ଚୀନ୍ : ଭାରତ ମହାସାଗରରେ ଚୀନ୍ର ବଢୁଥିବା ଦପଟ ଏବଂ ରଣନୈତିକ ଚ୍ୟାଲେଞ୍ଜକୁ ମୁକାବିଲା କରିବା ପାଇଁ ଭାରତୀୟ ନୌସେନା ନିଜର ଶକ୍ତି ବୃଦ୍ଧି କରିବାକୁ ଯାଉଛି । ଭାରତ ଏବଂ ଜର୍ମାନୀ ମଧ୍ୟରେ ଛଅଟି ଅତ୍ୟାଧୁନିକ ପାରମ୍ପରିକ ବୁଡ଼ାଜାହାଜ ନିର୍ମାଣ ପାଇଁ ଦୀର୍ଘ ପ୍ରତୀକ୍ଷିତ ‘ପ୍ରୋଜେକ୍ଟ ୭୫-ଆଇ’ (Project 75-I) ମେଗା-ଡିଲ୍ ଏବେ ଏକ ନିର୍ଣ୍ଣାୟକ ପର୍ଯ୍ୟାୟରେ ପହଞ୍ଚିଛି । ପ୍ରାୟ ୭୦ ହଜାର କୋଟି ଟଙ୍କାର ଏହି ବିଶାଳ ପ୍ରତିରକ୍ଷା ଚୁକ୍ତି ପାଇଁ ପ୍ରସ୍ତାବ ଖୁବ୍ ଶୀଘ୍ର ସୁରକ୍ଷା ସମ୍ପର୍କିତ କ୍ୟାବିନେଟ୍ କମିଟି (ସିସିଏସ) ସମ୍ମୁଖରେ ଉପସ୍ଥାପିତ ହେବାର ଆଶା କରାଯାଉଛି । ସିସିଏସରୁ ସବୁଜ ସଙ୍କେତ ମିଳିବା ପରେ ଆନୁଷ୍ଠାନିକ ଭାବେ ଚୁକ୍ତି ସ୍ୱାକ୍ଷରିତ ହେବ ଏବଂ ଏହି ଶକ୍ତିଶାଳୀ ବୁଡ଼ାଜାହାଜ ଗୁଡ଼ିକର ନିର୍ମାଣ କାର୍ଯ୍ୟ ଆରମ୍ଭ ହେବ ।
ଏହି ମହତ୍ୱାକାଂକ୍ଷୀ ପ୍ରକଳ୍ପ ଅଧୀନରେ ଛଅଟି ବୁଡ଼ାଜାହାଜ ମୁଖ୍ୟତଃ ଭାରତର ମୁମ୍ବାଇ-ଭିତ୍ତିକ ମାଜାଗାଓଁ ଡକ୍ ସିପ୍ ବିଲ୍ଡର୍ସ ଲିମିଟେଡ୍ (ଏମଡିଏଲ) ଦ୍ୱାରା ଜର୍ମାନୀର ପ୍ରତିରକ୍ଷା କମ୍ପାନୀ ଥାଇସେନକ୍ରୁପ୍ ମାରିନ୍ ସିଷ୍ଟମ୍ସ (ଟିକେଏମଏସ) ସହ ମିଳିତ ଭାବେ ନିର୍ମାଣ କରାଯିବ । ଏହି ବୁଡ଼ାଜାହାଜଗୁଡ଼ିକର ସବୁଠାରୁ ବଡ଼ ବିଶେଷତ୍ୱ ହେଉଛି ଏହାର ‘ଏୟାର-ଇଣ୍ଡିପେଣ୍ଡେଣ୍ଟ ପ୍ରପଲ୍ସନ୍’ (AIP) ପ୍ରଯୁକ୍ତିବିଦ୍ୟା। ଏହାଦ୍ୱାରା ବୁଡ଼ାଜାହାଜ ଗୁଡ଼ିକ ପାରମ୍ପରିକ ଡିଜେଲ-ଇଲେକ୍ଟ୍ରିକ୍ ବୁଡ଼ାଜାହାଜ ପରି ବାରମ୍ବାର ପାଣି ଉପରକୁ ନଉଠି ସପ୍ତାହ ସପ୍ତାହ ଧରି ସମୁଦ୍ର ଗଭୀରରେ ରହି ପାଟ୍ରୋଲିଂ କରିପାରିବେ। ଏହି ସାଇଲେଣ୍ଟ୍ କିଲର