ବିଦ୍ୟୁତ୍ ଆଘାତରେ ଯୁବକ ମୃତ

ମୟୂରଭଞ୍ଜ : ମୟୂରଭଞ୍ଜ ଜିଲ୍ଲା କପ୍ତିପଦା ଥାନା ଅନ୍ତର୍ଗତ ଜାମବଣୀ ଗ୍ରାମରେ ମୁଢ଼ିମିଲ୍‌ରେ କାର୍ଯ୍ୟ କରୁଥିବା ସମୟରେ ବିଦ୍ୟୁତ୍ ଆଘାତରେ ଜଣଙ୍କ ମୃତ୍ୟୁ ଘଟିଛି । ମୃତକ ଜଣକ ହେଲେ ଶୁଭମ ସାହୁ(୨୦) । ଘଟଣାରୁ ପ୍ରକାଶ, କପ୍ତିପଦା ଥାନା ଜାମବଣୀ ଗ୍ରାମର ସୁବାସ ଚନ୍ଦ୍ର ସାହୁଙ୍କର କପ୍ତିପଦା ବଜାରରେ ଏକ ମୁଢ଼ିମିଲ୍ ରହିଛି । ସୁବାସଙ୍କ ପୁଅ ଶୁଭମ୍ ସବୁଦିନ ମୁଢ଼ିମିଲ୍‌ରେ ବାପାଙ୍କୁ ସାହାଯ୍ୟ କରନ୍ତି । ମଙ୍ଗଳବାର ଉଭୟ ବାପା ଏବଂ ପୁଅ ମିଲ୍‌ରେ କାମ କରୁଥିବାବେଳେ ହଠାତ୍ ଶୁଭମ୍ ବିଦ୍ୟୁତ୍ ତାର ସଂସ୍ପର୍ଶରେ ଆସିଥିଲେ । ବିଦ୍ୟୁତ୍ ସଂସ୍ପର୍ଶରେ ଆସି ଗୁରୁତର ହେବା ପରେ ତାଙ୍କୁ ଉଦ୍ଧାର କରି ବାପା ଏବଂ ଅନ୍ୟମାନେ ଚିକିତ୍ସା ନିମନ୍ତେ ପ୍ରଥମେ କପ୍ତିପଦା ଡାକ୍ତରଖାନାରେ ଭର୍ତ୍ତି କରିଥିଲେ । ହେଲେ ଅବସ୍ଥାରେ ସୁଧାର ନଆସିବାରୁ ତାଙ୍କୁ ଉଦଳା ମେଡିକାଲରେ ଭର୍ତ୍ତି କରାଯାଇଥିଲା । ମାତ୍ର ଉଦଳା ଡାକ୍ତରଖାନାରେ ଡାକ୍ତର ତାଙ୍କୁ ମୃତ ବୋଲି ଘୋଷଣା କରିଥିଲେ । ଖବରପାଇ କପ୍ତିପଦା ପୁଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରିବା ସହିତ ବ୍ୟବଚ୍ଛେଦ କରାଇ ପରିବାର ଲୋକଙ୍କୁ ହସ୍ତାନ୍ତର କରିଛି । ଏହାସହ ଏକ ଅପମୃତ୍ୟୁ ମାମଲା ରୁଜୁ କରି ଘଟଣାର ତଦନ୍ତ ଜାରି ରଖିଥିବା ଜଣାପଡ଼ିଛି ।