ଭୁବନେଶ୍ୱର : ବିଜେଡିର ଭଡ଼ାଟିଆ ଗୁଣ୍ଡାମାନେ ସଂଘବଦ୍ଧ ଭାବେ ମେ’ମାସ ୩୦ ତାରିଖରେ ଭାରତୀୟ ଜନତା ପାର୍ଟିର ଯୁବମୋର୍ଚ୍ଚା ରାଜ୍ୟ ସଭାପତି ଅଭିଳାଷ ପଣ୍ଡା ଓ ଯୁବମୋର୍ଚ୍ଚାର କେତେଜଣ କର୍ମୀଙ୍କୁ ଭଦ୍ରକ ଜିଲା ଚାନ୍ଦବାଲି ନିର୍ବାଚନମଣ୍ଡଳୀର ଧାନକୁଟା ପଂଚାୟତ କରଞ୍ଜମାଲ ଗ୍ରାମରେ ବିଜେଡିର ଭଡ଼ାଟିଆ ଗୁଣ୍ଡାମାନେ ମରଣାନ୍ତକ ଆକ୍ରମଣ କରିଥିଲେ । ମାତ୍ର ପୋଲିସ ଏ ପର୍ଯ୍ୟନ୍ତ ଦୋଷୀମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଇନାହିଁ । ଏହାର ପ୍ରତିବାଦରେ ବିଜେପି ଯୁବମୋର୍ଚ୍ଚା ପକ୍ଷରୁ ସୋମବାର କଟକରେ ଡିଜିପିଙ୍କ କାର୍ଯ୍ୟାଳୟ ଘେରାଉ କରାଯାଇଛି ।
ଏଥିରେ ହଜାର ହଜାର ସଂଖ୍ୟାରେ ବିଜେପି ଯୁବମୋର୍ଚ୍ଚାର କର୍ମକର୍ତା ସାମିଲ ହୋଇଥିଲେ । କଟକର ସମାଜ କାର୍ଯ୍ୟାଳୟଠାରୁ ବିଜେପି ଯୁବମୋର୍ଚ୍ଚାର କାର୍ଯ୍ୟକର୍ତାମାନେ ପ୍ରତିବାଦ ଶୋଭଯାତ୍ରାରେ ବାହାରି ଡିଜିପିଙ୍କ କାର୍ଯ୍ୟାଳୟରେ ପହଁଚି ସେଠାରେ ବିକ୍ଷୋଭ ପ୍ରଦର୍ଶନ କରିଥିଲେ । ଏହି ଅବସରରେ ବିଜେପି ଯୁବମୋର୍ଚ୍ଚାର ଏକ ପ୍ରତିନିଧି ମଣ୍ଡଳୀ ପୋଲିସ ଡିଜିଙ୍କୁ ସାକ୍ଷାତ କରି ରାଜ୍ୟ ସଭାପତିଙ୍କୁ ହୋଇଥିବା ଆକ୍ରମଣ ବିଷୟରେ ଆଲୋଚନା କରିଥିଲେ । ଘଟଣା ଘଟିବାର ୭୨ ଘଂଟା ପରେ ବି ପୋଲିସ ପ୍ରଶାସନ ମୁଖ୍ୟ ଅଭିଯୁକ୍ତଙ୍କୁ ଗିରଫ କରି ନ ଥିବାରୁ ସେମାନେ ନିନ୍ଦା କରିଥିଲେ । ତୁରନ୍ତ ଅଭିଯୁକ୍ତମାନଙ୍କୁ ଗିରଫ କରିବାକୁ ପୁଣି ଦାବି କରିଥିଲେ ।
