ଗୁନ୍ନାର୍ ସୋଲ୍‌ସ୍କର୍‌ଙ୍କ ସହ ସୂର୍ଯ୍ୟକୁମାରଙ୍କ ଜର୍ସି ଅଦଳ ବଦଳ

ବେଙ୍ଗାଲୁରୁ:  ଟିମ୍ ଇଣ୍ଡିଆ ବିସ୍ଫୋରକ ବ୍ୟାଟର୍ ସୂର୍ଯ୍ୟକୁମାର ଯାଦବ ବେଙ୍ଗାଲୁରୁରେ ମାଞ୍ଚେଷ୍ଟର୍ ୟୁନାଇଟେଡ୍‌ର ମହାନ୍ ପୂର୍ବତନ ଖେଳାଳି ଓଲେ ଗୁନ୍ନାର୍ ସୋଲ୍‌ସ୍କର୍‌ଙ୍କ ସହ ଜର୍ସି ଅଦଳ ବଦଳ କରିଛନ୍ତି । ବେଙ୍ଗାଲୁରୁରେ ଆୟୋଜିତ ଏକ କାର୍ଯ୍ୟକ୍ରମରେ ଉଭୟ ସୋଲ୍‌ସ୍କର୍ ଓ ସୂର୍ଯ୍ୟକୁମାର ଭାଗନେଇଥିଲେ ଏବଂ ଜର୍ସି ଆଦାନ ପ୍ରଦାନ କରିଥିଲେ । ଏହାର ଏକ ଫଟୋ ସୂର୍ଯ୍ୟକୁମାର ନିଜ ଇନ୍‌ଷ୍ଟାଗ୍ରାମ୍ ଆକାଉଣ୍ଟ୍‌ରେ ପୋଷ୍ଟ୍ କରିଛନ୍ତି । ଏହି ଫଟୋ ଏବେ ସୋସିଆଲ୍ ମିଡିଆରେ ଭାଇରାଲ୍ ହେବାରେ ଲାଗିଛି । ଉଲ୍ଲେଖଯୋଗ୍ୟ, ଭାରତରେ ମାଞ୍ଚେଷ୍ଟର୍ ୟୁନାଇଟେଡ୍ ଫୁଟ୍‌ବଲ୍ କ୍ଲବ୍‌ର ବହୁତ ପ୍ରଶଂସକ ରହିଛି । ସେମାନଙ୍କ ସହ ଯୋଡ଼ିହେବା ନିମନ୍ତେ ଓଲେ ଗୁନ୍ନାର ସୋଲ୍‌ସ୍କର୍ ଏବେ ତିନିଦିନିଆ ଭାରତ ଗସ୍ତରେ ଆସିଛନ୍ତି । ଅନ୍ୟପକ୍ଷରେ ଆହତ କାରଣରୁ ସୂର୍ଯ୍ୟକୁମାର ଏବେ କ୍ରିକେଟ୍‌ରୁ ଦୂରରେ ରହିଛନ୍ତି । ବେଙ୍ଗାଲୁରୁରେ ଆୟୋଜିତ କାର୍ଯ୍ୟକ୍ରମ ଯୋଗଦେଇଥିବା ବେଳେ ଦୁହେଁ ଜର୍ସି ଆଦାନ ପ୍ରଦାନ କରିଥିଲେ । ସୂର୍ଯ୍ୟକୁମାର ଭାରତୀୟ କ୍ରିକେଟ୍ ଟିମ୍ ଜର୍ସି ପ୍ରଦାନ  କରିଥିବା ବେଳେ ଓଲେ ଗୁନ୍ନାର୍ ମାଞ୍ଚେଷ୍ଟର୍ ୟୁନାଇଟେଡ୍ ଜର୍ସି ଦେଇଥିଲେ ।