ପାଟନା: ବିହାରର ରାଜଧାନୀ ପାଟନାରେ ଜଣେ ଆଇନ (ଲ) ଛାତ୍ରଙ୍କୁ ହତ୍ୟା ମାମଲା ବୃଦ୍ଧି ପାଇବାରେ ଲାଗିଛି। ସୂଚନାନୁସାରେ, ସୋମବାର ଦିନ ପାଟନା ବିଶ୍ୱବିଦ୍ୟାଳୟରେ ୮ ଜଣ ମାସ୍କେଡ୍ ଦୁଷ୍କର୍ମକାରୀ କ୍ୟାମ୍ପସ୍ ଭିତରେ ପରୀକ୍ଷା ଦେବା ପରେ ବାହାରକୁ ଆସିଥିବା ଜଣେ ଛାତ୍ରଙ୍କୁ ପିଟିପିଟି ହତ୍ୟା କରିଥିଲେ। ଛାତ୍ର ଜଣକ ହର୍ଷ ରାଜ ବୋଲି ଜଣାପଡିଛି। ଏହି ହତ୍ୟାକାଣ୍ଡକୁ ନେଇ ଛାତ୍ରମାନଙ୍କ ମଧ୍ୟରେ କ୍ରୋଧ ବୃଦ୍ଧି ପାଇବାରେ ଲାଗିଥିଲା ଏବଂ ଛାତ୍ରମାନେ ଅନେକ ସ୍ଥାନରେ ବିରୋଧ କରୁଥିଲେ । ପ୍ରଦର୍ଶନ ସମୟରେ ଛାତ୍ର ଓ ପୋଲିସ ମଧ୍ୟରେ ମଧ୍ୟ ସଂଘର୍ଷ ହୋଇଥିଲା। ଛାତ୍ରୀଛାତ୍ରଙ୍କୁ ହଟାଇବା ପାଇଁ ପୋଲିସ ମଧ୍ୟ ବଳ ପ୍ରୟୋଗ କରିଥିଲା।
ପୋଲିସ କହିଛି ଯେ, ସେ ପାଟନା ବିଶ୍ୱବିଦ୍ୟାଳୟର ବିଏନ୍ କଲେଜର ଛାତ୍ର। ୨୨ ବର୍ଷୀୟ ଛାତ୍ର ଅପରାହ୍ନରେ ପରୀକ୍ଷା ପରେ କେନ୍ଦ୍ରରୁ ବାହାରକୁ ଆସିବା ପରେ ଏହି ଘଟଣା ଘଟିଥିଲା। ମୁଖା ପିନ୍ଧିଥିବା ବ୍ୟକ୍ତିମାନେ ହର୍ଷଙ୍କୁ ପିଟିବା ପରେ ଘଟଣାସ୍ଥଳରୁ ପଳାଇଥିଲେ। ପାଟନା ପୋଲିସ ଏହାର ବିବୃତ୍ତିରେ କହିଛି, “ସୂଚନା ମିଳିଛି ଯେ ସୁଲତାନଗଞ୍ଜ ପୋଲିସ ଷ୍ଟେସନ ଅଞ୍ଚଳର ଲ କଲେଜ କ୍ୟାମ୍ପସରେ ସ୍ନାତକୋତ୍ତର ପରୀକ୍ଷା ପାଇଁ ହାଜର ହେବାକୁ ଯାଇଥିବା ଜଣେ ଛାତ୍ରଙ୍କୁ କିଛି ଅଜ୍ଞାତ ବ୍ୟକ୍ତି ଆକ୍ରମଣ କରିଥିଲେ। ସେ ଆହତ ହୋଇଥିଲେ। ପୋଲିସ ଘଟଣା ସ୍ଥଳରେ ପହଞ୍ଚି ତାଙ୍କୁ ଡାକ୍ତରଖାନାକୁ ନେଇଗଲା, ସେଠାରେ ଚିକିତ୍ସା ସମୟରେ ତାଙ୍କର ମୃତ୍ୟୁ ହୋଇଥିଲା। ପୋଲିସ କହିଛି ଯେ, ଏହି ଘଟଣାରେ ଏକ ମାମଲା ପଞ୍ଜୀକୃତ ହୋଇଛି ଏବଂ ଅଭିଯୁକ୍ତମାନେ ଚିହ୍ନଟ ପାଇଁ ସିସିଟିଭି ଫୁଟେଜ ଯାଞ୍ଚ କରାଯିବ ସହ ତଦନ୍ତ ଜାରି ରହିଛି । ଅଭିଯୁକ୍ତକୁ ଗିରଫ କରିବା ପାଇଁ ପୋଲିସ ମଧ୍ୟ ଚଢ଼ାଉ ଆରମ୍ଭ କରିଛି। ଏହା ସହ କ୍ୟାମ୍ପସରେ ସୁରକ୍ଷା କର୍ମୀ ନିୟୋଜିତ ହୋଇଛନ୍ତି।
ଲ ଛାତ୍ରଙ୍କୁ ପିଟିପିଟି ହତ୍ୟା
