ଆପ୍ ସାଂସଦ ସଞ୍ଜୟ ସିଂହ ଗିରଫ

ନୂଆଦିଲ୍ଲୀ: ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ପକ୍ଷରୁ ବୁଧବାର ଆମ୍ ଆଦ୍‌ମୀ ପାର୍ଟି (ଆପ୍‌) ସାଂସଦ ସଞ୍ଜୟ ସିଂହଙ୍କୁ ଗିରଫ କରାଯାଇଛି । ଦିଲ୍ଲୀ ଅବକାରୀ ଦୁର୍ନୀତି ମାମଲାରେ ଇଡି ପକ୍ଷରୁ ପ୍ରଥମେ ସଞ୍ଜୟଙ୍କ ବାସଭବନ ଉପରେ ଚଢଉ କରାଯିବା ସହ ତାଙ୍କୁ ୧୦ ଘଣ୍ଟା ଜେରା ମଧ୍ୟ କରାଯାଇଥିଲା । କେବଳ ସଞ୍ଜୟ ନୁହନ୍ତି, ତାଙ୍କର କେତେକ ସହଯୋଗୀଙ୍କ ବାସଭବନ ଉପରେ ଚଢଉ କରାଯାଇଥିବା ଜଣାପଡିଛି । ଇଡି ପକ୍ଷରୁ ଦାଖଲ ଚାର୍ଜସିଟ୍‌ରେ ସଞ୍ଜୟଙ୍କ ନାମ ଉଲ୍ଲେଖ କରାଯାଇଛି । ଅବକାରୀ ଦୁର୍ନୀତିରେ ପୂର୍ବରୁ ଗିରଫ ହୋଇଥିବା ଦିନେଶ ଆରୋରା ନାମକ ଜଣେ ଦଲାଲ ସଞ୍ଜୟଙ୍କୁ ଭେଟିଥିବାରୁ ସଞ୍ଜୟ ମଧ୍ୟ ଇଡି ସ୍କାନରରେ ପଡିଛନ୍ତି । ସୂଚନାଯୋଗ୍ୟ ପୂର୍ବରୁ ଏହି ମାମଲାରେ ଇଡି ଓ ସିବିଆଇ ବରିଷ୍ଠ ଆପ୍ ନେତା ତଥା ଦିଲ୍ଲୀର ପୂର୍ବତନ ଉପମୁଖ୍ୟମନ୍ତ୍ରୀ ମନୀଶ ସିସୋଦିଆଙ୍କୁ ଗିରଫ କରିସାରିଛି ।