ବ୍ରହ୍ମପୁର: ବୈଦ୍ୟନାଥପୁର ଥାନା ଅନ୍ତର୍ଗତ ଲାଞ୍ଜିପଲ୍ଲୀ ନୂଆବନ୍ଧରୁ ରେଡ୍ଡୀକା ସାହିର ସଦାନନ୍ଦ ବେହେରା(୫୫)ଙ୍କ ମୃତ ଦେହ ଉଦ୍ଧାର ହୋଇଛି । ଆଜି ବ୍ରହ୍ମପୁର ଅଗ୍ନିଶମ ବିଭାଗର କର୍ମଚାରୀମାନେ ତାଙ୍କ ମୃତ ଦେହକୁ ଉଦ୍ଧାର କରି ପୁଲିସକୁ ହସ୍ତାନ୍ତର କରିଥିବା ବେଳେ ଶବ ବ୍ୟବଚ୍ଛେଦ ନିମନ୍ତେ ଏମ୍କେସିଜିକୁ ପଠାଇ ଦେଇଛନ୍ତି । ଏହି ଘଟଣାରେ ବୈଦ୍ୟନାଥପୁର ପୁଲିସ ଏକ ଅପମୃତ୍ୟୁ ମାମଲା ରୁଜୁ କରିଛି । ସୂଚନାଯୋଗ୍ୟ ଯେ ଗତକାଲି ଅପରାହ୍ନ ୧୨ଟା ବେଳେ ମୃତ ସଦାନନ୍ଦ ପୋଖରୀକୁ ଗାଧୋଇବାକୁ ଆସିଥିଲେ । କିନ୍ତୁ ବହୁ ସମୟ ଧରି ସେ ଆଉ ଘରକୁ ଫେରି ନଥିଲେ ।
ପୋଖରୀ ହୁଡ଼ାରେ ସଦାନନ୍ଦଙ୍କ ଚପଲ ଓ ଗାମୁଛା, ପ୍ୟାଣ୍ଟ ପଡ଼ିଥିବା ପରିବାର ଲୋକ ଦେଖିବାକୁ ପାଇଥିଲେ । ଯାହା ଫଳରେ ସେ ପୋଖରୀରେ ବୁଡି ଯାଇଥିବା ସନ୍ଦେହ କରି ବ୍ରହ୍ମପୁର ଅଗ୍ନିଶମ ବିଭାଗକୁ ଖବର ଦେଇଥିଲେ । ଖବର ପାଇ ଅଗ୍ନିଶମ ବିଭାଗୀୟ କର୍ମଚାରୀ ପହଞ୍ଚି ବହୁ ସମୟ ଧରି ଖୋଜାଖୋଜିପରେ ମଧ୍ୟ ସଦାନନ୍ଦଙ୍କୁ ପାଇ ନଥିଲେ । ଆଜି ସଦାନନ୍ଦଙ୍କୁ ମୃତ ଦେହ ସେହି ପୋଖରୀରେ ଭାସୁଥିବା ସ୍ଥାନୀୟ ଲୋକେ ଦେଖିବାକୁ ପାଇଥିଲେ । ପରେ ଅଗ୍ନିଶମ ବିଭାଗୀୟ କର୍ମଚାରୀ ଓ ପୁଲିସ ପହଞ୍ଚି ମୃତ୍ୟୁ ଦେହକୁ ଉଦ୍ଧାର କରିଥିଲେ ।
