ଭୁବନେଶ୍ୱର: ‘ଆମର ନେତା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ସେ ହିଁ ବିଜେଡିର କ୍ୟାପଟେନ୍ । ହେଲେ ବିଜେପିର କ୍ୟାପ୍ଟେନ କିଏ ଜଣା ପଡ଼ୁନି । ସେମାନେ ଆଗ ସ୍ଥିର କରନ୍ତୁ ତାପରେ ଟିପ୍ପଣୀ ଦିଅନ୍ତୁ ।’ ବୁଧବାର ୫-ଟି ସଚିବଙ୍କୁ କେନ୍ଦ୍ରର ନୋଟିସ୍ ସମ୍ପର୍କରେ ସାମ୍ବାଦିକମାନେ ପଚାରିବାରୁ ବିଜେଡିର ବରିଷ୍ଠ ନେତା ତଥା ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ ଅତନୁ ସବ୍ୟସାଚୀ ନାୟକ ଏନେଇ କଡ଼ା ଆଭିମୁଖ୍ୟ ରଖିବା ସହ ବିଜେପିକୁ କଟାକ୍ଷ କରିଛନ୍ତି । ସେ କହିଛନ୍ତି ଯେ, ବିଜେପିର ନେତାମାନଙ୍କ ସମସ୍ୟାଟା ଭାରି ଜଟିଳ । କାହା ନିର୍ଦ୍ଦେଶରେ ଓ କେଉଁଠିକୁ ଯିବେ ନିଜେ ସ୍ଥିର କରିପାରୁନାହାଁନ୍ତି ।
ଦଳର କ୍ୟାପଟେନ ସ୍ଥିର ନଥିବାରୁ ଏଭଳି ସ୍ଥିତି ଉପୁଜିଛି । କେବଳ ବିଜେପିର ନେତାମାପେ ଦିଲ୍ଲୀ ଦୌଲତାବାଦ ଦୌଡ଼ୁଛନ୍ତି । ତାହା ନକରି ଲୋକଙ୍କ ପାଖକୁ ଯାଆନ୍ତୁ । ଲୋକଙ୍କ ସମସ୍ୟା ସହ ଅବଗତ ହୁଅନ୍ତୁ । ମାତ୍ର ବିଜେଡିକୁ ବାରମ୍ବାର ଲୋକେ ଜିତାଇଛନ୍ତି । ଆମେ ଲୋକଙ୍କ ସେବା କରୁଛୁ, କରିବୁ । ଲୋକଙ୍କ ପାଖକୁ ଯିବୁ । କେବଳ ୫ଟି ସଚିବ ନୁହଁନ୍ତି ଉନ୍ନୟନ କମିଶନର, ମୁଖ୍ୟ ଶାସନ ସଚିବ ଓ ମନ୍ତ୍ରୀମାନେ ବି ଯାଉଛନ୍ତି । ଭୁବନେଶ୍ୱରରେ ବସିକି କାମ ହେଉନାହିଁ । ବିଜେପି ନେତାମାନେ ଯେଉଁ ଅଭିଯୋଗ କରୁଛନ୍ତି । ଲୋକେ ତାକୁ ଗ୍ରହଣ କରୁ ନାହାନ୍ତି । ଲୋକ ନବୀନ ବାବୁଙ୍କ ଉପରେ ଖୁସି ଅଛନ୍ତି । ସେଥିପାଇଁ ଗାଁ ଗହଳରେ ହୁଳହୁଳି ପକାଉଛନ୍ତି । ଯଦି କାହାର ଫିଡ୍ବ୍ୟାକ ଦରକାର ତାହାଲେ ଗାଁକୁ ଯାଇ ଲୋକଙ୍କୁ ପଚାରନ୍ତୁ ସବୁ ବୁଝିଯିବେ ବୋଲି ଶ୍ରୀ ନାୟକ ପ୍ରକାଶ କରିଛନ୍ତି ।