ବୁଡ଼ାଜାହାଜ ଗୁଡ଼ିକରେ ଆଧୁନିକ ସୋନାର୍, ହେଭିୱେଟ୍ ଟର୍ପେଡୋ, ସ୍ଥଳ-ଆକ୍ରମଣ ଓ ଜାହାଜ ବିରୋଧୀ କ୍ଷେପଣାସ୍ତ୍ର ସମେତ ଅତ୍ୟାଧୁନିକ ଇଲେକ୍ଟ୍ରୋନିକ୍ ଯୁଦ୍ଧ ପ୍ରଣାଳୀ ରହିବ, ଯାହାକୁ ଶତ୍ରୁ ରାଡାର ପକ୍ଷେ ଚିହ୍ନଟ କରିବା ପ୍ରାୟତଃ ଅସମ୍ଭବ ହେବ ।
ବର୍ତ୍ତମାନ ଭାରତୀୟ ନୌସେନା ନିଜର ବୁଡ଼ାଜାହାଜ ସଂଖ୍ୟାକୁ ନେଇ କିଛିଟା ଅସୁବିଧାର ସମ୍ମୁଖୀନ ହେଉଥିବା ବେଳେ ଭାରତ ମହାସାଗରରେ ଚୀନ୍ର ଗତିବିଧି ନିରନ୍ତର ବୃଦ୍ଧି ପାଉଛି । ଏଭଳି ସ୍ଥିତିରେ ଏହି ଛଅଟି ନୂଆ ବୁଡ଼ାଜାହାଜ ଭାରତକୁ ଏକ ଶକ୍ତିଶାଳୀ ରଣନୈତିକ ସୁବିଧା ପ୍ରଦାନ କରିବ। ଏହି ଚୁକ୍ତି କେବଳ ନୌସେନାର ଶକ୍ତି ବଢ଼ାଇବ ନାହିଁ, ବରଂ ‘ଆତ୍ମନିର୍ଭର ଭାରତ’ ଅଭିଯାନ ଅଧୀନରେ ଘରୋଇ ପ୍ରତିରକ୍ଷା ଶିଳ୍ପକୁ ମଧ୍ୟ ବଡ଼ ପ୍ରୋତ୍ସାହନ ଦେବ। ଭବିଷ୍ୟତରେ ବୁଡ଼ାଜାହାଜ ନିର୍ମାଣ, ରକ୍ଷଣାବେକ୍ଷଣ ଏବଂ ସ୍ୱଦେଶୀ ଡିଜାଇନ୍ କ୍ଷମତା ବିକଶିତ କରିବା ଦିଗରେ ଏହି ପ୍ରକଳ୍ପ ଏକ ମାଇଲଖୁଣ୍ଟ ସାବ୍ୟସ୍ତ ହେବ । ଭାରତ ଏବଂ ଜର୍ମାନୀ ମଧ୍ୟରେ ଏହି ପ୍ରତିରକ୍ଷା ସହଯୋଗ ଦୀର୍ଘ ଦିନର। ଭାରତୀୟ ନୌସେନା ୧୯୮୦ ଦଶକରୁ ଜର୍ମାନ-ଡିଜାଇନ୍ ଶିଶୁମାର-କ୍ଲାସ୍ ବୁଡ଼ାଜାହାଜଗୁଡ଼ିକୁ ସଫଳତାର ସହ ପରିଚାଳନା କରିଆସୁଛି, ଯାହା ମାଜାଗାଓଁ ଡକ୍ରେ ନିର୍ମିତ ହୋଇଥିଲା। ଏହା ପୂର୍ବରୁ ଫ୍ରାନ୍ସ ସହଯୋଗରେ ଛଅଟି କାଲଭାରୀ-କ୍ଲାସ୍ ବୁଡ଼ାଜାହାଜ ନିର୍ମାଣ କାର୍ଯ୍ୟ ମଧ୍ୟ ସମ୍ପୂର୍ଣ୍ଣ ହୋଇଛି । ଏବେ ଜର୍ମାନୀ ସହିତ ହେବାକୁ ଥିବା ଏହି ନୂତନ ଚୁକ୍ତି ଭାରତର ସାମୁଦ୍ରିକ ସୀମାକୁ ଅଧିକ ସୁରକ୍ଷିତ ଓ ଅଭେଦ୍ୟ କରିବ ବୋଲି ବିଶେଷଜ୍ଞମାନେ ମତ ପ୍ରକାଶ କରିଛନ୍ତି ।
