ପ୍ରଧାନମନ୍ତ୍ରୀ ‘ନାଗରିକ ଦେବୋ ଭବ’ ଉପରେ ଗୁରୁତ୍ୱାରୋପ କରିଥିଲେ ଏବଂ ନାଗରିକମାନଙ୍କୁ ପ୍ରଶାସନର ଆଧାର ଭାବେ ସ୍ଥାନିତ କରିବାକୁ ଅଧିକାରୀମାନଙ୍କୁ ଆହ୍ୱାନ ଦେଇଥିଲେ
ବିକାଶ ସମ୍ବନ୍ଧୀୟ ଆହ୍ଵାନଗୁଡ଼ିକର ମୁକାବିଲା ପାଇଁ ପ୍ରଧାନମନ୍ତ୍ରୀ ‘ସମ୍ପୂର୍ଣ୍ଣ ସରକାରୀ’ ଆଭିମୁଖ୍ୟ ଗ୍ରହଣ କରିବା ଏବଂ ବିଭିନ୍ନ ବିଭାଗ ମଧ୍ୟରେ ସମନ୍ୱୟ ସ୍ଥାପନ କରିବାକୁ ଆହ୍ୱାନ ଦେଇଥିଲେ
ପ୍ରଧାନମନ୍ତ୍ରୀ ଯୁବ ପ୍ରଶାସନିକ ଅଧିକାରୀମାନଙ୍କୁ ‘ବିକଶିତ ଭାରତ@୨୦୪୭’ ଦିଗରେ ଭାରତର ଯାତ୍ରାର ନେତୃତ୍ୱ ନେବାକୁ ଆହ୍ୱାନ କରିଥିଲେ
ପ୍ରଧାନମନ୍ତ୍ରୀ ଭବିଷ୍ୟତ ପ୍ରଶାସନ ପାଇଁ ପ୍ରଯୁକ୍ତିବିଦ୍ୟା, କୃତ୍ରିମ ବୁଦ୍ଧିମତା ଏବଂ ତଥ୍ୟ-ଚାଳିତ ଶାସନର ଗୁରୁତ୍ୱ ଉପରେ ଆଲୋକପାତ କରିଥିଲେ
ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ନୂଆଦିଲ୍ଲୀ ଠାରେ ସେବା ତୀର୍ଥରେ ବିଭିନ୍ନ ମନ୍ତ୍ରଣାଳୟ ଏବଂ ବିଭାଗରେ ସହକାରୀ ସଚିବ ଭାବରେ ନିଯୁକ୍ତ ହୋଇଥିବା ୨୦୨୪ ବ୍ୟାଚ୍ ର ୧୮୩ ଆଇଏଏସ୍ ଅଧିକାରୀ ପ୍ରଶିକ୍ଷାର୍ଥୀଙ୍କ ସହିତ ଆଲୋଚନା କରିଛନ୍ତି।
ଯୁବ ଅଧିକାରୀମାନେ ସେମାନଙ୍କର କ୍ଷେତ୍ର ତାଲିମ୍ ସମୟରେ ଏବଂ ମନ୍ତ୍ରଣାଳୟ ମଧ୍ୟରେ ସେମାନଙ୍କର ପୋଷ୍ଟିଂ ଅବଧିରେ କାମକୁ ନେଇ ସେମାନଙ୍କର ଅଭିଜ୍ଞତା ସମ୍ପର୍କରେ କହିଥିଲେ। ଅଧିକାରୀମାନଙ୍କୁ ସମ୍ବୋଧିତ କରି ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ ଦୁଇ ବର୍ଷ କ୍ଷେତ୍ର ସ୍ତରରେ କାର୍ଯ୍ୟ ଏବଂ ପ୍ରଶାସନିକ ପ୍ରକ୍ରିୟା