ବ୍ରିଟେନ: ବ୍ରିଟେନରେ ଧୂମପାନ ନିଷେଧ ହୋଇପାରେ। କୁହାଯାଉଛି ଯେ ବ୍ରିଟିଶ ସରକାର ଦେଶରେ ସିଗାରେଟ୍ ଉପରେ ପ୍ରତିବନ୍ଧକ ଲଗାଇବାକୁ ପ୍ରସ୍ତୁତ ହେଉଛନ୍ତି। ଖବର ମୁତାବକ, ପ୍ରଧାନମନ୍ତ୍ରୀ ଋଷି ସୁନକ ସିଗାରେଟ୍ ଉତ୍ପାଦ ଉପରେ ପ୍ରତିବନ୍ଧକ ଲଗାଇବାକୁ ଚିନ୍ତା କରୁଛନ୍ତି।
ଇଂରାଜୀ ଖବରକାଗଜ ‘ଦି ଗାର୍ଡିଆନ୍’ ସରକାରୀ ସୂତ୍ରରୁ କହିଛି ଯେ ପ୍ରଧାନମନ୍ତ୍ରୀ ସୁନକ ଏମିତି ଏକ ନୀତି ଉପରେ କାର୍ଯ୍ୟ କରୁଛନ୍ତି, ଯେଉଁଥିରେ ଆଗାମୀ ପିଢ଼ିକୁ ସିଗାରେଟ୍ ବିକ୍ରୟ ଏବଂ କ୍ରୟରୁ ରୋକାଯାଇପାରିବ।
ରିପୋର୍ଟ ଅନୁସାରେ, ଗତ ବର୍ଷ ନ୍ୟୁଜିଲାଣ୍ଡରେ ଘୋଷିତ ଆଇନ ଭଳି ବ୍ରିଟେନରେ ମଧ୍ୟ ଧୂମପାନ ବିରୋଧୀ ପଦକ୍ଷେପ ଉପରେ ସୁନକ ବିଚାର କରୁଛନ୍ତି। ଏହା ଅଧୀନରେ ୨୦୦୯ ଜାନୁଆରୀ ୧ କିମ୍ବା ଏହାପରେ ଜନ୍ମିତ କୌଣସି ବି ବ୍ୟକ୍ତି ତମାଖୁ ବିକ୍ରି କରିପାରିବେ ନାହିଁ।
‘ଦି ଗାର୍ଡିଆନ୍’ରେ ପ୍ରକାଶିତ ରିପୋର୍ଟ ଅନୁସାରେ, ପ୍ରଧାନମନ୍ତ୍ରୀ ଋଷି ସୁନକଙ୍କୁ ଧୂମପାନ ପସନ୍ଦ ନୁହେଁ ଏବଂ ସେ ଏହା ଉପରେ ଏକ ଆଇନ ଆଣିବାକୁ ଆଗ୍ରହୀ ଅଛନ୍ତି। କୁହାଯାଉଛି, ବ୍ରିଟେନରେ ଧୂମପାନକୁ ନେଇ ଯେଉଁ ନୂଆ ଆଇନ ତିଆରି କରାଯାଉଛି, ତାହା ଗତ ବର୍ଷ ନ୍ୟୁଜିଲାଣ୍ଡରେ ପୂର୍ବତନ ପ୍ରଧାନମନ୍ତ୍ରୀ ଜସିଣ୍ଡା ଅର୍ଡର୍ନଙ୍କ କାର୍ଯ୍ୟକାଳରେ ଅଣାଯାଇଥିବା ଆଇନ ଦ୍ୱାରା ପ୍ରଭାବିତ ହେବ।
ନ୍ୟୁଜିଲାଣ୍ଡରେ ଧୂମପାନ ବିରୋଧୀ ଆଇନ ଅନୁସାରେ, ୧୪ ବର୍ଷରୁ କମ୍ ବୟସର ପିଲାଙ୍କ ଦ୍ୱାରା ସିଗାରେଟ୍ ବିକ୍ରୟ କରାଯାଇପାରିବ ନାହିଁ। ସେମାନେ ଏହାକୁ କିଣି ମଧ୍ୟ ପାରିବେ ନାହିଁ। ନ୍ୟୁଜିଲାଣ୍ଡ ସରକାରଙ୍କ କହିବା ହେଲା, ଏହାଦ୍ୱାରା ଆଗାମୀ ପିଢ଼ିକୁ ସିଗାରେଟ୍ ବ୍ୟବହାରରୁ ରୋକାଯାଇପାରିବ।
ବ୍ରିଟିଶ ସରକାର କହିଛନ୍ତି ଯେ ଧୂମପାନ ଛାଡ଼ିବା ପାଇଁ ସେ ଲୋକମାନଙ୍କୁ ପ୍ରୋତ୍ସାହିତ କରିବାକୁ ଚାହୁଁଛନ୍ତି, ଯଦ୍ଦ୍ଵାରା ୨୦୩୦ ସୁଦ୍ଧା ବ୍ରିଟେନକୁ ଧୂମପାନ ମୁକ୍ତ କରାଯାଇପାରିବ।
