ନାବାଳିକା ଚାରି ମାସର ଗର୍ଭବତୀ ଅଭିଯୋଗ

ମୟୂରଭଞ୍ଜ : ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ଟାଉନ ଆଦର୍ଶ ଥାନା ଅଞ୍ଚଳର ଜଣେ ନାବାଳିକାକୁ ଚାରିମାସର ଗର୍ଭବତୀ କରିବା ଅଭିଯୋଗରେ ନାବାଳକକୁ ପୁଲିସ ଥାନାରେ ଅଟକ ରଖିଛି । ସୂଚନା ଅନୁଯାୟୀ, ଗୋରୁମହିଷାଣୀ ଥାନା ଅନ୍ତର୍ଗତ କୁଲଢ଼ିହା ଗ୍ରାମ ନାବାଳକ ଚଳିତ ଜାନୁଆରି ମାସରେ ରାଇରଙ୍ଗପୁର ଟାଉନ ଆଦର୍ଶ ଥାନା ଅନ୍ତର୍ଗତ ଅସନବଣୀକୁ ଯାଇଥିବା ବାର୍ଷିକ କ୍ରୀଡ଼ା ପ୍ରତିଯୋଗିତା ଦେଖିବା ପାଇଁ ଆସିଥିଲା । ସେହି ସମୟରେ ଅସନବଣି ଗ୍ରାମର ନାବାଳିକାକୁ ଗାଁ ପାଖ ଜଙ୍ଗଲକୁ ନେଇ ଦୁଷ୍କର୍ମ କରିଥିଲା । ଉକ୍ତ ଘଟଣାକୁ ଉଭୟ ନାବାଳକ ଓ ନାବାଳିକା ନିଜ ନିଜ ଘରେ ଜଣାଇ ନ ଥିଲେ । ଏହାରି ଭିତରେ ନାବାଳିକା ଜଣକ ଚାରି ମାସର ଗର୍ଭ ଧାରଣ କରିଥିବା ନେଇ ପରିବାର ଲୋକେ ଜାଣିବା ପରେ ଝିଅର ବୟାନ ଅନୁଯାୟୀ ଥାନାରେ ଏତଲା ଦେଇଥିଲେ । ପୁଲିସ ଏକ ମାମଲା ରୁଜୁ କରି ସଂପୃକ୍ତ ଥିବା କୁଲଡ଼ିହା ଗ୍ରାମରୁ ଯୁବକକୁ ଠାବ କରି ଥାନାକୁ ଆଣି ଅଟକ ରଖିଛି । ଆସନ୍ତା କାଲି ବାରିପଦା ସ୍ଥିତ ପକ୍ସ କୋର୍ଟରେ ଉଭୟଙ୍କୁ ହାଜର କରାଯିବ ବୋଲି ଜଣାପଡିଛି । ଉଭୟ ପୃଥକ ଭାବେ ଉଚ୍ଚ ପ୍ରାଥମିକ ବିଦ୍ୟାଳୟରେ ପାଠ ପଢ଼ୁଥିବା ନାବାଳକ ଓ ନାବାଳିକା ଅଟନ୍ତି ।