ବୁଗୁଡ଼ା: ସାପ କାମୁଡ଼ାରେ ଆଜି ୩ ଜଣଙ୍କର ମୃତ୍ୟୁ ଘଟିଛି । ବୁଗୁଡା ଏନ୍ଏସିର ୱାର୍ଡ ନ-୧ ଅନ୍ତର୍ଗତ କାଞ୍ଜିଆପଲ୍ଲୀ ଗାଁରେ ସାପ କାମୁଡ଼ାରେ ବାପ ଝିଅଙ୍କର ମୃତ୍ୟୁ ହୋଇଛି । ସେମାନେ ଶିବରାମ ନାୟକ ଓ ତାଙ୍କ ଛଅ ବର୍ଷର ଝିଅ ଶ୍ରାବଣୀ । ଗତକାଲି ସାରା ରାତି ବିଦ୍ୟୁତ୍ ନଥିବା ବେଳେ ଘରେ ବାପା ଓ ଝିଅ ଶୋଇଥିଲେ । ବିଳମ୍ବିତ ରାତିରେ ଦୁହିଁଙ୍କୁ ସାପ କାମୁଡ଼ି ଦେଇଥିଲା । ସେମାନଙ୍କୁ ସଙ୍ଗେ ସଙ୍ଗେ ବୁଗୁଡ଼ା ମେଡିକାଲକୁ ଅଣାଯାଇଥିଲା ।
ସେଠାରେ ଡାକ୍ତର ଝିଅକୁ ମୃତ ଘୋଷଣା କରି ବାପାଙ୍କ ଚିକିତ୍ସା ଜାରି ରଖିଥିଲେ । ଗ୍ରାମବାସୀ ଓ ପରିବାର ଲୋକେ ଝିଅ ଶ୍ରାବଣୀର ଅନ୍ତିମ ସଂସ୍କାର କରି ଅପରାହ୍ନରେ ଫେରିବା ବେଳକୁ ବାପା ଶିବରାମଙ୍କ ମଧ୍ୟ ମୃତ୍ୟୁ ଘଟିଥିଲା । ଖବର ପାଇ ପୁଲିସ ଏସ୍ଆଇ ସମୀର କୁମାର ସେଠୀ ମେଡିକାଲରେ ପହଞ୍ଚି ଶବ ଜବତ କରିଥିବା ବେଳେ ଆସନ୍ତାକାଲି ବ୍ୟବଚ୍ଛେଦ ନିମନ୍ତେ ପଠାଯିବ ବୋଲି ଜଣାଯାଇଛି । ଏହି ଘଟଣାରେ ଗ୍ରାମରେ ଶୋକର ଛାୟା ଖେଳିଯାଇଛି ।
ସେହିପରି ଭଞ୍ଜନଗର ଗାଙ୍ଗପୁର ଥାନା ଅନ୍ତର୍ଗତ ଗୋବରା ନିକଟସ୍ଥ ମରାଇପାଟ ଗାଁରେ ସାପ କାମୁଡାରେ ହରି ଗୌଡ଼ଙ୍କ ସ୍ତ୍ରୀ ଶଶି ଗୌଡଙ୍କର ମୃତ୍ୟୁ ହୋଇଯାଇଛି । ଗତକାଲି ରାତିରେ ଘରେ ଶୋଇଥିବା ବେଳେ ଭୋର ସମୟରେ ଏକ ସାପ ଶଶିଙ୍କୁ କାମୁଡିଦେଇଥିଲା । ଗୁରୁତର ଅବସ୍ଥାରେ ତାଙ୍କୁ ଭଞ୍ଜନଗର ମେଡିକାଲରେ ଭର୍ତ୍ତି କରାଯାଇଥିବା ବେଳେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
