ଭାରତରେ ପହଞ୍ଚିଲେ ଶେଖ ହସିନା

ଢାକା : ବାଂଲାଦେଶର ପ୍ରଧାନମନ୍ତ୍ରୀ ଶେଖ ହସିନା ପଦରୁ ଇସ୍ତଫା ଦେବା ପରେ ଭାରତରେ ପହଞ୍ଚିଛନ୍ତି । ହସିନା ତ୍ରିପୁରାର ରାଜଧାନୀ ଅଗରତାଲାରେ ପହଁଚି ଥିବା ନେଇ ଜାତୀୟ ଗଣମାଧ୍ୟମରୁ ସୂଚନା ମିଳିଛି । ଶେଖ ହସିନା ସୋମବାର ବାଂଲାଦେଶ ସେନା ମୁଖ୍ୟ ୱାକର-ଉଜ-ଜମାନଙ୍କ ପରାମର୍ଶ କ୍ରମେ ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେଇଥିଲେ । ଏହା ପରେ ସେନାର ସ୍ୱତନ୍ତ୍ର ହେଲିକପ୍ଟରରେ ଶେଖ ହସିନା ଏବଂ ତାଙ୍କ ଭଉଣୀ ଶେଖ ରିହାନା ଭାରତ ଅଭିମୁଖେ ଯାତ୍ରା କରିଥିଲେ । ହସିନାଙ୍କ ହେଲିକପ୍ଟର ତ୍ରିପୁରାର ରାଜଧାନୀ ଅଗରତାଲାରେ ଅବତରଣ କରିଛି । ସେ ସେଠାରେ କିଛି ସମୟ ରହିବା ପରେ ଦିଲ୍ଲୀ ବାହାରି ଯାଇଛନ୍ତି । ଦିଲ୍ଲୀରେ ପହଁଚିବା ପରେ ସେ କେଉଁଠାକୁ ଯିବେ ସ୍ପଷ୍ଟ ହୋଇ ନାହିଁ । ସେ ଭାରତ ଦେଇ ଲଣ୍ଡନ କିମ୍ବା ସ୍ୱିଜରଲ୍ୟାଣ୍ଡ ଯାଇ ପାରନ୍ତି ବୋଲି ଚର୍ଚ୍ଚା ହେଉଛି । ସରକାରୀ ଚାକିରିରେ ସଂରକ୍ଷଣ ବନ୍ଦ କରିବା ଦାବିରେ ବାଂଲାଦେଶରେ ହିଂସା ତୀବ୍ର ରୂପ ଧାରଣ କରିଛି । ଏହି ହିଂସାରେ ଏଯାବତ ୩୦୦ରୁ ଉର୍ଦ୍ଧ୍ୱ ସାଧାରଣ ନାଗରିକ ପ୍ରାଣ ହରାଇ ସାରିଲେଣି । ଏଥିପାଇଁ ପ୍ରଧାନମନ୍ତ୍ରୀଙ୍କ ଇସ୍ତଫା ମଧ୍ୟ ଦାବି କରାଯାଉଥିଲା । ଶେଷରେ ପ୍ରଧାନମନ୍ତ୍ରୀ ଶେଖ ହସିନା ନିଜ ପଦରୁ ଇସ୍ତଫା ଦେଇଥିଲେ । ତେବେ ହସିନାଙ୍କ ଇସ୍ତଫା ପରେ ବାଂଲାଦେଶ ସେନା ଅନ୍ତରୀଣ ସରକାର ଗଢିବେ ।