ଓଡ଼ଗାଁ : ଓଡ଼ଗାଁ ଆଦର୍ଶଥାନା ଅନ୍ତର୍ଗତ ଗୌଡ଼ପୁଟ ଗ୍ରାମରେ ଏକ ଅଭାବନୀୟ ଘଟଣା ଘଟିଯାଇଛି । ନଦୀରେ ଭାସିଯାଇ ଜଣେ ଶିଶୁକନ୍ୟାର ମୃତ୍ୟୁ ଘଟିଛି । ମୃତ ଶିଶୁ ଗ୍ରାମର ସୁଶାନ୍ତ ବାରିକ ଓ ଶାନ୍ତିଲତା ବାରିକଙ୍କ ଶିଶୁକନ୍ୟା ଶ୍ରଦ୍ଧାଞ୍ଜଳି ବାରିକ(୨)ବୋଲି ଜଣାପଡ଼ିଛି । ସୂଚନା ଅନୁଯାୟୀ ସୋମବାର ସକାଳେ ଶାନ୍ତିଲତା ବାଡ଼ିପଟ ଦୁଆଣ୍ଟ ନଦୀକୁ ଶ୍ନାନ କରିବାକୁ ଯାଇଥିଲେ । ଶିଶୁକନ୍ୟା ଶ୍ରଦ୍ଧାଞ୍ଜଳି ମାଆ’କୁ ଖୋଜି ଖୋଜି ନିଜ ବାଡ଼ିପଟ ଦୁଆଣ୍ଟ ନଦୀକୁ ଯାଇଥିଲା ।
ଅସାବଧାନତାବଶତଃ ପିଲାଟି ପାଣିରେ ଖସି ଭାସିଯାଇଥିଲା । ମାଆ ଶାନ୍ତିଲତା ବହୁତ ଖୋଜାଖୋଜି କରିବାପରେ ଝିଅକୁ ନପାଇ ଗାଁ ଲୋକଙ୍କୁ ଖବର ଦେଇଥିଲେ । ସ୍ଥାନୀୟ ଲୋକମାନେ ବହୁ ଖୋଜାଖୋଜି ପରେ ୧୦୦ ମିଟର ଦୂରରେ ଏକ ବ୍ରିଜରେ ପିଲାଟିକୁ ଦେଖି ଉଦ୍ଧାର କରିଥିଲେ । ତୁରନ୍ତ ଓଡ଼ଗାଁ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିବାବେଳେ ଡାକ୍ତର ଶିଶୁଟିକୁ ମୃତ ଘୋଷଣା କରିଥିଲେ । ଘଟଣାରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି । ଓଡ଼ଗାଁ ପୁଲିସ ଏକ ଅପମୃତ୍ୟୁ ମାମଲା ରୁଜୁକରି ତଦନ୍ତ ଚଳାଇଥିବା ଜଣାପଡ଼ିଛି ।
