ଅଗରତାଲା : ନିଜର ପ୍ରେମିକଙ୍କୁ ବିବାହ କରିବା ନିମନ୍ତେ ଅବୈଧ ଭାବେ ଅନ୍ତର୍ଜାତୀୟ ସୀମା ପାର୍ହୋଇ ଭାରତରେ ପହଞ୍ଚିଥିବା ଜଣେ ବାଂଲାଦେଶୀ ଯୁବତୀଙ୍କୁ ତ୍ରିପୁରା ପୁଲିସ ଗିରଫ କରିଛି । ଶୁକ୍ରବାର ପୁଲିସ କହିଛି, ଧର୍ମନଗର ଜିଲ୍ଲାର ଫୁଲୱାରୀରେ ଆୟୁର୍ବେଦିକ୍ ଔଷଧ ଦେଉଥିବା ନୁର୍ ଜଲାଲ୍ (୩୪) ପ୍ରାୟ ସମୟରେ ବାଂଲାଦେଶର ମୌଲବୀ ବଜାର ଯାଇଥାଏ । ଇତିମଧ୍ୟରେ ବିବାହିତ ଜଲାଲ୍ର ସେଠାକାର ଜଣେ ୨୪ ବର୍ଷୀୟା ବିବାହିତା ମହିଳା ଫାତିମା ନୁସ୍ରତ୍ଙ୍କ ସହିତ ପ୍ରେମ ସମ୍ପର୍କ ଗଢ଼ୁ ଉଠିଥିଲା । ଏସ୍ଡିପିଓ ଦେବାଶିଷ ସାହାଙ୍କ ଅନୁସାରେ ଜଲାଲ୍କୁ ବିବାହ କରିବା ପାଇଁ ନୁସରତ୍ ପ୍ରାୟ ୧୫ ଦିନ ତଳେ ଅବୈଧ ଭାବେ ଧର୍ମନଗରରେ ପହଞ୍ଚିଥିଲେ । ଫୁଲ୍ୱାରୀରେ ଉଭୟ ଏକତ୍ର ମଧ୍ୟ ରହୁଥିଲେ ।
ତେବେ ଅଞ୍ଚଳରେ ଜଣେ ବାଂଲାଦେଶୀ ମହିଳାଙ୍କ ଉପସ୍ଥିତି ସମ୍ପର୍କରେ ସୂଚନା ମିଳିବା ପରେ ନୁସ୍ରତ୍ଙ୍କୁ ଗୁରୁବାର ଗିରଫ କରାଯାଇଥିଲା । କୋର୍ଟରେ ହାଜର କରାଯିବା ପରେ ନୁସ୍ରତ୍ଙ୍କୁ ୧୪ ଦିନ ପାଇଁ ଜେଲ୍ ହାଜତକୁ ପଠାଇ ଦିଆଯାଇଥିବା ବେଳେ ନୁର୍ ଜଲାଲ୍ ଫେରାର୍ ହୋଇଯାଇଛି । ପାକିସ୍ତାନର ସୀମା ହାଇଦରଙ୍କ କାହାଣୀ ମଧ୍ୟ ଏହିପରି ଥିଲା । ପ୍ରେମିକ ସଚିନ୍ ରାଣାଙ୍କୁ ଭେଟିବା ପାଇଁ ସୀମା ହାଇଦର ଅନ୍ତର୍ଜାତୀୟ ସୀମା ପାର୍ହୋଇ ଭାରତରେ ପହଞ୍ଚିଥିଲେ । ଅବଶ୍ୟ ଦୁହେଁ ଏବେ ଗ୍ରେଟର ନୋଇଡ଼ାରେ ବିବାହିତ ଜୀବନ ବିତାଉଛନ୍ତି ।