ଶିଖିବା ପରେ, ସେମାନେ ଏବେ ଏକ ଗୁରୁତ୍ୱପୂର୍ଣ୍ଣ ମୁହୂର୍ତ୍ତରେ ଠିଆ ହୋଇଛନ୍ତି। ଏବେ ସେମାନଙ୍କର ନିଷ୍ପତ୍ତି କେବଳ ସେମାନଙ୍କ କ୍ୟାରିଅର ନୁହେଁ ବରଂ ଲକ୍ଷ ଲକ୍ଷ ନାଗରିକଙ୍କ ଭବିଷ୍ୟତକୁ ମଧ୍ୟ ଗଢ଼ି ତୋଳିବ। ସାର୍ବଜନୀନ ସେବାର ପ୍ରକୃତ ପରୀକ୍ଷା ସାଧୁତା, ସମ୍ବେଦନଶୀଳତା ଏବଂ ପ୍ରତିବଦ୍ଧତାର ସହିତ ବାସ୍ତବ ଜୀବନ ପରିସ୍ଥିତିକୁ ପରିଚାଳନା କରିବା ସହିତ ଆରମ୍ଭ ହୁଏ।
ପ୍ରଧାନମନ୍ତ୍ରୀ ଯୁବ ପ୍ରଶାସନିକ ଅଧିକାରୀମାନଙ୍କୁ ଉଦ୍ଦେଶ୍ୟ, ନବସୃଜନ ଏବଂ ନାଗରିକ – କେନ୍ଦ୍ରିକ ଶାସନର ଏକ ଦୃଢ଼ ଭାବନା ସହିତ ରାଷ୍ଟ୍ର ନିର୍ମାଣରେ ନିଜକୁ ଉତ୍ସର୍ଗ କରିବାକୁ ଆହ୍ୱାନ କରିଥିଲେ। ପ୍ରତ୍ୟେକ ପ୍ରଶାସନିକ ଫାଇଲ ପଛରେ ଥିବା ମାନବୀୟ ପ୍ରଭାବକୁ ସବୁବେଳେ ମନେ ରଖିବାକୁ ସେ ଅଧିକାରୀମାନଙ୍କୁ ପରାମର୍ଶ ଦେଇଥିଲେ। ଉଲ୍ଲେଖ କରିଥିଲେ ଯେ ପ୍ରତ୍ୟେକ ଫାଇଲ ଅଗଣିତ ନାଗରିକଙ୍କ ଆଶା, ଚିନ୍ତା ଏବଂ ଜୀବନକୁ ପ୍ରତିନିଧିତ୍ୱ କରେ। “ନାଗରିକ ଦେବୋ ଭବ” ମନ୍ତ୍ର ଉପରେ ଗୁରୁତ୍ୱାରୋପ କରି, ସେ ଅଧିକାରୀମାନଙ୍କୁ ପ୍ରତ୍ୟେକ ନିଷ୍ପତ୍ତିର ମୂଳରେ ନାଗରିକମାନଙ୍କୁ ସ୍ଥାନିତ କରିବାକୁ ଏବଂ ପ୍ରଶାସନ ଯେପରି ସମ୍ବେଦନଶୀଳ, ଉତ୍ତରଦାୟୀ ଏବଂ ଅନ୍ତର୍ଭୁକ୍ତ ରହିବ, ତାହା ନିଶ୍ଚିତ କରିବାକୁ ଆହ୍ୱାନ କରିଥିଲେ।
‘ସମ୍ପୂର୍ଣ୍ଣ – ସରକାର’ ଆଭିମୁଖ୍ୟର ଆବଶ୍ୟକତା ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ, ପ୍ରମୁଖ ବିକାଶ ସମ୍ବନ୍ଧୀୟ ଆହ୍ଵାନଗୁଡ଼ିକୁ ବିଭିନ୍ନ ବିଭାଗଗୁଡ଼ିକ ପୃଥକ ଭାବରେ କାମ କରିବା ଦ୍ୱାରା ସମାଧାନ କରାଯାଇପାରିବ ନାହିଁ। ଅର୍ଥପୂର୍ଣ୍ଣ ଏବଂ ଦୀର୍ଘସ୍ଥାୟୀ ଫଳାଫଳ ହାସଲ କରିବା ପାଇଁ ବିଭାଗଗୁଡ଼ିକ ମଧ୍ୟରେ ଉତ୍ତମ ସମନ୍ୱୟ ଜରୁରୀ।
