ରାଜସ୍ଥାନ : ଦିନକୁ ଦିନ ଦୁର୍ଘଟଣା ବଢ଼ି ଚାଲିଛି । ଏହି ଦୁର୍ଘଟଣାରେ କେତେ ଯେ ଲୋକଙ୍କ ଜୀବନ ଯାଉଛି ତାହା ନକହିବା ଭଲ । ଅବହେଳା କାରଣ କିମ୍ବା ଯାନ୍ତ୍ରିକ ତ୍ରୁଟି ଯୋଗୁଁ ଏଭଳି ଦୁର୍ଘଟଣା ଘଟିଥାଏ । ସମାନ ଭାବେ ରାଜସ୍ଥାନର ନବ ଗଠିତ ଡିଡୱାନା-କୁଚାମାନ ଜିଲ୍ଲାରେ ଏକ ଭୟଙ୍କର ସଡ଼କ ଦୁର୍ଘଟଣା ଘଟିଛି । ଏହି ଦୁର୍ଘଟଣାରେ ଗୋଟିଏ ପରିବାରର ୭ ଜଣଙ୍କର ମୃତ୍ୟୁ ଘଟିଥିବା ବେଳେ ଦୁଇଜଣ ଆହତ ହୋଇଛନ୍ତି । ପୋଲିସ ଏହି ଘଟଣାର ସୂଚନା ଦେଇଛି। ପୋଲିସ ଅଧିକ୍ଷକ ଧରମଚାନ୍ଦ ବିଶ୍ନୋଇ କହିଛନ୍ତି ଯେ, ଏହି ଘଟଣା ସମ୍ପୃକ୍ତ ଜିଲ୍ଲାର ଖୁନଖୁନା ପୋଲିସ ଥାନା ଅନ୍ତର୍ଗତ ବନ୍ଥଡ଼ି ଗାଁ ନିକଟରେ ଘଟିଛି ।
ଏଠାରେ ଏକ ଭ୍ୟାନ ଏବଂ ଏକ ଘରୋଇ ବସ ମୁହାଁମୁହିଁ ଧକ୍କା ହୋଇଥିଲା । ଫଳରେ ଏଭଳି ଭୟଙ୍କର ଦୁର୍ଘଟଣା ଘଟିଥିଲା । ପୋଲିସ ଅଧିକାରୀଙ୍କ କହିବା ଅନୁଯାୟୀ ଦୁର୍ଘଟଣାରେ ୭ ଜଣଙ୍କର ମୃତ୍ୟୁ ହୋଇଛି । ଦୁଇ ଆହତ ଯାତ୍ରୀଙ୍କୁ ଜିଲ୍ଲାର ବାଙ୍ଗଡ଼ ହସ୍ପିଟାଲରେ ପ୍ରଥମେ ଭର୍ତ୍ତି କରାଯାଇଥିଲା ପରେ ତାଙ୍କୁ ଜୟପୁରକୁ ପଠାଯାଇଥିଲା । ସୂଚନା ଅନୁସାରେ ଭ୍ୟାନରେ ଯାତ୍ରା କରୁଥିବା ଯାତ୍ରୀମାନେ ଏକ ବିବାହ ସମାରୋହରେ ସାମିଲ ହେବା ପାଇଁ ସିକରରୁ ନାଗୌର ଯାଉଥିଲେ । ପୋଲିସ ଅଧିକାରୀ ଏହା ମଧ୍ୟ କହିଛନ୍ତି ଏହି ଭୟଙ୍କର ଦୁର୍ଘଟଣା ପଛର ସଠିକ କାରଣ ବର୍ତ୍ତମାନ ସୁଦ୍ଧା ଜଣା ପଡ଼ି ନାହିଁ । ଏହି ଘଟଣାର ତଦନ୍ତ ଜାରି ରହିଛି ।