ସୂଚନାଯୋଗ୍ୟ, ମେ’ ମାସ ୩୦ ତାରିଖରେ ‘ଯୁବମୋର୍ଚ୍ଚା’ ରାଜ୍ୟ ସଭାପତି ଅଭିଳାଷ ନିର୍ବାଚନୀ ପ୍ରଚାର କାର୍ଯ୍ୟ ସାରି କାର୍ଯ୍ୟକର୍ତାଙ୍କ ସହ ଫେରୁଥିବା ବେଳେ ସ୍ଥାନୀୟ ବିଧାୟକ ବ୍ୟୋମକେଶ ରାୟଙ୍କ ନିର୍ଦ୍ଦେଶରେ ସ୍ଥାନୀୟ ସରପଂଚ ପ୍ରତିନିଧି ରମେଶ ନାୟକ, ତାଙ୍କ ପୁତୁରା ପ୍ରମୋଦ ନାୟକ, ସାନଭାଇ ଅକ୍ଷୟ ନାୟକ, ମଂଟୁ ନାୟକ, ଧୂସା ମଣ୍ଡଳଙ୍କ ସହ ବିଜୁ ଜନତା ଦଳର ଭଡ଼ାଟିଆ ଗୁଣ୍ଡାମାନେ ସେମାନଙ୍କୁ ଖଣ୍ଡା, ଭୁଜାଲି, ପଥର ଓ କାଠ ଫାଳିଆରେ ମରଣାନ୍ତକ ଆକ୍ରମଣ କରି ରକ୍ତାକ୍ତ କରିବା ସହ ମୋବାଇଲ୍ ଭାଙ୍ଗି ଦେଇଥିଲେ । ଏହି ଆକ୍ରମଣରେ ରାଜ୍ୟ ଯୁବମୋର୍ଚ୍ଚା ସଭାପତି ଶ୍ରୀ ପଣ୍ଡାଙ୍କ ସହ, ରାଜ୍ୟ ସାଧାରଣ ସମ୍ପାଦକ ସୁଜିତ ସିଂ, ସମ୍ପାଦକ ସୁବ୍ରତ ବିଶ୍ୱାଳ, ପ୍ରଶାନ୍ତ ପାଇକରାୟ, ରାଜ୍ୟ ସହ ସଂଯୋଜକ ଆଶୁତୋଷ ନାୟକ ଏବଂ ଆଉ କେତେଜଣ ଯୁବମୋର୍ଚ୍ଚାର କାର୍ଯ୍ୟକର୍ତା ଗୁରୁତର ଅବସ୍ଥାରେ ଭୁବନେଶ୍ୱର ଏମ୍ସରେ ଚିକିତ୍ସାଧୀନ ଅଛନ୍ତି ।
ଏହି ବିକ୍ଷୋଭରେ ପ୍ରଦର୍ଶନବେଳେ ରାଜ୍ୟ ଯୁବମୋର୍ଚ୍ଚା ଉପସଭାପତି ସଂଗ୍ରାମ ପାତ୍ର, ଯୁବମୋର୍ଚ୍ଚା ସାଧାରଣ ସମ୍ପାଦକ ଦୀପକ ଗୋଚ୍ଛାୟତ, ସୁଜିତ ସିଂ, ରାଜ୍ୟ ସମ୍ପାଦକ ଗଗନ ଓଝା, ମାନସ ସାହୁ, ତୁତୁନ ପାତ୍ର, ରାଜ୍ୟ ସଂଯୋଜକ ଚଣ୍ଡୀପ୍ରସାଦ ବେହେରା, ସ୍ମୃତିରଞ୍ଜନ ଦାସ, ଆଶୁତୋଷ ବେହେରା, ଯୁବମୋର୍ଚ୍ଚା କଟକ ଜିଲା ସଭାପତି ନଳିନୀ ରାୟ, ଭୁବନେଶ୍ୱର ଜିଲା ସଭାପତି ସ୍ୱୟଂ ସେବକ ରାୟ, ଶୋଭନ ଆଚାର୍ଯ୍ୟ, ସୁଧୀର ମଲ୍ଲିକ, ଏମ୍. ଯେ ମହିମା, ଶିବ ନାରାୟଣ ନାୟକ, ବିଜୟାନନ୍ଦ ବାରିକ, ଶ୍ରେୟାସ ଦାସ, ସଞ୍ଜୟ ଦାସ, କେଶବ କୁଣ୍ଡୁ, ସନ୍ତୋଷ କର ପ୍ରମୁଖ ଉପସ୍ଥିତ ଥିଲେ ।