‘ବିକଶିତ ଭାରତ ୨୦୪୭’ ର ଦୃଷ୍ଟିକୋଣ ଉପରେ ଗୁରୁତ୍ୱାରୋପ କରି ପ୍ରଧାନମନ୍ତ୍ରୀ କହିଥିଲେ ଯେ, ଆଗାମୀ ଦଶନ୍ଧି ଗୁଡ଼ିକରେ, ପ୍ରତ୍ୟେକ ନୀତି ଏବଂ ପ୍ରଶାସନିକ ନିଷ୍ପତ୍ତିର ଉଦ୍ଦେଶ୍ୟ ଏକ ବିକଶିତ ଭାରତ ନିର୍ମାଣରେ ଯୋଗଦାନ ଦେବା ଉଚିତ। ସେ ଗୁରୁତ୍ୱାରୋପ କରିଥିଲେ ଯେ ଭାରତର ବର୍ତ୍ତମାନର ପ୍ରାଥମିକତାରେ ‘ଆତ୍ମନିର୍ଭର ଭାରତ’, ‘ମେକ୍ ଇନ୍ ଇଣ୍ଡିଆ’, ଉତ୍ପାଦନ ବୃଦ୍ଧି, ଶକ୍ତି ସୁରକ୍ଷା ଏବଂ ଯୁବପିଢ଼ିଙ୍କ ପାଇଁ ସୁଯୋଗ ସୃଷ୍ଟି ଅନ୍ତର୍ଭୁକ୍ତ।
ଗତ ଦଶନ୍ଧିରେ ଶାସନରେ ପରିବର୍ତ୍ତନ ଉପରେ ଆଲୋକପାତ କରି ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ ପ୍ରଶାସନ ଏକ ପ୍ରକ୍ରିୟା – କେନ୍ଦ୍ରିକ ମଡେଲରୁ ଫଳାଫଳ – କେନ୍ଦ୍ରିକ ଆଭିମୁଖ୍ୟକୁ ରୂପାନ୍ତରିତ ହୋଇଛି। ସେବା ପ୍ରଦାନରେ ଉନ୍ନତି ଆଣିବା ଏବଂ ନାଗରିକମାନଙ୍କୁ ସହଜ ଏବଂ ସ୍ୱଚ୍ଛତା ସହିତ ସେବା ପ୍ରଦାନ କରିବାରେ ଡିଜିଟାଲ୍ ଶାସନ, କୃତ୍ରିମ ବୁଦ୍ଧିମତ୍ତା ଏବଂ ପ୍ରଯୁକ୍ତିର ବର୍ଦ୍ଧିତ ଭୂମିକା ବିଷୟରେ ସେ ଉଲ୍ଲେଖ କରିଥିଲେ।
ତଥ୍ୟ – ଚାଳିତ ଶାସନର ଆବଶ୍ୟକତା ଉପରେ ଗୁରୁତ୍ୱାରୋପ କରି ପ୍ରଧାନମନ୍ତ୍ରୀ କହିଛନ୍ତି ଯେ ତଥ୍ୟକୁ କେବଳ ସଂଖ୍ୟା ଭାବରେ ଦେଖାଯିବା ଉଚିତ ନୁହେଁ, ବରଂ ଲକ୍ଷ ଲକ୍ଷ ଲୋକଙ୍କ ସାମୂହିକ ଜୀବନ, ଆହ୍ଵାନ ଏବଂ ଆକାଂକ୍ଷାର ପ୍ରତିଫଳନ ଭାବରେ ଦେଖାଯିବା ଉଚିତ। ନୀତିଗୁଡ଼ିକ ତୃଣମୂଳ ସ୍ତରରେ ପ୍ରଭାବଶାଳୀ ଭାବରେ ଫଳାଫଳରେ ପରିଣତ ହେଉଛି କି ନାହିଁ, ତାହା ଉପରେ ନିୟମିତ ଭାବରେ ମୂଲ୍ୟାଙ୍କନ କରିବାକୁ ସେ ଅଧିକାରୀମାନଙ୍କୁ ଅନୁରୋଧ କରିଥିଲେ।
ପ୍ରଧାନମନ୍ତ୍ରୀ ଦେଶ ନିର୍ମାଣରେ ମହିଳାଙ୍କ ବୃଦ୍ଧି ପାଉଥିବା ଭୂମିକା ଉପରେ ଆଲୋକପାତ କରିଥିଲେ। ଉଲ୍ଲେଖ କରିଥିଲେ ଯେ ବର୍ତ୍ତମାନର ବ୍ୟାଚ୍ରେ ୪୦ ପ୍ରତିଶତରୁ ଅଧିକ ମହିଳା ଅଧିକାରୀ ଅଛନ୍ତି।
ପ୍ରଧାନମନ୍ତ୍ରୀ ଯୁବ ଅଧିକାରୀମାନଙ୍କୁ ଦେଶ ନିର୍ମାଣରେ ସେମାନଙ୍କର ଅବଦାନକୁ ନିରନ୍ତର ମୂଲ୍ୟାଙ୍କନ କରିବାକୁ ଏବଂ ସେମାନଙ୍କ ପଦବୀରୁ ନୁହେଁ, ବରଂ ହାସଲ ହୋଇଥିବା ମାପଯୋଗ୍ୟ ଫଳାଫଳରୁ ସନ୍ତୋଷ ଲାଭ କରିବାକୁ ଆହ୍ୱାନ ଦେଇଥିଲେ। ସେମାନଙ୍କର ଶକ୍ତି, ପ୍ରତିଭା ଏବଂ ସମର୍ପଣ ଭାରତର ବିକାଶ ଯାତ୍ରାକୁ ନୂତନ ଉଚ୍ଚତାକୁ ନେବାରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ ବୋଲି ସେ ବିଶ୍ୱାସ ପ୍ରକାଶ କରିଥିଲେ। ରାଷ୍ଟ୍ର ମନ୍ତ୍ରୀ (କାର୍ମିକ) ଶ୍ରୀ ଜିତେନ୍ଦ୍ର ସିଂହ, ପ୍ରଧାନମନ୍ତ୍ରୀଙ୍କ ପ୍ରମୁଖ ସଚିବ ଶ୍ରୀ ପି.କେ. ମିଶ୍ର, ପ୍ରଧାନମନ୍ତ୍ରୀଙ୍କ ପ୍ରମୁଖ ସଚିବ -୨ ଶ୍ରୀ ଶକ୍ତିକାନ୍ତ ଦାସ, କ୍ୟାବିନେଟ ସଚିବ ଶ୍ରୀ ଟି.ଭି. ସୋମନାଥନ, ସଚିବ (ଡିଓପିଟି) ସୁଶ୍ରୀ ରଚନା ଶାହ, ଏଲବିଏସଏନଏଏର ନିର୍ଦ୍ଦେଶକ ଶ୍ରୀ ଶ୍ରୀରାମ ତରଣିକାନ୍ତି ଏବଂ ଅନ୍ୟାନ୍ୟ ବରିଷ୍ଠ ଅଧିକାରୀମାନେ ମଧ୍ୟ ଏହି ଆଲୋଚନା ସମୟରେ ଉପସ୍ଥିତ ଥିଲେ।
