“ନବୀନ ଓଡ଼ିଶା”ର “ଅସଲି ଚିତ୍ର” ପ୍ରକାଶ କଲେ “ଓବିସି କମିଶନ”
ପ୍ରିୟ ମୁଖ୍ୟମନ୍ତ୍ରୀ,
ଓଡ଼଼ିଶାର ପଛୁଆବର୍ଗ କମିଶନ ରାଜ୍ୟର ପଛୁଆବର୍ଗଙ୍କର ସାମାଜିକ, ଆର୍ଥିକ ଓ ଶିକ୍ଷାଗତ ସ୍ଥିତି ସମ୍ପର୍କରେ ତାଙ୍କର ରିପୋର୍ଟ ସରକାରଙ୍କୁ ଦେଇଛନ୍ତି । ବିଭିନ୍ନ ସମ୍ବାଦ ପତ୍ରରେ ରିପୋର୍ଟର ସାରାଂଶ ପ୍ରକାଶ ପାଇଛି । ରିପୋର୍ଟ ଅନୁଯାୟୀ ଏହି ବର୍ଗର “ସ୍ଥିତି ସବୁ କ୍ଷେତ୍ରରେ ଅତ୍ୟନ୍ତ ଦୟନୀୟ” । ରାଜ୍ୟ ସରକାରଙ୍କ ନିର୍ଦ୍ଦେଶ କ୍ରମେ କମିଶନ ଏ ସର୍ଭେ କାର୍ଯ୍ୟକୁ ହାତକୁ ନେଇ ତାଙ୍କର ରିପୋର୍ଟ ଦେବାପରେ କାହିଁକି ସରକାର “ଚୁପ୍ ରହିଛନ୍ତି”? କ’ଣ “ଅସଲି ଓଡ଼ିଶାର ଚିତ୍ର” ସାମନାକୁ ଆସିଯିବା ଭୟରେ?
ରିପୋର୍ଟ ଅନୁଯାୟୀ :-
ପଛୁଆବର୍ଗଙ୍କ ମଧ୍ୟରୁ ୧ କୋଟି ୯୫ ଲକ୍ଷ ଲୋକ କମିଶନଙ୍କୁ ତାଙ୍କର ମତାମତ ଜଣାଇଛନ୍ତି । ଆହୁରି ଅନେକ ଆସି ପାରିନାହାନ୍ତି । ଆସି ନପାରିଥିବା ଲୋକଙ୍କ ସଂଖ୍ୟା ୫୦ ଲକ୍ଷରୁ ଅଧିକ ହେବ ।
ଶିକ୍ଷା କ୍ଷେତ୍ରରେ – ରିପୋର୍ଟ ଅନୁଯାୟୀ ଏହି ବର୍ଗଙ୍କ ସ୍ଥିତି ଅତ୍ୟନ୍ତ ଦୟନୀୟ । (Deplorable Says OBC Commission)
ସରକାରୀ ଚାକିରୀରେ ପଛୁଆବର୍ଗଙ୍କ ସଂଖ୍ୟା ମାତ୍ର ୨.୮ ପ୍ରତିଶତ । ଏହି ବର୍ଗର ଆର୍ଥିକ ସ୍ଥିତି ଅତ୍ୟନ୍ତ ଭୟଙ୍କର । ମାତ୍ର ୧୯ ପ୍ରତିଶତ କୃଷି କାର୍ଯ୍ୟରେ ଅଛନ୍ତି । ଅନ୍ୟମାନେ ଦିନ ମଜୁରିଆ ଓ ଅଧିକାଂଶ ଦାଦନ ଶ୍ରମିକ । ଏହି ବର୍ଗର ଅଧିକାଂଶ ପରିବାର ଗରିବୀ ସୀମାରେଖାର ତଳେ (BPL) ।
ପଛୁଆବର୍ଗଙ୍କର ସି୍ଥତି ବ୍ୟତୀତ ଦଳିତ, ଆଦିବାସୀ ଓ ସଂଖ୍ୟାଲଘୁଙ୍କ ସମସ୍ୟା ତ’ ଆହୁରି ଚିନ୍ତାଜନକ ।
ମୁଖ୍ୟମନ୍ତ୍ରୀ ମହୋଦୟ – ଆପଣଙ୍କ ଶାସନ ପ୍ରାୟ ୨୫ ବର୍ଷ ହେବାକୁ ଯାଉଛି । ରାଜ୍ୟର ବିକାଶ ସମ୍ପର୍କରେ ପ୍ରତିଦିନ ସମ୍ବାଦପତ୍ର ମାନଙ୍କରେ ବଡ ବଡ “ବିଜ୍ଞାପନ” ବାହାରୁଛି । କମିଶନଙ୍କ ରିପୋର୍ଟ ସର୍ବସାଧାରଣ ହେଲେ ଏସବୁ ବିକାଶର ପ୍ରକୃତ ଚିତ୍ର ଜଣାପଡ଼ିଯିବ । ପଛୁଆବର୍ଗଙ୍କ ସଂଖ୍ୟା ୫୪ % – ସଂରକ୍ଷଣ ହେବା କଥା ୫୪ % କିନ୍ତୁ ଚାକିରୀରେ ମାତ୍ର ୧୧.