୀ, ବିଶେଷକରି ଭାରତୀୟଙ୍କୁ ପ୍ରଭାବିତ କରିବ। ନୂତନ ନିୟମ କାନାଡିୟ ସୀମା ଅଧିକାରୀମାନଙ୍କୁ ଛାତ୍ର, ଶ୍ରମିକ ଏବଂ ଅନ୍ୟାନ୍ୟ ଅସ୍ଥାୟୀ ବାସିନ୍ଦାଙ୍କ ଭିଜା ସ୍ଥିତି ପରିବର୍ତ୍ତନ କରିବା ପାଇଁ ଅସୀମ କ୍ଷମତା ପ୍ରଦାନ କରେ। କାନାଡାର ନୂତନ ଇମିଗ୍ରେସନ ଏବଂ ରିଫ୍ୟୁଜି ସୁରକ୍ଷା ନିୟମ ଅନୁଯାୟୀ, କାନାଡା ସୀମା ଅଧିକାରୀମାନେ ଏବେ ୱାର୍କ ପରମିଟ, ଛାତ୍ର ଭିଜା ଏବଂ ଅସ୍ଥାୟୀ ବାସସ୍ଥାନ ଭିସା ପ୍ରତ୍ୟାଖ୍ୟାନ କିମ୍ବା ବାତିଲ କରିବାର କ୍ଷମତା ରଖିଛନ୍ତି। କାନାଡାରେ ତାଙ୍କର ଅଧିକାରପ୍ରାପ୍ତ ରହଣି ସମୟ ଶେଷ ହେବା ପରେ ଜଣେ ବ୍ୟକ୍ତି ଦେଶ ଛାଡିବାକୁ ପ୍ରସ୍ତୁତ କି ନାହିଁ ତାହା ଏହି ଅଧିକାରୀମାନେ ନିର୍ଣ୍ଣୟ କରିପାରିବେ। ଭାରତୀୟ ଛାତ୍ର ଏବଂ ଶ୍ରମିକଙ୍କ ପାଇଁ କାନାଡା ଏକ ପ୍ରମୁଖ ଗନ୍ତବ୍ୟସ୍ଥଳ ହୋଇଆସିଛି। ସରକାରୀ ତଥ୍ୟ ଅନୁଯାୟୀ, ବର୍ତ୍ତମାନ କାନାଡାରେ ୪.୨ ଲକ୍ଷରୁ ଅଧିକ ଭାରତୀୟ ଛାତ୍ର ଉଚ୍ଚଶିକ୍ଷା ଗ୍ରହଣ କରୁଛନ୍ତି।
କାନାଡାରେ କାମ କରିବା, ପାଠପଢ଼ା କରିବା କିମ୍ବା ସ୍ଥାୟୀ ବାସ କରିବାକୁ ଯୋଜନା କରୁଥିବା ଭାରତୀୟ ଛାତ୍ର, ଶ୍ରମିକ ଏବଂ ପ୍ରବାସୀମାନଙ୍କ ପାଇଁ ଏହି ନୂତନ ନିୟମଗୁଡ଼ିକ ଚ୍ୟାଲେଞ୍ଜିଂ ସାବ୍ୟସ୍ତ ହୋଇପାରେ। ଯଦି ଜଣେ ଛାତ୍ର, ଶ୍ରମିକ କିମ୍ବା ପ୍ରବାସୀଙ୍କ ଭିଜା ବାତିଲ ହୋଇଯାଏ, ତେବେ ତାଙ୍କୁ ଏକ ନିର୍ଦ୍ଦିଷ୍ଟ ସମୟ ସୀମା ମଧ୍ୟରେ କାନାଡା ଛାଡ଼ିବାକୁ ପଡିବ। ଯଦି ଜଣେ ବ୍ୟକ୍ତି ପୂର୍ବରୁ କାନାଡାରେ ରହୁଛନ୍ତି ଏବଂ ତାଙ୍କର ପରମିଟ ବାତିଲ ହୋଇଯାଏ, ତେବେ ତାଙ୍କୁ ଦେଶ ଛାଡିବା ପାଇଁ ନୋଟିସ ଦିଆଯିବ। ବର୍ତ୍ତମାନ କାନାଡାରେ ପ୍ରାୟ ୪.୨୭ ଲକ୍ଷ ଭାରତୀୟ ଛାତ୍ର ଅଧ୍ୟୟନ କରୁଛନ୍ତି। ପ୍ରତିବର୍ଷ ଏହି ସଂଖ୍ୟା ବୃଦ୍ଧି ପାଉଛି, ଯାହା ଫଳରେ କାନାଡା ଭାରତୀୟ ଛାତ୍ରୀଛାତ୍ରଙ୍କ ପାଇଁ ଏକ ଶ୍ରେଷ୍ଠ ଶିକ୍ଷାଗତ ସ୍ଥଳ ପାଲଟିଛି। ଗତ ବର୍ଷ, ୩.୬୫ ଲକ୍ଷ ଭାରତୀୟଙ୍କୁ ପରିଦର୍ଶକ ଭିସା ପ୍ରଦାନ କରାଯାଇଥିଲା, ଯାହା ଏହି କଥାର ପ୍ରମାଣ ଯେ ଭାରତୀୟ ନାଗରିକମାନେ ଶିକ୍ଷା ଏବଂ ନିଯୁକ୍ତି ପାଇଁ କାନାଡାକୁ ଏକ ପ୍ରମୁଖ ପସନ୍ଦ ଭାବରେ ବିବେଚନା କରନ୍ତି।
