ସିଂହପୁର: ବିଞ୍ଝାରପୁର ଥାନା ଅନ୍ତର୍ଗତ ବାଛୋଳଠାରେ ଗତକାଲି ସାମ୍ବାଦିକଙ୍କୁ ଆକ୍ରମଣ ଓ ଜରୀ ପଞ୍ଚାୟତରେ ପୁଲିସ୍କୁ ମାଡ଼ ଘଟଣାରେ ପୁଲିସ କାର୍ଯ୍ୟାନୁଷ୍ଠାନ ଆରମ୍ଭ କରିଛି । ଉଭୟ ଘଟଣାରେ ୧୪ ଜଣଙ୍କୁ ଗିରଫ କରାଯାଇ ଆଜି କୋର୍ଟ ଚାଲାଣ କରାଯାଇଛି। ସାମ୍ବାଦିକଙ୍କୁ ମାଡ଼ ଘଟଣାରେ ୧୧ ଜଣ ଗିରଫ ହୋଇଥିବା ବେଳେ ପୁଲିସ୍କୁ ମାଡ଼ ଘଟଣାରେ ୩ ଜଣ ଗିରଫ ହୋଇଛନ୍ତି । ସାମ୍ବାଦିକଙ୍କୁ ମାଡ଼ ଘଟଣାରେ ବିଞ୍ଝାରପୁର ଥାନା କେସ୍ ନଂ. ୧୨୬/୨୨ରେ ମାମଲା ରୁଜ ହୋଇଛି । କୋର୍ଟ ଚାଲାଣ ହୋଇଥିବା ଅଭିଯୁକ୍ତମାନେ ହେଲେ ରାଜୁ ମଲ୍ଲିକ(୨୭), ନିରଞ୍ଜନ ମଲ୍ଲିକ(୨୮), ଚନ୍ଦ୍ରମଣୀ ମଲ୍ଲିକ(୨୦), ନବକିଶୋର ମଲ୍ଲିକ(୩୦), ଲଲାଟେନ୍ଦୁ ମଲ୍ଲିକ(୩୧), ରୀନା ମଲ୍ଲିକ(୨୫), କବିତା ମଲ୍ଲିକ (୨୩), ଲିପି ମଲ୍ଲିକ(୨୫), ଭାନୁମତୀ ମଲ୍ଲିକ(୪୫), ଟିକିଲି ମଲ୍ଲିକ(୩୦) ଓ ଜଳଧର ଜେନା (୨୫) ।
ଫେରାର ଅଭିଯୁକ୍ତମାନଙ୍କୁ ଗିରଫ କରିବାକୁ ପୁଲିସ ଟିମ୍ ବିଭିନ୍ନ ସ୍ଥାନରେ ଚଢ଼ଉ ଜାରି ରଖିଛି । ଆଜି ପୂର୍ବାହ୍ନରେ ଏସ୍ପି ରାହୁଲ ପିଆର ବିଞ୍ଝାରପୁର ଥାନାରେ ପହଞ୍ôଚ ଅଧିକ ତଦନ୍ତ କରିଥିଲେ । ଅଭିଯୁକ୍ତମାନଙ୍କୁ ନିସ୍ତାର ନାହିଁ, ଯେଉଁଠି ଲୁଚିଲେ ବି ପୁଲିସ ସେମାନଙ୍କୁ ଠାବକରି ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବ ବୋଲି ଏସପି ଚେତାଇ ଦେଇଛନ୍ତି । ସେହିପରି ଜରୀ ପଞ୍ଚାୟତରେ ଗତକାଲି ପୁଲିସ କର୍ମୀଙ୍କ ଉପରେ ହୋଇଥିବା ଆକ୍ରମଣ ଘଟଣାରେ ୩ ଜଣଙ୍କୁ ଗିରଫ କରାଯାଇଛି । ଥାନା କେସ୍ ନଂ ୧୨୭/୨୨ରେ ମାମଲା ରୁଜ ହୋଇଛି । ଏହି ମାମଲାର ମୁଦଲାମାନେ ହେଲେ ଆଲୋକ ମଲ୍ଲିକ, ପ୍ରଶାନ୍ତ ମଲ୍ଲିକ ଓ ଯାଦବ ଯେନା । ସେମାନଙ୍କୁ ଆଜି କୋର୍ଟ ଚାଲାଣ କରାଯାଇ ଥିବା ଆଇଆଇସି ଅମରେନ୍ଦ୍ର ଦାସ ସୂଚନା ଦେଇଛନ୍ତି ।
