ଆନ୍ଧ୍ରପ୍ରଦେଶରେ ୪୮ ଘଣ୍ଟାରେ ୧୦ ଛାତ୍ରଙ୍କ ଆତ୍ମହତ୍ୟା

ହାଇଦ୍ରାବାଦ: ଆନ୍ଧ୍ରପ୍ରଦେଶରେ ଗତ ୪୮ ଘଣ୍ଟା ମଧ୍ୟରେ ୧୦ ଜଣ ଛାତ୍ର ଆତ୍ମହତ୍ୟା କରିଛନ୍ତି । ବୁଧବାର ଆନ୍ଧ୍ରପ୍ରଦେଶ ଇଣ୍ଟରମିଡିଏଟ୍ ବୋର୍ଡର ଏକାଦଶ ଓ ଦ୍ୱାଦଶ ଶ୍ରେଣୀ ଫଳ ପ୍ରକାଶିତ ହୋଇଥିଲା । ପରୀକ୍ଷାରେ କମ୍ ନମ୍ବର ରଖିବା ଏବଂ ଫେଲ୍ ହେବାର କାରଣରୁ ଏହି ଛାତ୍ରମାନେ ଆତ୍ମହତ୍ୟା କରିଛନ୍ତି । ଏହା ମଧ୍ୟରୁ ୬ ଜଣ ଫେଲ୍ ହେବା, ଜଣେ କମ୍ ନମ୍ବର ରଖିବା କାରଣରୁ ଜୀବନ ହାରିଥିବା ବେଳେ ତିନିଜଣଙ୍କ ଆତ୍ମହତ୍ୟା କାରଣ ଜଣାପଡ଼ିନାହିଁ । ଏହା ମଧ୍ୟରୁ କେହି ଟ୍ରେନ୍ ଆଗକୁ ଡେଇଁ ଜୀବନ ଦେଇଥିବା ବେଳେ ଅନ୍ୟ କେତେକ ବିଷପିଇ ଏବଂ ଫାଶୀ ଲଗାଇ ଆତ୍ମହତ୍ୟା କରିଛନ୍ତି । ଚଳିତ ଥର ୧୦ ଲକ୍ଷ ଛାତ୍ରଛାତ୍ରୀ ଆନ୍ଧ୍ରପ୍ରଦେଶ ଇଣ୍ଟରମିଡିଏଟ୍ ବୋର୍ଡ ପରୀକ୍ଷା ଦେଇଥିବା ବେଳେ ଏକାଦଶରେ ୬୧% ଏବଂ ଦ୍ୱାଦଶରେ ୭୨% ଛାତ୍ରଛାତ୍ରୀ ପାସ୍ ହୋଇଛନ୍ତି ।