୨୫% ଓ ଶିକ୍ଷା କ୍ଷେତ୍ରରେ ଆଦୌ ନାହିିଁ । ସମଗ୍ର ଦେଶରେ ଏହି ବର୍ଗ ଗତ ୨୫ ବର୍ଷ ହେଲା ଉଭୟ ଚାକିରୀ ଓ ଶିକ୍ଷାରେ ୨୭ % ପାଉଛନ୍ତି । ସାଧାରଣ ବର୍ଗଙ୍କ ସଂଖ୍ୟା ରାଜ୍ୟରେ ମାତ୍ର ୬ % ଥିବା ବେଳେ ସେମାନେ ପାଉଛନ୍ତି ୧୦ % ଉଭୟ ଶିକ୍ଷା ଓ ଚାକିରୀ କ୍ଷେତ୍ରରେ । ଅନୁସୂଚିତ ଜାତି ଓ ଅନୁସୂଚିତ ଜନଜାତିଙ୍କ ସଂଖ୍ୟା ୪୦ % – ସଂରକ୍ଷଣ ୪୦ % ପରିବର୍ତ୍ତେ ଶିକ୍ଷା କ୍ଷେତ୍ରରେ ମାତ୍ର ୨୦% ।
ଗୋଟିଏ ପଟେ ରାଜ୍ୟର ୯୪ ପ୍ରତିଶତ ଲୋକଙ୍କ (ପଛୁଆବର୍ଗ, ଦଳିତ, ଆଦିବାସୀ ଓ ସଂଖ୍ୟାଲଘୁ) ସ୍ଥିତି ଅତ୍ୟନ୍ତ ଦୟନୀୟ । ଯାହାର ପରିଣାମ – ଗରିବୀରେ ଓଡ଼ିଶା ନଂ-୧ – ଦାଦନ ଯିବାରେ ଦେଶରେ ନଂ-୧ – ମୁଣ୍ଡପିଛା ଆୟରେ ସବୁଠୁ ତଳେ – ପ୍ରୋତ୍ସାହନ ନଥିବାରୁ କୃଷିରୁ ବାଧ୍ୟ ହୋଇ ଲୋକେ ମୁହଁ ମୋଡ଼ି ଦେଲେଣି ।
ଅନ୍ୟପଟେ – ରାଜ୍ୟର ଅସଲି “ରତ୍ନଭଣ୍ଡାର” ମୂଲ୍ୟବାନ “ଖଣିଜ ସମ୍ପଦ” ଯାହାର “ଲୁଟ୍ର ତାଣ୍ଡବ” ପ୍ରତିଦିନ ଚାଲିଛି । ଆପଣଙ୍କ ଛତ୍ରଛାୟାରେ ୧୦୦ଟି ପରିବାର ଏହି ଲୁଟ୍ରେ ସାମିଲ୍ ହୋଇ – ହଜାର ହଜାର କୋଟି ଟଙ୍କାର ମାଲିକ ହୋଇଛନ୍ତି । “ଜଷ୍ଟିସ ଶାହା କମିଶନ” ତାଙ୍କ ରିପୋର୍ଟରେ – ପ୍ରାୟ ୫ ଲକ୍ଷ କୋଟି ଟଙ୍କାର ଖଣି ଲୁଟ୍ ହେବାର ସ୍ପଷ୍ଟ କହିଛନ୍ତି ।
ଓଡ଼଼଼ିଶାବାସୀଙ୍କ ମୁଣ୍ଡରୁ “ଗରିବୀର ଟୀକା” ଆଜି ପର୍ଯ୍ୟନ୍ତ ହଟି ପାରୁନାହିଁ । ୧୦୦ ବର୍ଷ ତଳେ ମହାତ୍ମାଗାନ୍ଧୀ ଓଡ଼ିଶାର ଗରିବୀ ସମ୍ପର୍କରେ ଯାହା କହିଥିଲେ ଆଜି ବି ସେଇ ସ୍ଥିତି ।
ତୁରନ୍ତ କମିଶନଙ୍କ ରିପୋର୍ଟ ପ୍ରକାଶ କରାଯିବା ସହ ଏହି ବର୍ଗର ସାମ୍ବିଧାନିକ ଅଧିକାର ସବୁ କ୍ଷେତ୍ରରେ ଯୁଦ୍ଧକାଳୀନ ଭିତ୍ତିରେ କାର୍ଯ୍ୟକାରୀ କରାଯାଉ । ଅତି କମ୍ରେ ପଛୁଆବର୍ଗରୁ ୫ ଲକ୍ଷ ଯୁବକ ଯୁବତୀଙ୍କୁ ଚାକିରୀ ଦେଇ – ଗତ ୨୫ ବର୍ଷ ଧରି ତାଙ୍କର ହକ୍ କୁ ଫେରାନ୍ତୁ ।
ସଂଖ୍ୟା ଯାହାର ଯେତେ – ଭାଗ ପାଇବେ ସେମାନେ ସେତେ ।
ସମ୍ମାନର ସହ
।ା ଇତି ।ା
