ପୋଲସରା: ପୋଲସରା ଗୁଳିକାଣ୍ଡ ଘଟଣାରେ ପୋଲସରା ଥାନା ପୁଲିସ ଅଭିଯୁକ୍ତ ପ୍ରଶାନ୍ତ କୁମାର ବେହେରାକୁ ହିଞ୍ଜିଳି ଥାନା ଅଞ୍ଚଳରୁ ଗିରଫ କରିଛି । ଅଭିଯୁକ୍ତ ନିକଟରୁ ଗୋଟିଏ ବନ୍ଧୁକ, ୨୩ଟି ଅଫୁଟା ଗୁଳି, ଦୁଇଟି ଖୋକା, ଗୋଟିଏ ଭୁଜାଲି ଓ ଗୋଟିଏ ମୋବାଇଲ ଜବତ କରାଯାଇଥିବା ନେଇ ଥାନାଧିକାରୀ ଜିତେନ୍ଦ୍ର କୁମାର ମଲ୍ଲିକ ସୂଚନା ଦେଇଛନ୍ତି । ପୋଲସରା ଥାନା ଅନ୍ତର୍ଗତ ପୋଲସରା ବ୍ଲକ୍ ଛକରେ ସଂଗଠିତ ଗୁଳିକାଣ୍ଡ ଘଟଣା ନେଇ ମୃତକ ବିଜୟ ବେହେରାଙ୍କ ଜ୍ୱାଇଁପୁଅ ସନ୍ତୋଷ ବେହେରା ଥାନାରେ ଲିଖିତ ଏତଲା ଦେଇଥିଲେ । ଏତଲାକୁ ଭିତ୍ତିକରି କେସ୍ ନଂ ୪୦୭/୨୩ ରେ ଏକ ମାମଲା ରୁଜୁ କରି ପୋଲିସ୍ ତଦନ୍ତ ଆରମ୍ଭ କରିଥିଲା ।
ଶ୍ୱଶୁରଙ୍କ ସମ୍ପତି ଭାଗବଣ୍ଟାକୁ ନେଇ ଗୁଳିକାଣ୍ଡ ଘଟିଥିବା ଜଣାପଡ଼ିଛି । ସୂଚନା ଯୋଗ୍ୟ ଯେ, ଗତ ମଙ୍ଗଳବାର ସନ୍ଧ୍ୟାରେ ପୋଲସରା ବ୍ଲକ୍ ଛକରେ ଗୁଳିକାଣ୍ଡରେ ବାପା ମୁତ୍ୟୁବରଣ କରିଥିବା ବେଳେ ଝିଅ ଆହତ ହୋଇଥିଲେ । ମୃତ ବ୍ୟକ୍ତି ଜଣକ ଖଲ୍ଲିକୋଟ କୋମଣ୍ଡ ଗ୍ରାମର ବିଜୟ ବେହେରା । ବିଜୟ ବ୍ଲକ୍ ଛକ ସ୍ଥିତ ଟେଲର ଦୋକାନରେ ବସିଥିବା ସମୟରେ ପ୍ରଶାନ୍ତ ପହଞ୍ôଚ ପାଟିତୁଣ୍ଡ କରିଥିଲା । ଘଟଣା ଉଗ୍ରରୂପ ନେବାରୁ ପ୍ରଶାନ୍ତ ଅତର୍କିତ ଭାବେ ଗୁଳି ଚାଳନା କରି ଫେରାର ହୋଇଯାଇଥିଲେ । ଏହା ସହିତ ଗୁଳିମାଡ଼ରେ ମୃତକଙ୍କ ଝିଅ ମଧ୍ୟ ଗୁରୁତର ଭାବେ ଆହତ ହୋଇ ବ୍ରହ୍ମପୁରରେ ଚିକିତ୍ସିତ ହେଉଥିବା ଜଣାପଡ଼ିଛି ।
