କାର୍ଗିଲରେ ଖୋଲିଲା ପ୍ରଥମ ମହିଳା ଥାନା

ଶ୍ରୀନଗର: କେନ୍ଦ୍ରଶାସିତ ଅଞ୍ଚଳ ଲଦାଖ୍‌ର କାର୍ଗିଲ ସହରରେ ବୁଧବାର ପ୍ରଥମ ମହିଳା ଥାନା ସ୍ଥାପନ କରାଯାଇଛି । ଲଦାଖର ଅତିରିକ୍ତ ପୁଲିସ ମହାନିର୍ଦ୍ଦେଶକ ଏସ.ଡି.ସିଂହ ଜାମୱାଲ ଏହି ଥାନାକୁ ଉଦ୍‌ଘାଟନ କରିଛନ୍ତି । ମହିଳା ସଶକ୍ତିକରଣ ପ୍ରସଙ୍ଗକୁ ବୃଦ୍ଧି କରିବା ଏବଂ ମହିଳାଙ୍କ ସୁରକ୍ଷାକୁ ସୁଦୃଢ କରିବାରେ ଏହି ଥାନା ସହାୟକ ହେବ ବୋଲି ଆଶା କରାଯାଉଛି । ଉକ୍ତ ଥାନାରେ କେବଳ ମହିଳା ପୁଲିସଙ୍କୁ ଅବସ୍ଥାପିତ କରାଯାଇଛି । ପୀଡିତା ମହିଳାଙ୍କୁ ଚବିଶ ଘଣ୍ଟିଆ ସେବା ଯୋଗାଇଦେବାକୁ ଉକ୍ତ ଥାନା ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି । ବର୍ତ୍ତମାନ ଲଦାଖରେ ଅଧିକରୁ ଅଧିକ ମହିଳା ପୁଲିସ ବିଭାଗରେ ଚାକିରୀ କରିବାକୁ ଆଗ୍ରହ ପ୍ରକାଶ କରୁଥିବା ଲକ୍ଷ୍ୟ କରାଯାଇଛି ।