ନୂଆଦିଲ୍ଲୀ: ମହାରାଷ୍ଟ୍ରର ପୁଣେରେ ଗତକାଲି ବିଳମ୍ବିତ ରାତିରେ ଏକ ଟ୍ରକ୍ ଏବଂ ଏକ ଘରୋଇ ବସ୍ ମୁହାଁମୁହିଁ ଧକ୍କା ହୋଇଛି । ଏହି ଦୁର୍ଘଟଣାରେ ୪ ଜଣଙ୍କର ମୃତ୍ୟୁ ହୋଇଛି । ଏଥିସହ ୨୨ ଜଣ ଆହତ ହୋଇଥିବା କୁହାଯାଇଛି । କୁହାଯାଉଛି କି, ପୁଣେର ନରହେ ଅଞ୍ଚଳର ପୁଣେ-ବେଙ୍ଗାଲୁରୁ ରାଜପଥରେ ଭୋର ପ୍ରାୟ ୩ ଟାରେ ଏହି ଦୁର୍ଘଟଣା ଘଟିଛି । ଆହତମାନଙ୍କୁ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଛି। ପୋଲିସ ଦୁର୍ଘଟଣା ସ୍ଥଳରେ ପହଞ୍ଚି ଉଦ୍ଧାରକାର୍ଯ୍ୟ ଆରମ୍ଭ କରିଥିଲା ।
ସୂଚନା ଅନୁଯାୟୀ, ଯାତ୍ରୀବାହୀ ବସ୍ ସାତାରା ଠାରୁ ଥାନେର ଡୋମ୍ବିଭଲି ଅଭିମୁଖେ ଯାଉଥିଲା ଏବଂ ସାମ୍ନାରୁ ଆସୁଥିବା ଏକ ଆଖୁ ବୋଝେଇ ଟ୍ରକ ସ୍ବାମିନାରାୟଣ ମନ୍ଦିର ନିକଟରେ ତାକୁ ଧକା ଦେଇଥିଲା । ଘଟଣାସ୍ଥଳରେ ତିନି ଜଣ ବସ୍ ଯାତ୍ରୀ ଏବଂ ଟ୍ରକ୍ ଡ୍ରାଇଭରଙ୍କର ମୃତ୍ୟୁ ଘଟିଥିବା ବେଳେ ପ୍ରାୟ ୨୨ ଜଣ ଯାତ୍ରୀ ଆହତ ହୋଇଛନ୍ତି ବୋଲି ଜଣେ ପୋଲିସ ଅଧିକାରୀ କହିଛନ୍ତି । ୧୩ ଜଣ ଆହତ ଯାତ୍ରୀଙ୍କୁ ପୁଣେର ବିଭିନ୍ନ ଡାକ୍ତରଖାନା, ନାଭାଲ ହସ୍ପିଟାଲ, ଦିନାନାଥ ମଙ୍ଗେଶକର ହସ୍ପିଟାଲ ଏବଂ ସେସନ୍ ହସ୍ପିଟାଲରେ ଭର୍ତ୍ତି କରାଯାଇଛି । ଅନ୍ୟ ଆହତ ଯାତ୍ରୀମାନଙ୍କୁ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଛି ବୋଲି ଅଧିକାରୀ କହିଛନ୍ତି। ଦୁର୍ଘଟଣାର କାରଣ ଏପର୍ଯ୍ୟନ୍ତ ଜଣାପଡିନାହିଁ ଏବଂ ପୋଲିସ ଘଟଣାର ତଦନ୍ତ ଆରମ୍ଭ କରିଛି ।
