ନୂଆଦିଲ୍ଲୀ : ଜଳ ହିଁ ଜୀବନ, ଏ କଥା ବେଶ୍ ଅଧିକ ଅନୁଭବ କରି ହୁଏ ଖରା ଦିନରେ । କିଛି ସମୟ ବ୍ୟବଧାନରେ ଶରୀରରେ ଜଳୀୟ ଅଂଶ କମିଯିବା ଫଳରେ ଆମେ କଷ୍ଟ ଅନୁଭବ କରିଥାଉ । ଖରାଦିନରେ ଲୋକମାନେ ଥଣ୍ଡା ପାନୀୟ ପିଇବାକୁ ପସନ୍ଦ କରିଥାନ୍ତି । ସୁସ୍ଥ ରହିବାକୁ ଫଳ ରସକୁ ଗୁରୁତ୍ୱ ଦେଇଥାନ୍ତି । ଏପରିକି ଖରା ଦିନରେ ଦେହର ଜଳୀୟ ଅଂଶକୁ ସନ୍ତୁଳିତ କରିବା ପାଇଁ ଆମେ ବିଭିନ୍ନ ପ୍ରକାରର ପାନୀୟ ପଦାର୍ଥ ମଧ୍ୟ ପିଇଥାଉ ।
ବିଶେଷଜ୍ଞମାନେ ମଧ୍ୟ ଦିନକୁ ୮ରୁ୧୦ ଗ୍ଲାସ ପାଣି ପିଇବା ପାଇଁ ପରାମର୍ଶ ଦେଇଥାନ୍ତି, ଖରାଦିନେ ବିଭିନ୍ନ ଫ୍ଲେବର୍ ପାଣି ତିଆରି କରି ପିଇବାକୁ ମଧ୍ୟ ପସନ୍ଦ କରିଥାନ୍ତି ଲୋକେ । ଆଜିକାଲି ବଜାରରେ ଅନେକ ପ୍ରକାର ଫ୍ଲେଭର ମଧ୍ୟ ମିଳୁଛି କିନ୍ତୁ ତାହା ଆର୍ଟିଫିସିଆଲ ହୋଇଥାଏ । ଯାହା ଶରୀର ପାଇଁ ଭଲ ହୋଇନଥାଏ । ତେବେ ଆସନ୍ତୁ ଜାଣିବା ଆମେ କିପରି ଘରେ ହେଲଦୀ ଫ୍ଲେବର ଡ୍ରିଙ୍କ୍ସ ତିଆରି କରିପାରିବା ଯାହା କେବଳ ପିଇବାକୁ ଭଲ ଲାଗିନଥାଏ ବରଂ ସ୍ୱାସ୍ଥ୍ୟ ପାଇଁ ମଧ୍ୟ ଲାଭଦାୟକ ହୋଇଥାଏ ।
ପ୍ରଥମେ ଏକ ବୋତଲରେ ପାଣି ଭର୍ତ୍ତି କରନ୍ତୁ । ଏଥିରେ କିଛି ତାଜା ପୁଦିନା ପତ୍ର, କିଛି ଡାଲଚିନି ଖଣ୍ଡ ପକାନ୍ତୁ । ଏହାପରେ ଏହାକୁ ଆଉ ଟିକେ ସ୍ୱାଦିଷ୍ଟ କରିବା ନିମନ୍ତେ ଏଥିରେ ଲେମ୍ବୁ ପକାନ୍ତୁ । ତା ପରେ ପ୍ରସ୍ତୁତ ହେଇଗଲା ଆପଣଙ୍କ ଫ୍ଲେବର୍ ପାଣି । ଶୋଷ ଲାଗିଲେ ଦିନ ସାରା ଅଳ୍ପ ଅଳ୍ପ କରି ଏହି ଫ୍ଲେବର୍ ପାଣି ପିଅନ୍ତୁ ,ଏହା କେବଳ ସ୍ୱାଦିଷ୍ଟ ନୁହେଁ ବରଂ ଦେହ ପାଇଁ ହିତକାରୀ ମଧ୍ୟ । ଏଥିରେ ବ୍ୟବହାର ହୋଇ ଥିବା ପୁଦିନା, ଡାଲଚିନି, ଲେମ୍ବୁର ଅନେକ ଭଲ ଗୁଣ ରହିଛି । ପୁଦିନାରେ ଥିବା ଆଣ୍ଟିଅକ୍ସିଡାଣ୍ଟ ଗୁଣ ଶରୀରର ପାଚନ ପ୍ରକ୍ରିୟାରେ ସହଯୋଗ କରେ, ଡାଇବେଟିସକୁ ସନ୍ତୁଳିତ କରେ । ଡାଲଚିନି ଆମ ଶରୀରର ରୋଗପ୍ରତିରୋଧ ଶକ୍ତି ବଢ଼ାଇ ଥାଏ । ସେହିପରି ଲେମ୍ବୁରେ ରହିଛି ଭିଟାମିନ ସି ଓ ଫାଇବର ଏବଂ ଆଣ୍ଟିଅକ୍ସିଡାଣ୍ଟ ଗୁଣ ଯାହା ଦେହର ପାଣିର ଅଭାବ କମ କରିଥାଏ । ତେଣୁ ଏହି ଫ୍ଲେବର୍ ପାଣି ବ୍ୟବହାର ଅତ୍ୟନ୍ତ ଲାଭଦାୟକ ଅଟେ ।
