ନୂଆଦିଲ୍ଲୀ: ଚଳିତମାସ ଶେଷଆଡକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନୂତନ ସଂସଦ ଭବନ ଉଦ୍ଘାଟନ କରିବେ ବୋଲି ନିର୍ଭରଯୋଗ୍ୟ ସୂତ୍ରରୁ ଜଣାପଡିଛି । ସେଣ୍ଟ୍ରାଲ ଭିଷ୍ଟା ପ୍ରକଳ୍ପରେ ନିର୍ମିତ ହେଉଥିବା ଏହି ସଂସଦ ଭବନ ଚୂଡାନ୍ତ ପର୍ଯ୍ୟାୟରେ ପହଞ୍ଚିଛି । ୨୦୧୪ ମେ’ ୨୬ରେ ମୋଦୀ ପ୍ରଥମ ଥର ପ୍ରଧାନମନ୍ତ୍ରୀଭାବେ ସଂସଦରେ ଶପଥଗ୍ରହଣ କରିଥିଲେ ।
ତେଣୁ ତାଙ୍କ କାର୍ଯ୍ୟକାଳର ୯ ବର୍ଷ ପୂର୍ତ୍ତି ଉପଲକ୍ଷେ ଉକ୍ତ ଦିନ (ମେ’ ୨୬)ରେ ଏହା ଉଦ୍ଘାଟିତ ହୋଇପାରେ ବୋଲି ଅନୁମାନ କରାଯାଉଛି । ୯୭୦ କୋଟି ଟଙ୍କା ବ୍ୟୟରେ ନିର୍ମିତ ଏହି ନୂତନ ସଂସଦ ଭବନରେ ମୋଟ ୧୨୨୪ ସାଂସଦ ବସିବାର ବନ୍ଦୋବସ୍ତ କରାଯାଇଛି । ଉକ୍ତ ଭବନରେ ବିଶାଳକାୟ କନ୍ଫରେନ୍ସ ହଲ୍ ସମେତ ଡାଇନିଂ ହଲ, ଲାଇବ୍ରେରୀ, ଅଭ୍ୟର୍ଥନା କକ୍ଷ ଇତ୍ୟାଦି ମଧ୍ୟ ନିର୍ମାଣ କରାଯାଇଛି । ମୋଦୀ ୨୦୨୦ ଡିସେମ୍ବରରେ ନୂତନ ସଂସଦ ଭବନର ଶିଳାନ୍ୟାସ କରିଥିଲେ ।
