ଲକ୍ଷ୍ନୌ: ତ୍ରିକୋଣୀୟ ପ୍ରେମ ସମ୍ପର୍କରୁ ଜଘନ୍ୟ ହତ୍ୟାକାଣ୍ଡ । ଉତ୍ତରପ୍ରଦେଶରେ ଓଡ଼ିଶା ଯୁବକଙ୍କୁ ହତ୍ୟା କଲେ ଅନ୍ୟ ଜଣେ ଓଡ଼ିଆ ପୁଅ । ଗୋଟିଏ ଝିଅକୁ ଦୁଇ ସାଙ୍ଗ ଭଲ ପାଉଥିବା ବେଳେ ଜଣଙ୍କ ଜୀବନ ଯାଇଛି । ହତ୍ୟାର ଷଡଯନ୍ତ୍ର ରଚି ମଦ ପିଆଇ ସାଙ୍ଗକୁ ହତ୍ୟା କଲା ସାଙ୍ଗ । ଏଭଳି ହତ୍ୟାକାଣ୍ଡ ଘଟିଛି ୟୁପିର ବାରବାଙ୍କିରେ । ମୃତକ ହେଉଛନ୍ତି ନୂଆପଡା ଜିଲ୍ଲାର ପ୍ରତ୍ୟୁଷ । ହତ୍ୟାକାରୀ ହେଉଛନ୍ତି ସେହି ଜିଲ୍ଲାର କଲ୍ୟାଣପୁର ନିବାସୀ ଛୋଟୁ । ପୋଲିସ ତାକୁ ଗିରଫ କରିଛି । ସୂଚନା ଅନୁଯାୟୀ, ରାମନଗର ଥାନା ଅଞ୍ଚଳର ଦଦୌରା ଗାଁ ଉପକଣ୍ଠରେ ଏକ ଚାନ୍ଦେଲ ଇଟା ଭାଟି ଅଛି। ଏଠାରେ ଓଡ଼ିଶାର ନୂଆପଡା ଜିଲ୍ଲାର ଖଡିଆଳ ରୋଡ ବାଙ୍କା ଓ ବେଲାର ଗାଁର ଅନେକ ଶ୍ରମିକ କାମ କରନ୍ତି ।
ଏମାନଙ୍କ ମଧ୍ୟରେ ପ୍ରତ୍ୟୁଷ ମଧ୍ୟ ଥିଲେ । ବୁଧବାର ରାତିର ଅଭିଯୁକ୍ତ ଛୋଟୁ ତାଙ୍କୁ ମେଳା ଦେଖିବାକୁ ସ୍ଥାନୀୟ ଦଦୌରା ଗାଁକୁ ଡାକି ନେଇଥିଲା । କିନ୍ତୁ ବିଳମ୍ବିତ ରାତି ପର୍ଯ୍ୟନ୍ତ ସେ ନ ଫେରିବାରୁ ପରିବାର ଲୋକେ ଖୋଜାଖୋଜି କରିଥିଲେ । ପରେ ପ୍ରତ୍ୟୁଷଙ୍କ ମୃତଦେହ ବଗିଚାରେ ପଡ଼ିଥିବା ଦେଖିବାକୁ ପାଇଥିଲେ । ତାଙ୍କ ଶରୀରରେ ଧାରୁଆ ଅସ୍ତ୍ରର ଚିହ୍ନ ମଧ୍ୟ ଥିଲା। ଏନେଇ ପରିବାର ଲୋକେ ପୋଲିସକୁ ସୂଚନା ଦେଇଥିଲେ । ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଥିଲା । ବାରବାଙ୍କୀ ଅତିରିକ୍ତ ଏସପି ବିକାଶ ଚନ୍ଦ୍ର ତ୍ରିପାଠୀ କହିଛନ୍ତି ଯେ, ଅଭିଯୁକ୍ତ ଛୋଟୁ ଏକ ଇଟା ଭାଟିରେ କାମ କରୁଥିବା ଜଣେ ଝିଅ ସହିତ କଥା ହେଉଥିଲା। ପ୍ରତ୍ୟୁଷ ମଧ୍ୟ ସେହି ଝିଅ ସହିତ କଥା ହେଉଥିଲା। ଏହି କାରଣରୁ ଛୋଟୁ ତାର ବନ୍ଧୁ ପ୍ରତ୍ୟୁଷଙ୍କ ଉପରେ ରାଗ ରଖିଥିଲା । ସେ ବାରମ୍ବାର ସେ ଝିଅ ସହ କଥା ନହେବାକୁ କହୁଥିଲା ।
କିନ୍ତୁ ପ୍ରତ୍ୟୁଷ ଝିଅଟି ସହିତ କଥା ହେବା ବନ୍ଦ କରି ନଥିଲା, ତେଣୁ ଛୋଟୁ ପ୍ରତ୍ୟୁଷକୁ ରାସ୍ତାର ହଟାଇବାକୁ ସ୍ଥିର କରିଥିଲା । ଅତିରିକ୍ତ ଏସପି ଆହୁରି ମଧ୍ୟ କହିଛନ୍ତି ଯେ, ବୁଧବାର ଦଦୌରା ଗାଁରେ ପାଣ୍ଡେ ବାବାଙ୍କ ମେଳା ଥିଲା। ଯୋଜନା ମୁତାବତ ଛୋଟୁ ମେଳା ଦେଖାଇବା ବାହାନାରେ ପ୍ରତ୍ୟୁଷଙ୍କୁ ଡାକିଥିଲା । ଏହା ପରେ ଛୋଟୁ ତାଙ୍କୁ ଦଦୌରା ଏକ ଆମ୍ବ ବଗିଚାକୁ ନେଇଗଲା ଯେଉଁଠାରେ ଦୁହେଁ ବସି ମଦ୍ୟପାନ କରିଥିଲେ । ଅତ୍ୟଧିକ ମଦ୍ୟପାନ କରିବା ପରେ ପ୍ରତ୍ୟୁଷ ସେଠାରେ ଶୋଇପଡ଼ିଲା। ଏହା ପରେ ଛୋଟୁ ଭାଟିରୁ ଏକ କୁରାଢ଼ି ଆଣି ତାଙ୍କୁ ହତ୍ୟା କଲା। ହତ୍ୟାର ରହସ୍ୟକୁ ଲୁଚାଇବା ପାଇଁ ସେ ମୃତଦେହକୁ ନଡ଼ାରେ ଲୁଚାଇ ରଖିଥିଲା ଓ ସେଠାରୁ ଫେରି ଆସି ଶୋଇପଡିଥିଲା । ଅଭିଯୁକ୍ତ ଛୋଟୁକୁ ଗିରଫ କରାଯାଇଛି।
