ନୟାଗଡ: ନୟାଗଡ଼ରେ ଚାଞ୍ଚଲ୍ୟ । ଚୋରା ପିରତି ଧରାପଡ଼ିବା ପରେ ନିଷ୍ଠୁର ପାଲଟିଗଲା ସ୍ତ୍ରୀ । ନିଜ ହାତରେ ନିଜ ସିନ୍ଦୂରକୁ ପୋଛିବାକୁ ପଛାଇଲା ନାହିଁ । ପ୍ରେମିକ ସହ ମିଶି ସ୍ୱାମୀର ଜୀବନ ନେଲା ସ୍ତ୍ରୀ । ହତ୍ୟା ପରେ ସ୍ୱାମୀର ମୃତଦେହକୁ ଘରେ ପୋତି ଦେଇଥିଲା । ୨୦ ଦିନ ପରେ ଘର ଭିତରେ ମାଟି ଖୋଳି ମୃତଦେହ ଉଦ୍ଧାର କରିଛି ପୋଲିସ । ନୟାଗଡ଼ ଜିଲ୍ଲା ଓଡଗାଁ ଥାନା କୋମଣ୍ଡ ଗାଁରୁ ଆସିଛି ଏହି ଅମାନୁଷିକ କାଣ୍ଡ । ମୃତକ ହେଲେ ପ୍ରକାଶ ନାୟକ । ଏହି ଘଟଣାରେ ପୋଲିସ ୩ ଜଣଙ୍କୁ ଅଟକ ରଖି ପଚରା ଉଚରା କରୁଛନ୍ତି । ଗତ ୨୦ ଦିନ ହେଲା ନିଖୋଜ ଥିଲେ ପ୍ରକାଶ ନାୟକ । ଏନେଇ ପ୍ରକାଶଙ୍କ ବାପା ଅଭିଯୋଗ କରିବାକୁ ଥାନାକୁ ଯାଇଥିଲେ । ସେଠାରେ ଆଧାର କାର୍ଡ ଦରକାର ହେବାରୁ ଗୋକୁଳ ନାୟକ ପୁଅର ଶ୍ୱଶୁର ଘରକୁ ଯାଇଥିଲେ ।
ପ୍ରକାଶଙ୍କ ସ୍ତ୍ରୀଙ୍କଠାରୁ ଆଧାର କାର୍ଡ ଆଣିବା ବେଳେ ଘରର ମାଟି ଚଟାଣ ଉଚ୍ଚା ଥିବା ଦେଖିଥିଲେ କ୍ଷ ଏଇଠୁ ହିଁ ତାଙ୍କର ଆରମ୍ଭ ହୋଇଥିଲା ସନ୍ଦେହ । ଏନେଇ ସେ ଥାନାରେ ଅଭିଯୋଗ କରିବା ପରେ ଛାନଭିନ ଆରମ୍ଭ କରିଥିଲା ପୋଲିସ । ଗତକାଲି ସ୍ଥାନୀୟ ଓଡଗାଁ ମ୍ୟାଜିଷ୍ଟ୍ରେଟଙ୍କ ଉପସ୍ଥିତିରେ ଓଡଗାଁ ପୋଲିସ ମୃତକଙ୍କ ଶ୍ୱଶୁର ଘରେ ଯାଞ୍ଚ କରିଥିଲା । ଏହା ପରେ ଘରେ ମାଟି ଖୋଳି ପ୍ରକାଶଙ୍କ ମୃତଦେହକୁ ଉଦ୍ଧାର କରିଥିଲା ପୋଲିସ ।
ଏହି ଘଟଣାରେ ମୃତକଙ୍କ ସ୍ତ୍ରୀ ଜ୍ୟୋସ୍ନାରାଣୀ ନାୟକ, ଶାଶୁ ଡ଼ମଣି ପ୍ରଧାନ ଏବଂ ପ୍ରେମିକ ସୋନୁ ବେହେରାକୁ ପୋଲିସ ଅଟକ ରଖି ପଚରାଉଚରା କରୁଛି । ଜ୍ୟୋସ୍ନାରାଣୀଙ୍କ ସମ୍ପର୍କ ଅନ୍ୟ ଜଣେ ଯୁବକଙ୍କ ସହ ରହିଥିବା ବେଳେ ଏହା ଜାଣିପାରିଥିଲେ ପ୍ରକାଶ । ପରକୀୟା ପ୍ରୀତି ଧରା ପଡିଯିବାରୁ ପ୍ରେମିକ ସହ ମିଶି ସ୍ୱାମୀକୁ ହତ୍ୟା କରିଥିଲା ସ୍ତ୍ରୀ । ଏହି ଘଟଣା ପରେ ଗାଁରେ ଆଇନଶୃଙ୍ଖଳା ପରିସ୍ଥିତି ନିୟନ୍ତ୍ରଣ ପାଇଁ ପୋଲିସ ପକ୍ଷରୁ ଫୋର୍ସ ମୁତୟନ କରାଯାଇଛି । ଘଟଣାସ୍ଥଳରେ ପୋଲିସ ସାଇଣ୍ଟିଫିକ ଟିମ ସହ ତଦନ୍ତ ଚଳାଇଛି । ମୃତକ ପ୍ରକାଶ ବିବାହ ପରେ ଘର ଜ୍ୱାଇଁ ହୋଇ ଶ୍ୱଶୁର ଘରେ ରହୁଥିଲେ ।
